Read Zou 1 TIMOTHY 6 Bible Online

1 TIMOTHY 6 - Zou bible

1 TIMOTHY 6

¹Pasien’ min le thuhilna a kigensiet lo nadingin sila hahkol nei-a a om zosiete in a pute tungah zatahna zosie pieh tah hi, ci-in ngaisun uheh.

²Thu um mi pu-a a neite in hlattuom pawlpi mi[15] ahina hang utawh amate zatah loin om tuon sih uheh; amau’ nasepna a phattuompite pen thu um mite le a itte uh ma ahi ziehin a hoizaw sema amau’ na a seppieh ding uh hizaw hi.[16]

³Tami tavuonte hilin na hansuo ding hi. Pasien’ mi hina tawh kituohin a siengtho i TOPA Jesu Khris’ thute le thuhilna a sang thei lo mi poma pen

⁴a kihisah ahi a, bangma thei lo mi ahi hi. Tua bang mi poma thu kiselna le kinielna lamah lunggulna man lo a neite ahi uhi. Tua teng panin kithangsietna, kihauna, kigensietna, a hoi lo lama ki-upmawnate,

⁵le lungsim sie nei-in thuman thutah a pom lo, Pasien’ mi hina pen hau theina ding lampi-a a ngaisun mite lahah kihau kiselna lienpi a pieng hi.[17]

⁶Lungkimna tawh a kikop Pasien’ mi hina pen metna lienpi hi tahpi hi.

⁷Bang ding ahei cile eite in leitungah bangma i keng sih vua, tua panin zong bangma i puo thei sih uhi;

⁸hizongle anneh ding le puonsil ding i nei nah po leh tuate tawh i lungkim ding uhi.

⁹Ahi vangin a hau nuom mite pen ze-etna sungah a pua vua, a motvai le a siesah thei lunggulna tampite sungah awhcipin, tuate in sietna le suhsietna sungah a lutpi hi.

¹⁰Bang ding ahei cile sum deigawna in sietna namkim’ zungpi hi a, a hau nop luotna ziehun upna panin mi pawlkhat pielin lungkhamna tampi a thuohlaw uhi.

¹¹Hinanle Pasien’ mipa aw, nang in tam thu zosie na pel in; dihna, Pasien’ mi hina, upna, itna, thuohzawhna, le lungnemna na del in.

¹²Upna galdona hoi na do in; kumtawn hinna na tukip in, tami dinga ang kihlan ahi a, nang in teci tampite mai-ah a hoi pulahna na bawl zo hi.

¹³Na zosie tungah hinna a pie pa Pasien mai le Pontius Pilat mai-ah pulahna hoi bawlin teci a pang pa Khris Jesu’ mit mu-in,

¹⁴i TOPA Jesu Khris ang kilahkia masangsie mawsahna le genbanna om loin a thupiehte na zui nadingin thu kang pie hi.

¹⁵Kumpite’ Kumpi, topate’ TOPA, thupha nga-in Thunei pen pa ahi ama beh in hun a sah ciengin ang piengsah ding hi.

¹⁶Ama beh a si thei lo le a kineh thei lo khuovah sunga a teng pa hi a, koima in ama mu ngai loin zong mu thei lo hi; ama tungah patawina le kumtawn uhna om taheh. Amen.

¹⁷Tu huna mihaute ahile kisathei loin a kicien lo haunate tungah a lametna uh zong nga loin, i lungnop thei nadingin sil bangkim kicing taha ei sih pa Pasien tungah a ngah zawh nadingun amate thu pie in.

¹⁸Amate in sil hoi bawlin a pha tampi sem a, a neisate uh phalna tawh mi a hop thei nading uh ahi hi.

¹⁹Ang tung ding hun adingin amate mama in tua bangin bulkip hoi gougil khat khol uheh, tua hile amate in tua hinna tahtah a tukip thei ta ding uhi.

²⁰Timothy aw, nang tunga ang ki-apsa thute kemsiem in. A siengtho lo kamham le a man lopi-a thu theina a kici kiniel kiselnate na pel in;

²¹bangzieh ahei cile mi pawlkhatte in tua bang pilna nei-in a kingaisut ziehun upna laigil panin a pielmang ta uhi. Note tawh hepina hing om taheh.[18]