Read Zou 2 THESSALONICA 1 Bible Online

2 THESSALONICA 1 - Zou bible

2 THESSALONICA 1

¹Paul, Silvanus le Timothy-te in, i Pa Pasien le TOPA Jesu Khris sunga a om Thessalonica khuo hlattuom pawlpite tungah lai kang hlah uhi.

²I Pa Pasien le TOPA Jesu Khris tung pan hepina le lungnopna in note tungah ang tung taheh.

³Sanggamte aw, na upna uh nahpi tahin khangin khatlekhat na ki-itna uh zong khang semsem ahi ziehin, note adingin Pasien tungah lungdam ka ko zing ding uh a kilawm ahi hi.

⁴Tua ahi ziehin note in na thuoh uh bawlsietna le gimna zosie-ah thuohzawhna le upna nei na hi ziehun komate ma zong Pasien’ hlattuom pawlpite lahah ka na kisiel uhi.

⁵Tami thute in Pasien’ manggam tawh a kilawm dinga note ang kibawl sawmna ahi a dih Pasien’ thukhenna kilangsah a, note in zong tua thute zieha na thuoh uh ahi hi.

⁶Bangzieh ahei cile note ang gentheisah mite tungah Pasien in gentheina ma tawh thuhkia valon ding a,

⁷TOPA Jesu in vantung panin a thahat a vantung mite tawh ang kilat ciengin gimna a thuoh note le kote tungah zong tawldamna ei piehton ding pen a thuman hi a,

⁸Pasien a thei lo mite le i TOPA Jesu’ lungdamna thu a mang lo mite, meikuong sungah phulahna tawh a thuhkia ding hi.

⁹TOPA opna pan le a thupi ama’ vanglietna panin tam mite kikhenkhie-in tawntung sietna dan a thuoh ding vua,

¹⁰a misiengthote ziehin minthanna nga dingin ang pei ciengin note kunga ka teci pan uh a ki-up ziehin tua ni ciengin ama a umsa mi zosiete lahah lamdang kisa ding hi.

¹¹Tam thu a tangtun nadingin i Pasien in ama’ hlatna tawh kituohin hing siemin, a vanglietna tawh na lunggulna hoi zosie ule upna nasep hoite ang kicinsah thei nadingin note adingin thu ka ngen zing uhi.

¹²Tuaci’n i Pasien le i TOPA Jesu Khris’ hepina tawh kizui-in note sungah i TOPA Jesu minthangin, ama sungah note na minthan thei nading uh thu ngen zing ka hi uhi.