Read Zou 1 TIMOTHY 1 Bible Online

1 TIMOTHY 1 - Zou bible

1 TIMOTHY 1

¹I hundampa Pasien le i lamet pa uh Khris Jesu thupiehna tawh Jesu Khris’ sawltahpi keima Paul in,

²upna sungah ka ta tahtah ahi Timothy tungah: Pa Pasien le i TOPA Jesu Khris kung panin hepina, khuotuona le lungnopna om taheh.

³Macedonia gam lam manaw-in ka pei lai-a kang gensa ma bangin Ephesus khuo-ah tam inlen, mi pawlkhat in thuhilna dang khatpo a hil lo nading ule,

⁴upna tawh a kithei Pasien’ vaihawmna[1] ahi lo, kinielna a piengsah thei phuotawm tangmite le mong nei lo khanggui ciemtena po-ah amate a kipumpieh lo nadingun thu na hil thei nadingin kang hanthawn hi.

⁵Ahi vangin tam bang thuhilna’ a tupna pen lungsim siengtho, ei le ei kitheina hoi, le upna tahtah pana a pei itna ahi hi.

⁶Tua itna panin mi pawlkhatte pielmangin a khietna nei lo holimna lamah a kihei vua,

⁷a thugente ule kiptaha a thugente uh telsiem lopi-in Pasien’ thukham hil sie po a suoh nuom na lai uhi.

⁸Tu-in mi khat in thukham pen ahi banga a zah nah leh hoi hi, ci i thei hi.

⁹Tami a ci nopna in thukham pen midihte dinga kibawl ahi sih a, thukham palsatte le thu mang lote, Pasien mi ahi lote le mawneite, a siengtho lote le mi thanghuoite, a nu a pa thatte, tuolthatte,

¹⁰nu le pa mawna a bawlte, pasal le pasal mawna a bawlte, sila zua-a sum bawlte, zuouthu gente, zuouthu tawh a kiciemte a kipanin thuhilna a man tawh a kilebul mite dinga kibawl ahi hi, ci theisiemna ahi a,

¹¹tua pen thupha tawh a kidim a minthang Pasien in keima ei kepsah lungdamna thu tawh a kituoh hi.

¹²Ama’ nasem dingin keima ei se a, mi muonhuoi bangin ei ngaisun ahi ziehin i TOPA Jesu Khris tungah ka lung a dam hi.

¹³Masang lai-in migensie pa, mi bawlsie pa, le mi ngongtat pa ka hi vangin, uplana zieh le theilana zieha a gamta ka hi ziehin khuotuona ka nga a,

¹⁴Khris Jesu sunga a om upna le itna tawh kei adingin i TOPA’ hepina a dimlet hi.

¹⁵Khris Jesu in mawneite hundam dingin leitungah ang pei hi, ci-a kigen pen a man hi a, a unpi-in san dingin kilawm hi, tua mawneite lahah kei a siehuoi pen ka hi hi.

¹⁶Ahi vangin tua thu hang ma-in ama umin kumtawm hinna a nga ding mite’ ette thei dingin Jesu Khris in a gilo pen keima sungah ahi theina za tawh lungduoina ei lah thei nadingin khuotuona ka nga zo ta hi.

¹⁷A si thei lo, a kimu thei lo, le ama beh Pasien ahi, kumtawn Kumpipa tungah patawina le minthanna om zing taheh. Amen.

¹⁸Ka ta Timothy aw, keima in masang lai-a nang tawh kisai genkholna thute tawh kizui-in tami thuhilna kang pie hi. Tua thute zui-in gal dona pha na do thei nadingin,

¹⁹upna le kitheina lungsim hoi nei in. A sie le a pha theina lungsim a nuol ziehun mi pawlkhatte in tembaw kisie bangin a upna uh a kisiesah vua,

²⁰amate lahah Pasien gensiet lo nading a sin dingin Satan tunga ka apsa Hymenaeus le Alexander-te kihal uhi.