Read Zou 2 THESSALONICA 2 Bible Online

2 THESSALONICA 2 - Zou bible

2 THESSALONICA 2

¹Sanggamte aw, i TOPA Jesu Khris ang peikia ding vai le ama kungah eite i kikaituo nading vai tawh kisai-in,

²TOPA’ ni ang tung ta hi, ci-in hlagau zieh ahiei, thu kigensawn zieh ahiei, ahi sihle ko kung pana ang pei dan a kibawltawm laihahte ziehin ahiei, lunghimaw-in na patau pai lo nadingun na tung vuah kang thum hi.

³Lam khat popo-ah koima in kisolsah sih un; azieh pen ledona ang tung masa-in, manthaina[1] thuoh dinga laitansa ahi thukham palsat pa[2] ang kilah masangsie-in tua ni ang tung sih ding hi.

⁴Ama in pasien a kici zosie le a kibie zosie langpangin ama le ama kitawisang ding a, tuaci’n Pasien’ biehinnpi sungah ama to-in Pasien ka hi hi, ci-in ama le ama kipulah ding hi.

⁵Note tawh kang opton lai-in na kung vuah tam thute kang gen na phawh nawn sih uh amah?

⁶A hun ang tun ciengin ama ang kilah thei nadingin, bang in ama kham ahei, ci thu na thei uhi.

⁷Bangzieh ahei cile tua thukham palsatna thuthuh in na sem zo a, ahi vangin tu-a ama a khamcip pa a kihep masangsie-in ama in khamcip lai ding hi.

⁸Tua ciengin thukham palsat pa ang kilang ding a, TOPA Jesu[3] in a kam panin ama’ huu tawh ama susie ding a,[4] ama ang peina zieha a kilahna tawh ama sumaimang ding hi.

⁹Vanglietna zosie, limte, le a lamdang solnate a zang Satan’ nasepna sungah thukham palsat pa ang pei ahi lamtah kilang a,

¹⁰a kisie ding mite in hutdam hi thei nadingin thuman thutah pom ding a nuol ziehun solna namkim a thuoh ding uhi.

¹¹Tam thu ziehin amate in zuouthu a up nadingun Pasien in amate tungah solna lienpi tungsah a,

¹²tua thuman thutah um loin, thuman lona sungah nuom a sa mite zosie tungah mawsah thukhenna a tun thei nading ahi hi.

¹³Ahi vangin TOPA’ ang it sanggamte aw, Hlagau kisiensuona tungtawn le thuman thutah na upna uh tungtawnin hutdamna nga nadinga ga masa[5] dingin Pasien in note ang teel ziehin, note adingin Pasien kungah lungdam ka ko zing ding uh ahi hi.

¹⁴Tami ngimna ziehin note in TOPA Jesu Khris’ minthanna na nga thei nadingun ama in ka tangko uh lungdamna thu tha[6] tungtawnin note ang hlan zo hi.

¹⁵Tua ahi ciengin sanggamte aw, note in kam tawh hile, lai tawh hile kang hilsa uh ngainate pomdetin kiptahin ding un.

¹⁶Tu-in i TOPA Jesu Khris mama le eite ei it a, kumtawn henepna le hepina tungtawnin lametna hoi ei pie pa i pa uh Pasien in,

¹⁷na lungsimte uh hing henem hinlen, thu hoi le nasep hoi namcin-ah hing thakhausah taheh.