Read Zou HEBREW 12 Bible Online

HEBREW 12 - Zou bible

HEBREW 12

¹Tua ahi ziehin i kimkot-ah taza taha a tam teci meiilomte in ei tuomcip lang kalsie, vangih zosie le ei gahcip mawnate[44] hemkhie-in i masang vua kikoi tai kidemna-ah thuohzawhna tawh tai ciet vai.

²I upna a piengsah pa le a bukimsah pa, ama mai-a kikoi lungdamna ziehin zumna khawh a sa lo, singlamte tungah gimna thuohin Pasien’ topha zietlamah a to Jesu mittuhna’n nei vai.

³Note lungkie-in na thanem lo nadingun mawnei mite’ huotbawlna a thuoh pa ngaisun un.

⁴Mawna tawh na kidona vuah note in sisan luonna za cieng dongin na do nai sih uhi.

⁵Note in tapate bangin hing hopi-in ang hanthotnate na mangngil ta vua, “Ka ta aw, TOPA ang thuhilna zangkhai ngaisut sinlen, dan ang pieh ciengin zong lungkie sin.

⁶Bang ding ahei cile TOPA in a it mite thuhil a, ama in a san a tate zosie a sat hi,” a ci hi.

⁷Thu ang kihil nadingin gimnate thuoh un. Pasien in tate banga ang bawl uh ahi hi; azieh pen nu le pate’ thu hil lo tapa khu bangci ta ahi ahei?

⁸Tate zosie in a na tuo uh thuhilna na thuoh khah sih vua ahile ta tahtah hi loin zawlta na hi uhi.

⁹Tua tham loin, eite in thu ei hil ding leitung pate i nei vua, amate i zatah uhi. Eite in hlagaute’ Pa thu mangin i hingzaw sam sih ding uh amah?

¹⁰Azieh pen leitunga i pate in bano khat sung adingin hoi a sah pen bangun thu ei hil vua, hinanle Pasien in ama’ siengthona i nga thei nading ule eite hoi nadingin thu ei hil hi.

¹¹Ei kithuhil laitahin nuom kisa loin na kisa mama a, hizongle tua tawh a kisinsa mite in a nua lam ciengin lungmuonna tawh kipawl dihna ga a ga uhi.

¹²Tua ahi ziehin a zaw na khutte uh lamto unlen, a thanem na khupte uh khausah un.

¹³Khelbaite kilawi loin a dam sieng thei nadingin na keng vua dingin lamphei siel un.

¹⁴Mi zosie tawh kilem ding le siengtho ding lam na del un, bangzieh ahei cile siengthona lo tawh koima in TOPA a mu sih ding hi.

¹⁵Pasien’ hepina nga loin koima a op lo nading le, sing zungkha po in buoina piengsah a, tua hangin mi tampi a bua lo nadingin pilvang un.

¹⁶Numei-pasal pahtatna a bawlte, an kam khat tawh innluoza a khawng, le a Pasien mi lo Isau bang koima a op lo nadingin pilvang un.

¹⁷A nua lam ciengin Esau in thupha ngakia nuomin hlitui naptui tawh a suisui vangin kisiakia nading hunpha mu nawn lo ahi ziehin ama kiniel ta hi, ci thu na thei uhi.

¹⁸A kitham thei, meikuong, khuomiel, lungzinna le huipi,

¹⁹pengkul ging, le tua awging a zate in amate tungah tua bang thu a kigenkia lo nadinga a thum vawtna uh mun khat[45] a tung na hi sih uhi.

²⁰(Azieh pen amate in, “Ganhing khat nangawn in tua muolpi a suhkhah leh suong tawh kiseplia ding hi,” ci-a thu kipie pen a thuoh zo sih uhi.

²¹A tahtahin, tua a mu pen khu a cizathuoi seng ziehin Moses in, “Zau-in ka ci tun hi,” na ci hi.)

²²Ahi vangin note pen Zion muol, a hingzing Pasien’ khuopi ahi vantung Jerusalem, simzawh lo pawibawl vantung mite kisuhtuona,

²³vantunga min kikhumsa tapa a ta pente kikhopna mun,[46] mi zosie thu a khen Pasien kung, le a kipicingsah midihte’ hlagau opna,

²⁴thuciemna tha’ palai ahi Jesu kung le Abel’ sisan sanga thu hoizaw a gen sisan kithena mun na tung zo ta uhi.

²⁵Tua thu ang gen pa na niel khah lo nadingun pilvang un; azieh pen leitungah amate in thu hilkhol pa a niel ciengin amate suohta zo lo uh ahile, eite in vantung pana thu ei hil pa niel leih bangza tahin suohta la kan zaw lai ding i hi uh ahei!

²⁶Tua hun lai-in ama’ awging in leitung kithingsah a, ahi vangin tu-in ama in, “Leitung beh kithingsah loin, vantung zong khatvei ka kithingsah ding hi,” ci-in ei kamciem zo hi.

²⁷Tami, “Khatvei tawh” a ci kamteng in a kipiengsah nate ahi a kilawh thei zosie a kipaimang nading le a kilawh thei lote a op suoh thei nading thu a kawh ahi hi.

²⁸Tua ahi ziehin eite in a kilawh zo lo kumpi gam nga zo i hi ziehin i kipah ding vua, tuaci’n eite in zatahna le zauna tawh Pasien tungah san thei biehna i lui ding uhi.

²⁹Azieh pen eite’ Pasien in a haltum thei meikuong ahi hi.