Read Zou PHILEMON 1 Bible Online

PHILEMON 1 - Zou bible

PHILEMON 1

¹Khris Jesu hang tawh thongkie Paul le ka sanggam pa[1] uh Timothy in, ka lawm it ule ka naseppi uh Philemon le

²ka sanggam nu[2] uh Apphia, ka galkappi uh Archippus le nangma’ inna a kikhawm pawlpi tungah:

³I Pasien le TOPA Jesu Khris tung panin hepina le lungmuonna note tungah hing tung taheh.

⁴Ka thungetna ah note[3] kang phaw sielin ka Pasien tungah nuomthu ka tut zing hi.

⁵Bangzieh ahei cile misiengthote zosie na it dan ule TOPA Jesu na upnate uh ka na za hi.

⁶Kote[4] in Khris adingin na hoi zosie ka sep thei lam uh na thei ciengin, na upna na hopsawnna ah a muibut thei nadingin thu kang nget pieh hi.

⁷Ka sanggam pa aw, nang tungtawnin misiengthote’ lungsim thasuosah zo na hi ziehin, keima in na itna tung panin lungdamna lienpi le hanthotna ka na nga tahtah hi.

⁸Tami thu ziehin na tavuon na sep nadingin Khris sungah hang tahin thu hing pie ngam nanleng,

⁹itna bulphu-in kang thumzaw hi. A khangham keima Paul in tulai tahin Jesu Khris adingin thongkie ka hi a,

¹⁰ka thongkieh sunga ama’ pa a suoh keima in ka tapa Onesimus adingin kang thumpieh hi.

¹¹Nidangin nang adingin ama a kizang thei sih a, ahi vangin tu-in nang le kei adingin a kizang thei[5] tahtah ahi ta hi.

¹²Keima’ pumpi za ma-in ngaisunin na kungah ama kang sawlkia hi.

¹³Lungdamna thu zieha ka thongkieh sungin nangma tanga ei kem dingin ka kungah ama ka omsah nuom hi.

¹⁴Hinanle na gamtatna hoite paubawl hi loin nangma’ thu tawh a sem na hi thei nadingin, na thukimpina om lopi-in bangma ka bawl nuom sih hi.

¹⁵Khan tawntungin ama na neikia thei nadinga bakhat sung kikhen pah zong na hi kha thei ding a,

¹⁶tu-in ama pen sila bang hi nawn loin sila sanga thupizaw sanggam it khat ang hita hi, adieh diehin kei adingin ama a manphat ma bangin cilesa sung le TOPA sungah sanggam khat ahina tawh nang adingin manphazaw kan lai ding hi.

¹⁷Tuaci’n na naseppi banga nei ngaisut leh, kei nei san bangin ama zong na sangkia in.

¹⁸Ama in lam khatpopo-ah nangma tunga suhkhiel a nei a, leibat khatpo a nei khah leh keima’ batin na ciemte in.

¹⁹Keima Paul in kang sangkia ding hi, ci thu ka khut mama tawh kang giel ahi hi: Nangma’ pumpi mama nangawn zong kei tunga nei bat hi, ci thu bangma a gen ka hi sih hi.

²⁰Hi hi, sanggam aw, nangma tung panin TOPA sungah tami hamphatna ei ngasah in! Khris sungah ka lungsim hing thasuosah in.

²¹Ei mang dingin kang muong a, kang nget sanga a hoizaw nangawn hing bawl na vateh ci thu thei kawmin lai kang giel hi.

²²Tua banah kei adingin ka zin tunna ding innkhan khat a baisa-in na bawl un, azieh pen na thungetna uh tungtawnin na kung vua ang tung theikia dingin ka kilamen hi.

²³Jesu Khris sungah thong ka kiehpi Epaphras a kipanin,

²⁴ka naseppite ahi Mark, Aristarchus, Demas le Luke in zong ang noset hi.

²⁵TOPA Jesu Khris’ hepina, na hlagau utawh hing om taheh.[6]