Read Zou JOSHUA 9 Bible Online

JOSHUA 9 - Zou bible

JOSHUA 9

¹Tu-in Jordan galkhatah a om muoltung gam le lei ngiemna gam Tuipi lien dung peisuoh Lebanon donga teng Hit-te, Amor-te, Canaan-te, Periz-te, Hiv-te le Jebus-te in tam thu a zah ciengun,

²Joshua le Israel-te sim dingin lungsim kikhatin a kisutuo uhi.

³Ahi vangin Gibeon-a teng mite in Jericho le Ai tunga Joshua bawlsate a zah ciengun

⁴amate lam panin tam bangin a solbawl uhi: Amate pei-in lam-ante[14] guongin, a laate adingin a siesa ip le a paatsa, a lui a kiphaw lenggazu-umte a guong vua,

⁵a keng vuah a kiphaw, a paatsa kedapte bulin a paatsa puonte a sil uhi; a an zosie uzong a gawta le a apkai vive ahi hi.

⁶Gilgal giephuola om Joshua kungah pei-in ama le Israel-te tungah, “Kote pen a gamlapi pana ang pei ka hi uhi; tuaci’n tuni-in kote tawh thukimna khat hing bawl un,” a ci uhi.

⁷Hizongle Israel-te in Hiv-te kungah, “Kote lahah a teng mite na hi kha thei ding uhi. Tua bang hi mawh leh note tawh thukimna bang ka ci bawl thei ding uh ahei?” a ci uhi.

⁸Amate in Joshua kungah, “Na nasemte ka hi uhi,” a ci uhi. Tuale Joshua in, “No koite na hi vuoi?” a ci hi.

⁹Amate in, “TOPA na Pasien uh’ min zalin na nasemte a gamla mama gam pana ang pei ka hi uhi; azieh pen ama’ thu le Egypt gam sunga a sepkhiet zosie,

¹⁰le Jordan galkhata om Amor kumpi nite ahi Ashtaroth-a a teng Heshbon kumpi Sihon le Bashan kumpi Og tunga a sepsa zosie a kigenna ka za zo uhi.

¹¹Tuaci’n ka upate ule ka gam vua ka tenpi uh mi zosie in kote kungah, ‘Na khuolzin nading vuah lam-an guong un; amate tawh a kimu dingin pei unlen a kung vuah, “Na nasemte ka hi uhi; tu-in hing pei unlen kote tawh thukimna khat hing bawl un,” va ci ta un,’ ei ci uhi.

¹²Tanah ka mohte uh om hi. Na kung vua ang haw dinga kang din khiet ni uh, khuolzin lam-an dinga ka guon lai-un a lumlai a, hizongle tu-in en un, gawta-in a apkai sieng ta hi.

¹³Tami lenggatui savun bungte zong ka thun patun a tha ahi a, tu-in a sie sieng ta hi; tami ka puonte ule ka kedapte uzong lam saupi kang peina vuah a siepaat sieng ta hi,” a ci uhi.

¹⁴Tuaci’n makaite-in[15] a lam-an uh a ne vua, TOPA tung panin lamlahna a ngen sih uhi.

¹⁵Tuale Joshua in amate a hinkhawi nading kilemna thuciem a bawl hi; tuale amate tungah mihonpi makaite a kiciem uhi.

¹⁶Hizongle amate tawh thukimna a bawl zaw uh nithum a cin ciengin, amate pen a vengte ahi lam ule amate lahah a tengte ahi lam a za uhi.

¹⁷Tuaci’n Israel-te dingkhie-in a ni thum ni-in a khuopite vuah a tung uhi. A khuopite uh pen Gibeon, Chephirah, Beeroth le Kiriath-jearim ahi hi.

¹⁸Ahi vangin mihonpi makaite in TOPA, Israel Pasien’ min tawh a tung vuah kiciemna a nei zo ziehun Israel-te in amate a do sih uhi. Tua ciengin mihon zosie makaite tungah a phun uhi.

¹⁹Hinanle makai zosie in mihonpi zosiete tungah, “TOPA, Israel Pasien’ minin a tung vuah i kiciem zo ta vua, tu-in amate i sukha sih ding uhi.

²⁰Amate tunga i bawl ding uh tam ahi hi: Eite in amate tunga i bawl uh thuciemna ziehin eite tungah lungthahna ang tun lo nadingin amate i hingsah ding hi,” a ci uhi.

²¹Makaite in a kung vuah, “Amate hingsah un,” a ci uhi. Tuaci’n amate tawh kisai makaite khensatsa bangin mihonpi zosie adingin sing suite le tui tawite a suoh uhi.

²²Joshua in amate hlanin a kung vuah, “Kote lahah teng napi bang dingin, ‘Na kung panin a gamlapi-ah ka teng uhi,’ ci-in ei sol na hi uh ahei?

²³Tua ahi ziehin tu-in samsiet thuoh na hi vua, note lahah mi pawlkhat a tawntungin sila, ka Pasien’ inn adingin sing suite le tui tawite na hi ding uhi,” a ci hi.

²⁴Amate in Joshua dawngin, “Bangzieh ahei cile TOPA na Pasien un ama’ nasem Moses tungah gam buppi nang hing pie-in na mai panin gam sunga teng mi zosie a suhsiet tahtah nading thu a piehna ko na nasemte kungah ei kigen hi. Note ziehin ka si ding uh ka zau mama vua, tuaci’n tam bangin ka na bawl uhi.

²⁵Tu-in kote pen na khut sunga om ka hi uhi: Na muna-ah a hoi le a man na sah bangin ka tung vuah ei bawl in,” a ci uhi.

²⁶Ama in amate adingin tam bangin a bawl hi: Ama in Israel-te panin amate a hunkhie hi; amate a that sih uhi.

²⁷Ahi vangin tua ni-in Joshua in mihonpite ading le ama in a teel nading munah TOPA’ maitam ading singtomte le tuitawite suohsah a, tuni dongin a sem uhi.