Read Zou HEBREW 6 Bible Online

HEBREW 6 - Zou bible

HEBREW 6

¹Tua ahi ziehin Khris thu a kipat cilna thuhilna lelte nuasie vai-in, picinna[9] lam manaw vai. Pasien upna lam le a sisa nasepnate panin kisiakiana lamah bulkip phut nawn loin,

²baptize-na tawh kisai thuhilna, khut ngahna, misite thawkiana le kumtawn thukhennate bulpat kiakia nawn sih vai.

³Pasien in pha a sah leh tami i bawl[10] ding uhi.

⁴Khatvei khuovah in tanvahin vantung letsong a ciem ngaisa, Hlagau Siengtho sungah satanh nga zo a,

⁵ang tung ding khanghun vanglietnate le Pasien’ thu hoina a ciemsa mite

⁶a pua uleh, amate nopthu tawh Pasien’ tapa khailia kia-in simmaw thuoh dinga a pholah uh ahi ziehin amate adingin kisiakia-in a kipuophat ding uh pieng thei nawn lo hi.

⁷A tunga a kie guotuite hupin angkung posah a, a hlote a phatuomsah leitang in Pasien tung panin thupha a sang hi.

⁸Ahi vangin tua leitang in ling le khau a posah leh kimanna nei lo ahi a, samsiet thuoh bai ding ahi hi; a tawpna ah kihaltum ding hi.

⁹Kang itte aw, tam banga thu i gen vangin, no tawh a kisai hutdamna tawh kizomin sil hoizawte nomau-a’ ahi hi, ci-in ka lung a muong hi.

¹⁰Bangzieh ahei cile Pasien a thutang lo ahi sih hi; ama in na nasepna uh, ama hang tawh[11] misiengthote na vana ule na va lai dingte uh tungah itna na lahnate uh ang kitheimaw bawl sih ding hi.

¹¹Lametna bukim ang tun nadingin note khat ciet in a tawp tanpha-in tua banga hanciemna na lah ciet ding uh kang deisah hi.

¹²Tuaci’n note pen mi thasiete suoh loin, upna le lungduoina tungtawnin kamciem a luote in a ette mite na suo zawh ding uh kang deisah hi.

¹³Pasien in Abraham tungah kamciem a pieh lai-in, ama sanga a lienzaw kiciem nading koima om lo ahi ziehin ama le ama kiciem a,

¹⁴“Thupha kang pie tahtah ding a, kang pungsah ding hi,” ci hi.

¹⁵Tua bangin Abraham[12] in lungduoi tahin a thuoh zaw ciengin tua kamciem nga hi.

¹⁶Amate sanga a lienzaw mi khat’ min tawh mihingte a kiciem vua, tua kiciemna in thu kigen pen kipsahin kithutuna zosie a vengsah hi.

¹⁷Tua ma bangin Pasien in a kamciem a luote tungah a kikhel ngai lo ama’ tupna thute a kicien zaw lai dingin a lah nuom ciengin, ama in kiciemna khat tawh a kipsah hi.

¹⁸Tuaci’n a kikhel thei lo thu nite tungtawnin Pasien in zuouthu a gen ding pen pieng thei lo a, tua pen ama a beel eite in i mai-a kikoi lametna i tuhkip nadingin nahpi tahin i kihanthot thei nading uh ahi hi.

¹⁹Eite in hlagau ading a kicien le a kip tembaw khina siakawi ahi tami upna i nei vua, tua upna in puondal nualam mun siengtho sungah a lut hi.

²⁰Tua munah eite tangin lamsiel pa Jesu na lut zo a, Melchizedek’ gui zui-in tawntung siempu lien a suoh zo hi.