Read Zou 1 TIMOTHY 3 Bible Online

1 TIMOTHY 3 - Zou bible

1 TIMOTHY 3

¹Mi khatpo in hlattuom pawlpi sie panmun a lunggul leh nasep thupi sem nuom ahi hi, ci-a na kigen khu thuman ahi hi.

²Hlattuom pawlpi kem siepa pen genbang lo mi, zi khat beh a nei mi,[6] a kideh zo mi, a pilvang mi, a zatahhuoi mi, zindo siem mi, thuhil siem mi,

³zukham lo mi, ngongtat loin a nunnem mi, mi tawh a kihau nuom lo mi, le sumlepai lamah a duhop lo mi hi ding hi.

⁴A innkuon sungah vaihawm siem ding a, sil bangkimah zatahna tawh a tate a thunungsah mi hi ding hi.

⁵Azieh pen mi khat in ama’ innkuon sung vaihawm zie ding a thei sih leh Pasien’ hlattuom pawlpi bangci kep thei ding ahei?

⁶Ama pen a piengtha cil mi hi lo ding hi, tua hi sihle ama kiphasahin dawimangpa ma bangin thukhenna a thuoh ding hi.

⁷Tua tham loin a mindai lo nading le dawimangpa’ thangah a aw lo nadingin a pulam mite’ zatah mi hi pelmaw ding hi.

⁸Tua ma bangin upa dingte zong a zatahhuoi mi, thu a legen kawikawi lo mi, zu hai lo mi, sumlepai lamah a huoiham lo mi hi ding hi;

⁹amate in kitheina lungsim siengtho tawh upna thuthuh tukip ding uhi.

¹⁰A masa-in amate kisittel phot uheh; tua zaw ciengin amau le amau genbang lo a kisah uleh upa sem ta uheh.

¹¹Tua ma bangin numeite[7] zong a zatahhuoi mi, mi gensiet hat lo mi, sil bangkimah pilvangin a muonhuoi mi hi ding hi.

¹²Hlattuom pawlpi upate pen zi khat beh nei mi[8] hi hinlen, a tate le a innkuonpite hoitahin uh ta uheh;

¹³azieh pen hlattuom pawlpi upa hoitaha a semte in mite’ zatahna nga a, Khris Jesu sunga a om upna thu ah zong hangsanna lienpi nga uhi.

¹⁴Na kung vuah ang haw bai dingin ka kilamen a, ahi vangin na kung vuah tam thuhilnate kang giel hi.

¹⁵Kang kiheh khah tah lezong note in thuman thutah’ khuompi le bulkip ahi a hingzing Pasien’ innkuon sungah bangci gamtat ding ci thu na thei ding uh ahi hi.

¹⁶Upla huoi lo a lien mama i biehna thuthuhpi in: Tahsa-in ama hing kilangin, hlagau[9] sungah dih hi, ci-in na kilah a, vantung mite in mu-in, Gentile-te lahah kitangko a, leitung muncin tengah ki-umin, minthanna tawh ama kilato hi.