Read Zou HEBREW 2 Bible Online

HEBREW 2 - Zou bible

HEBREW 2

¹Tua ahi ziehin eite i tolmang lo nadingin i zahsa thute nahpi tahin i thudon mama uh kul ding hi.

²Bangzieh ahei cile vantung mite tungtawnin thu kigen pen kip a, tua thute mang loin a palsat mi poma in a kituoh mawna dan thuoh uh ahile,

³tua zataha a lien hutdamna thudon loin om leih bangci bangin suotah thei ding i hei? Tua thu pen TOPA in amasa-in ei gen zo a, a thugen a za mite in eite tungah a thuman ahina ei lah uhi.

⁴Pasien in zong limte, a lamdangte, na lamdang tuomtuomte, le a deina banga a hawm Hlagau Siengtho letsongte tungtawnin tua thu teci a panbe hi.

⁵Eite in i gengen ahi ang tung ding leitung pen Pasien in vantung mite’ khut sungah koi lo hi.

⁶Hizongle mi kimkhat in a teci panna uh mun khatah, “Na ngaisut tham dingin mihing bang hi lel a, na thudon tham dingin mihing tapa bang hi lel ahei?

⁷Vantung mite sangin amate a niemzaw hiau-in na bawl a, minthanna le patawina na khusah a,

⁸a keng nei vuah sil bangkim koi-in na uh sah hi,” ci-in teci kipang zo hi. Tu-in sil bangkim amate uhna nei-ah koi a, Pasien in amate a uhsah lo bangma a om sih hi. Tua hi napi tu tadi-in sil bangkim a uh lam i mu nai sih uhi.

⁹Ahi vangin vantung mite sanga a niemzaw deu dingin bakhat sung a kibawl pah Jesu in Pasien hepina hang tawh mi zosie adingin sina a ciep thei nadingin ama in sina a thuoh ziehin tu-in minthanna le patawina lukhu kikhusah zo hi, ci i mu uhi.

¹⁰Ama ading le ama tungtawnin sil bangkim a piengsah Pasien in ta tampite, minthanna ah a peipi thei nadingin a thuohna tawh hutdamna a bawlcil pa Jesu a bukimsah ding pen a kilawm mawng ahi hi.

¹¹Bangzieh ahei cile a siengthosah pa le a kisiengthosah mite in a unpi-un pa khat beh a nei uhi. Tam thu ziehin Jesu in sanggamte ci-a amate a hlat ding pen maizum lo a,

¹²ama in, “Ka sanggamte tungah na min ka phuong ding a, mihonpi laikimah nangma kang phat ding hi,” a ci hi.

¹³Tuale, “Ama ka muong ding hi,” a cikia hi. Tuale, “Pasien ei piehsa tate tawh tanah ka om hi,” a cikia leuleu hi.

¹⁴Tua ahi ziehin tate pen cilesa nei mite ahi ziehin, ama in zong sina tungtawnin sina vanglietna a nei dawimangpa a suhsiet thei nadingin ama ma zong tua bang ma-in cilesa nei-in ang pieng phot a,

¹⁵si ding a giin ziehun sala a kiman mi zosie a hlakhie hi.

¹⁶Bang ding ahei cile ama pen vangtung mite hu dinga ang pei ahi sih a, Abraham’ suonlehlahte hizaw hi, ci ang kicien hi.

¹⁷Tua ahi ziehin Pasien nasepna sungah mi lainat siem le a muonhuoi siempu lienpa a suo thei nading le, mipite mawna ziehin thoidamna a bawl thei nadingin sil bangkimah a sanggamte banga ang suo ding ma ahi hi.

¹⁸Azieh pen gimna thuohna tawh ama ma na ki ze-et ngai zo ahi ziehin, ama in ze-etna a thuoh mite ei hu thei hi.