Read Zou 1 TIMOTHY 2 Bible Online

1 TIMOTHY 2 - Zou bible

1 TIMOTHY 2

¹Tua ciengin amasa penin note in mi zosie ading ngetnate, thungetnate, thumpiehnate le lungdamkonate na bawl ding uh kang hanthawn hi.

²Eite in Pasien’ mi hina le zatah huoina ah lungmuong tah le kilem tahin i hinkhuo i man thei nadingun kumpite le thunei zosiete adingin thu ngetpieh un.

³Tam pen thudih ahi a, eite’ hundam pa Pasien muna-ah a sanhuoi suohin,

⁴mi vannuoi in hutdamna nga-in, thuman thutah a theikim ding uh ama in a dei hi.

⁵Azieh pen Pasien khat beh a om hi; Pasien le mihingte kikalah zong palai khat beh om a, tua khu mihing ma ahi Khris Jesu ahi hi.

⁶Ama in mi zosie tat nadingin ama le ama kipie a, tua teci panna thu pen a hun lienin kipie hi.

⁷Tami adingin keima tangko pa le sawltahpi dingin ei kise zo a, (zuouthu gen loin thutah[2] a gen ka hi hi), kei pen upna le thutah ah Gentile-te’ siepa ka hi hi.

⁸Tua ahi ciengin mun zosie-a om pasalte in lungthah kisel cite om loin khut siengthote lamto-in thu a nget ding uh ka dei hi.

⁹Tua ma bangin numeite zong opdan siemin puonsil nihten a kituoh a kilawm tawh kizem uheh, samtumna, ahi sihle ngun le kham le puon manham pipite tawh kizepnate nei loin,

¹⁰Pasien ka zatah hi, a ci numeite dinga a kilawm pen ahi nasep hoite tawh kizemzaw un.

¹¹Numei[3] in thumanna bukim tawh sip dide-in thu sin ta uheh.

¹²Numei[4] in pasal[5] tungah thuhilin uhna aana a nei ding ka phal sih hi; ama pen a sip dide ding ahi bo hi.

¹³Bangzieh ahei cile Adam kipiengsah masa a, tua zaw ciengin Eve kipiengsah hi.

¹⁴Adam na kisol lo a, numei na kisolin mawnei na suoh hi.

¹⁵Hizongle numei in opdan siemin upna, itna, le siengthona a nei suoh po leh nau neina tungtawnin ama hutdamin a om ding hi.