Read Zou HEBREW 1 Bible Online

HEBREW 1 - Zou bible

HEBREW 1

¹Tanglai-in Pasien in kamsangte tungtawnin i pu i pate tungah lampi tuomtuom tawh tamveipi thu na gen a,

²ahi vangin tami ni nukhiate ah leitung a bawlpa, sil bangkim a luo dinga a sepa ahi a Tapa tungtawnin eite tungah thu ang gen zo hi.

³Ama in Pasien’ minthanna kilahna le Pasien’ hina bang lien puo a, a vanglien ama’ kammal tawh sil bangkim a tukip hi. Ama in mawnate adingin kisiensuona a bawl zaw ciengin sang pen muna om Vanglienpa’ zietlamah a to hi.

⁴Ama in vantung mite sangin min thupizaw a luo ma bangin vantung mite sanga a tungtuongzaw tham ahi hi.

⁵Bangzieh ahei cile Pasien in vantungmi kungah, “Nang ka Tapa na hi hi; tuni-in kang piengsah zo hi,” a ci ngai ta amah? Ahi sihle khatvei tawh, “Kei ama’ Pa ka hi ding a, ama ka tapa hi ding hi,” a ci ngai amah?

⁶Tua banah leitungah a tacil ang peipi ciengin ama in, “Pasien’ vantungmi zosie in ama bie uheh,” a ci hi.

⁷Vantung mite tawh kisai-in ama in, “Ama in a vantung mite hui suohsah a, ama’ nasemte meikuong a suohsah hi,” a ci hi.

⁸Ahi vangin Tapa tawh kisai-in ama in, “Pasien aw,[1] na kumpi topha kumtawnin om ding a, dihna ciengkhut pen na[2] kumpi gam uhna ciengkhut hi ding hi.

⁹Nang in dihna na it a, gitlona na muda hi; tua ahi ziehin Pasien, na Pasien in nang pen na guolte hlengin kipahna sathau tawh ang nu zo hi,” a ci hi.

¹⁰Tuale, “TOPA aw, a cilin leitung na phut a, vantungte nangma’ khutsuo ahi hi;

¹¹tuate kisie nanle nang na om den ding a, puon bangin tuate zosie a tulmang ding hi;

¹²puontuol bangin tuate kizieltum ding a, puonsil bangin[3] tuate kikhel ding hi. Hizongle nang na kibang den ding a, na kumte tawp ngai lo ding hi,” a ci hi.

¹³Ahi vangin ama in vantung mite koi pen tungah, “Na galte na keng ngahna ka hisah masangsie ka zietlamah to in,” a ci ngai ta ahei?

¹⁴Pasien’ nasepna ah vantung mite zosie[4] pen hutdamna luo ding mite’ nasem dinga kisawl hlate hi lo uh amah?