Read Zou 2 TIMOTHY 3 Bible Online

2 TIMOTHY 3 - Zou bible

2 TIMOTHY 3

¹Ni nukhia ni ciengin hahsatna hun ang tung ding hi, ci theisiem in.

²Azieh pen mite ahile, amau le amau ki-itte, sum dei luote, a kipumphatte, a kihisahte, mi sietgente, nu le pa thu a mang lote, a lungdam thei lote, a siengtho lote,

³mihing lungsim a kuo lote, itna nei lote, a maisah nuom lote, mi gensiet hatte, sum thangzahte, a ngongtatte, thu hoi huote,

⁴ciempelte, a gamhtatte, a kipum phatsahte, Pasien it ding sanga noptatna a lunggul zawte ahi ding vua,

⁵a puthamin Pasien’ mi hina nei sam napi a vanglietna a nielte ahi ding uhi. Tua mite na pel in!

⁶Bangzieh ahei cile amate lahah mi pawlkhat kinelnelin mi inn ah lutin, a mawna zieh vua lunggulna namcin teng in a suhnawh a tonawh numei mawlawmte manin a thuzaw uhi,

⁷tua bang numeite ahi ule thu a kihilhil vangin thuman thutah a theitel zo ngai lote ahi uhi.

⁸Jannes le Jambres in Moses a langpan ma bangin tam mite in zong thuman thutah a langpang vua, lungsim kisie gawpsa le upna man lo mite ahi uhi.

⁹Ahi vangin amate in ma a sot sih ding uhi, bangzieh ahei cile tua mi nite[4] tungtang thu ma bangin amau’ motna zong mikim tungah kitheisah ding hi.

¹⁰Tu-in nangma in ka thuhilna, ka gamtatna, ka nuntahna-ah ka lungtup, ka upna, ka lungduoina, ka itna, ka thuohzawh hatna,

¹¹bawlsietna ka thuohna, gimna ka thuohna, le Antioch, Iconium, le Lystra khuote ah keima tunga thupiengte na theisa uh ahi hi. Bawlsietna thuoh sam ing ei! Hizongle TOPA in tuate zosie panin ei hunkhie hi.

¹²A tahtahin, Khris Jesu sungah Pasien’ mi hinkhuo a mang nuom zosie pen a kibawlsie ding ma ahi hi.

¹³Ahi vangin migilote le misol hatte sie semsem ding a, midangte a sol bangun amate zong kisol ding hi.

¹⁴Ahi vangin nang na hi leh koi kung pana na sin ahei ci na theisa ahi a, tua na sinsa le kiptaha na upsa silte zom peisuoh in.

¹⁵Jesu Khris upna tungtawnin gupna na nga thei nadingin ang hil Lai Siengtho pen na neu lai-a kipanin bang na ci thei ahei ci thu zong na theisa ahi hi.

¹⁶Lai Siengtho zosie Pasien’ humopsa hi a, thuhil nading, mi phawsiet nading, bawlphat nading, le dihna thu-ah mi pantah nadingin kimang hi.

¹⁷Tua in sil hoi namcin a sem dingin Pasien’ mi zosie pantahin nasep a siem thei nading uh ahi hi.