Read Zou 1 TIMOTHY 4 Bible Online

1 TIMOTHY 4 - Zou bible

1 TIMOTHY 4

¹Tu-in Hlagau in kicientahin a gen thu in, hun nukhia ciengin mi pawlkhat in upna thu taisanin zuou thei hlagaute’ thugen le dawite’ thuhilnate a mang ding uhi.

²Tam banga thuhilna pen sia-emsa tawh a lungsim uh a kihalgawsa zuou thugente’ kineitawmna tungtawna ang pieng ahi hi.

³Amate in kiten kipinate a kham vua, thuman thutah thei-in a um mite in lungdamkona tawh a san zieu ding vua Pasien in a piensah ante a tan nadingun thu a pie uhi.

⁴Azieh pen Pasien’ piensah na vannuoi hoi a, lungdam kona tawh a kisan nah leh niel ding khat zong a om sih hi;

⁵bangzieh ahei cile tuate pen Pasien’ kammal le thungetna tawh a kisiengsahsa ahi hi.

⁶Na zuisa upna thu le thuhilna hoite tawh kiva-in sanggamte kungah tami kithuhilnate na gen nah leh Khris Jesu nasem[10] hoi khat na hi ding hi.

⁷Pasien’ thu tawh a kituoh lo a mothuoi tangmite le pivuoite’ gen tangmite tawh kisaw kha sin. Pasien’ mi hina lamah nang le nang kisin in.

⁸Bang ding ahei cile pumpi kisinna in phattuomna pawlkhat nei a, ahi vangin Pasien’ mi hina in tuhun hinkhuo ding le ang tung ding hinkhuo adingin kamciem a nei ziehin na zosie ah a manpha hi.

⁹Tami pen a buppi-in san dinga a kilawm a muonhuoi thu kigen khat ahi hi.

¹⁰Azieh pen eite in mi zosie, a diehdiehin a um mite’ Hundampa tungah i lametna uh i koi ziehun, tami thu-ah na semin nahpi tahin i hanciem[11] uhi.

¹¹Tami thute hil inlen na hawmsawn in.

¹²Koima in na khangnona kisimmaw sah sinlen, kamhamna, gamtatna, itna, upna le siengthona lamah thu um mite ette dingin na om in.

¹³Kang pei masangin mipite mai-ah Lai Siengtho simna, hanthotna le thuhilnate na pawnthaw in.

¹⁴Kamsanna tungtawnin upate in khutngahna tawh na tunga ang kipie letsong thudon loin om sin.

¹⁵Mi zosie in na khantona a mu thei nadingin tami thute-ah nang mama kipumpiehin kisin in.

¹⁶Nang mama kikepsiemin na thuhilnate-ah pilvangin; tami thute zomsuoh in, bangzieh ahei cile tam banga na bawlna ziehin nangma le na thugen a za mite na hunkhie ding hi.