Read Zou HEBREW 5 Bible Online

HEBREW 5 - Zou bible

HEBREW 5

¹Mihingte lah panin a kiteel siempu lien poma pen amate tangin Pasien tawh a kisai silte tungah vaipuo ding le, letsongte le mawna zieha biehpiehnate pie ding ahi uhi.

²Amama in thanemna na thuoh ngai zo ahi ziehin thu thei lote le a lungkhau mite lungnem tahin kem thei hi;

³tam thu ziehin ama in ama’ mawnate ading beh hi loin, mipite’ mawna ziehin zong biehpiehna a pieh ding kul hi.

⁴Koima in tua patawina ama thu-in nga thei lo a, Pasien in Aaron a hlat bang tehteha a hlat mite beh in nga thei hi.

⁵Tuaci’n siempu lien pa a suo thei nadingin Khris ama le ama a kipatawi sih a, ahi vangin ama kungah, “Nang ka Tapa na hi hi, tuni-in nang kang piengsah zo hi,” a ci pa in a sesa ahi zaw hi.

⁶Mundang khatah zong ama in, “Melchizedek’ gui zui-in tawntung siempu na hi ta hi,” a ci hi.

⁷Cilesa tawh ama a op hun lai-in Jesu[7] in sina panin a hunkhie thei pa tungah hlitui tawh thungetnate le thumnate nei-in nahpi-in kiko a, tuaci’n zatahna tawh ama’ ki-apnate Pasien in a za hi.

⁸Ama Tapa khat ahi vangin a thuohna tungtawnin thumanna a sin hi;

⁹bukim tahin a kibawl zaw ciengin ama’ thu a mang mi zosie adingin kumtawn hutdamna’ nah suoh a,

¹⁰Melchizedek’ gui zui-in Pasien in siempu lien dingin a se zo hi.

¹¹Tami[8] thu tawh kisai gen ding tampi i nei a, ahi vangin thu tel zo paipai lo na hi ziehun teltahin gen ding a hamsa hi.

¹²Bangzieh ahei cile note tam bang hunah sie na suo ding uh hun ta napi Pasien thutah bulpite ang hil ding mi khat na kisam uhi. Antah hi nai loin nawizu na kisam uhi;

¹³bangzieh ahei cile nawizu a hinpi na lai poma nausen hi lai ahi ziehin dihna thu a theisiem thei sih uhi.

¹⁴Hizongle antah i ci pen sielepha khen nadingin a ngaisutnate uh zangin a kisinsa mi picingte ading ahi hi.