Read Zou 2 TIMOTHY 4 Bible Online

2 TIMOTHY 4 - Zou bible

2 TIMOTHY 4

¹Pasien mai le a hing laite le a site thukhen dinga ama ang kilaa nading le ama’ kumpi gam ngaisutna tawh Jesu Khris mai-ah lipkhap tahin kang hanthawn hi:

²Pasien’ thu phuongzah in; hun a lemtang a, a lemtang sih zongin kin ngaisut den in; a thu telsah in, phawhin hanthawn inlen, lungduoi tawpna tawh hil in.

³Bangzieh ahei cile mite in kihilna man a ngai nop nawn lo uh hun ang tung ding a, bil thahin amau’ deina beh tawh a kituoh thuhil siete, amate adingin a kaikhawm ding vua,

⁴thuman thutah ngaina panin kihei mangin, phuotawm tangmite ngai-in a vahthap ding uhi.

⁵Pilvang zing in, hamsatna thuoh bembom in, lungdamna thugen nasep sem inlen, tua na nasep a unpi-in muolsuo in.

⁶Azieh pen kei ka hi leh dawnthei biehna banga sun dingin a kithawi sa-in ka om zo a, ka pei ding hun ang tung ta hi.

⁷Galdona pha do zo-in, tai kidemna a mong dongin ka tai zo a, upna thu ka kemcing zo ta hi.

⁸Tu-a kipanin kei adingin dihna lukhu kikoi zo a, tua ni ciengin a dih thukhenpa ahi TOPA in keima ei pie ding hi, kei tung beh hi loin ama ang kilaa ding a lamen mi zosiete tungah zong a pie ding hi.

⁹Keima kungah a mallang theithei-a nang haw nadingin hing hanciem ta’n.

¹⁰Azieh pen Demas in tami leitung a it ziehin keima ei taisanin Thessalonica khuo ah a pei zo hi; Galatia[5] gamah Crescens ama pei zo a, Dalmatia gamah Titus pei zo hi.

¹¹Luke beh tawh a omton ka hi hi. Mark hing ciel inlen hing zawpi ta’n, bangzieh ahei cile ka nasepna ah ama kizang thei mama hi.

¹²Ephesus khuo ah Tychicus ka sawl zo hi.

¹³Nang pei ciengin Troas khuo Carpus kunga ka nuasie ka puontuolpi, laibute zong, a diehdiehin savun laiziel zosie hing puo ta’n.

¹⁴Siakhengpa Alexander in ei nah bawlsiet mama hi; a gamtatna bangin TOPA in thuhkia ding hi.

¹⁵Ama in i thuhilna nahpi-in ei langpan ahi ziehin nang zong ama tungah na kidawm mama in.

¹⁶Keima’ kihutna thu ka gen masah lai-in koima in ei panpi sih a, mi zosie in ei taisan sieng uhi. Tua thu ziehin amate kimawsah da kon heh!

¹⁷Ahi vangin TOPA in ei panpi a, keima tungtawnin Gentile-te zosie in tua thu a zah thei nadingin a bukima ka tangko nading thahatna ei guon hi. Tuaci’n humpi kam sung panin ei kihunkhie hi.

¹⁸TOPA in gitlona tawh ei kidona namcin panin ei hunkhie ding a, ama’ vantung gam adingin ei hundam ding hi. Ama tungah kumtawnin minthanna om taheh. Amen.

¹⁹Prisca, Aquila le Onesiphorus-te innkuon ei na noset pieh in.

²⁰Corinth khuo ah Erastus tam suoh a, Miletus khuo ah Trophimus a cinasa-in ka nuasie hi.

²¹Phalbi masanga nang haw nading hing hanciem ta’n. Eubulus in nang ang noset a, Pudens, Linus, Claudia le sanggamte zosie in zong ang noset uhi.

²²TOPA le na hlagau hing om taheh. Note tawh hepina hing om taheh.[6]