Read Zou 2 THESSALONICA 3 Bible Online

2 THESSALONICA 3 - Zou bible

2 THESSALONICA 3

¹Sanggamte aw, a nukhia penin note lahah a piengsa bang tehtehin mun zosie-ah TOPA’ thu a mallangin kizelin a kithan thei nading le,

²mi hoilote le mi gilote kung panin ka suotah thei nadingun thu ei na ngetpieh un; bangzieh ahei cile mi zosie in upna a nei sih uhi.

³Ahi vangin TOPA a muonhuoi a, note hing thahat sahin gilopa[7] kung panin ang kem ding hi.

⁴Note in kang thupiehte uh na zui vua, TOPA sungah a zui suoh lai dingin zong kang muong uhi.

⁵Pasien’ itna le Khris’ thuohzawhna lamah na lungsim uh TOPA in lam hing lah taheh.

⁶Tu-in kang itte[8] aw, kote tung panin amate[9] in a sansa uh ngainate tawh kituoh loin nasep a thada thu umte[10] na pelh nadingun i TOPA Jesu Khris’ minin thu kang pie hi.

⁷Bangzieh ahei cile kote nei ette ding vua kilawm ahi lam no mama in na theisa uh ahi hi; note tawh ka opton sungun ka thasie sih vua,

⁸a man pie loin koima’ an ka mawh neh sih uhi; mi khatpo’ vangih ka suo lo nadingun gimpipi-in sun le zanin na ka semzaw uhi.

⁹Tua bang neh theina ding thu a nei lo ka hi tuon sih vua, note’ ette ding limpha kang lah nop man uh ahi zaw hi.

¹⁰Bangzieh ahei cile note tawh ka opton lai nangawnun zong nasem nuom lo mi poma in an ne sih heh, ci-in thu kang pie zo ta uhi.

¹¹Bangzieh ahei cile note lahah mi pawl khat thasie-in bangma sem loin mi nasepnate-ah kikumthaw-in a op lam uh ka za uhi.

¹²Tu-in tua bang mite in a anneh ding uh thalaw-in, a na uh a sep khinkhian nadingun kote in TOPA Jesu Khris minin thu pie-in ka hanthawn uhi.

¹³Sanggamte aw, na hoi sep ding cimtah sih un.

¹⁴Tami lai sunga ka thugente uh a mang nuom lote ciemte unlen, a maizum thei nadingun na kigop sih un.

¹⁵Ahi vangin amate gal bangin ngaisun sih unlen, thu umte[11] bangin thu hil un.

¹⁶Tu-in kilemna TOPA mama in na vai zosie vuah a tawntungin lungnopna hing pie taheh. TOPA in note zosie hing ompi taheh.

¹⁷Keima Paul in ka khut mama tawh tami nosetna lai kang giel ahi hi. Ka laihah zosie tam banga ka ciemte ahi a, tami khu ka lai gieldan ahi hi.

¹⁸Note tawh i TOPA Jesu Khris’ hepina hing om taheh.[12]