Read Zou HEBREW 7 Bible Online

HEBREW 7 - Zou bible

HEBREW 7

¹Tami Melchizedek kici pen Salem kumpipa, Sangpen Pasien’ siempu hi a, ama in kumpite a zawna panin ang kilekia Abraham na dawnin thupha a pie hi.

²Abraham in zong ama tungah a neisa zosie sung panin sawm-ah-khat a pie hi. A masa penin a min a khietna, “Dihna kumpipa,” hi a, tua banah, ‘Kilemna kumpipa,’ a cina ahi, “Salem kumpipa,” zong ahi hi.

³Ama pen pa nei lo, nu nei lo, khanggui nei lo hi a, hinkhuo kipatna le tawpna zong nei loin, hizongle Pasien’ Tapa tawh kisunin kumtawn siempu-in a om den hi.

⁴En un, ama bangza-a lien ahiei! Pupi Abraham nangawn in a galvan matte panin sawm-ah-khat ama na pie hi.

⁵Siempu za a nga Levi suonlehlahte pen Abraham suonlehlahte ma hi napi, a sanggam a mipite kung panin sawm-ah-khat a kai nadingun thupiehna na nga uhi.

⁶Ahi vangin amate khanggui sungah a kihal lo tam pa in Abraham tung panin sawm-ah-khat na sang a, kamciemnate a nga pa zong thupha na pie lai hi.

⁷A lienzaw pa in a neuzaw pa thupha a pieh pen niel thei ding hi lo hi.

⁸Thu khatah a si thei mihingte in sawm-ah-khat sang uhi; a thudang khatah ama hing hi, ci-a teci panna a nga mi pa in tua sawm-ah-khat a sang hi.

⁹Sawm-ah-khat a sang Levi mama nangawn in Abraham tungtawnin sawm-ah-khat pie hi, kici thei ding hi.

¹⁰Azieh pen Melchizedek in Abraham a vaidot lai-in Levi pen a pupi’ taai sungah omlai hi.

¹¹Levi-te siempu hina tungtawnin kicinna kinga hileh- azieh pen mite in tami siempu hina nei-ah thukham a na nga uh ahi a- bang dingin Aaron gui zui ahi lo, Melchizedek gui zui siempu dang khat a pien ding kisam lai ding ahei?

¹²Azieh pen siempu hina a kikhel ciengin, a thukham zong a kikhel ding kisam hi.

¹³Tu-in tam bang thute a kigenna pa pen maitam-a na a sem ngai lo minam dang sung pan ahi hi.

¹⁴Bangzieh ahei cile i TOPA uh pen Judah minam sung pana ang pieng ahina kitel mama a, Moses in tua minam tawh kisai-in siempute thu bangma a gen sih hi.

¹⁵Melchizedek tawh a kibang siempu dang khat ang pien ciengin tami thu ang kicien deudeu a,

¹⁶tua siempu ang suoh pa pen pumpi tawh kisai a kisam ngainate tungtawna ang suoh hi loin, a kisie thei lo hinna’ vanglietna tungtawna ang pei ahi bo hi.

¹⁷Bangzieh ahei cile, “Nang in Melchizedek gui zui-in kumtawn siempu na hi hi,” ci-in ama thu teci a pang zo hi.

¹⁸Thu khatah thupieh lui thanemin a kizah thei tah lo ziehin kituomkhin zo hi.

¹⁹(Azieh pen thukham in bangma a bukimsah thei sih hi); thu dang khatah eite in Pasien kung i nai thei nadingin a hoizaw lametna khat ei kipie ahi hi.

²⁰Tam pen kiciemna khat tawh kikipsah hi; bangzieh ahei cile siempu a suoh dangte in kiciemna lo tawh siempu za nga ahi uhi,

²¹ahi vangin ama kunga thugen mi khat in, “TOPA kiciem zo a, a lungsim a khel sih ding hi. ‘Nang, tawntung siempu na hi hi,’ ” na ci ahi ziehin siempu ang suoh ahi hi.

²²Tua ahi ma bangin Jesu zong a hoizaw thuciemna kipsah pa ang suoh hi.

²³Tua teng banah sina in amate nasep zopsuoh ding khahtan ahi ziehin siempu masate pen tampi a pha uhi;

²⁴ahi vangin ama hing zing ahi ziehin a siempu za zong a tukip den hi.

²⁵Tua ahi dung zui-in ama tungtawnin Pasien a nai mite a thumpieh dingin hing zing ahi ziehin ama in a tawntungin a hundam thei hi.

²⁶Bangzieh ahei cile a siengtho, paubanna a nei lo, a buabang lo, mawneite lah panin a kikoicing, vantungte tunga a kitawisang tua bang siempu lien pa khat nei ding pen a kilawm mama ahi hi.

²⁷Ama pen siempu lien dangte tawh a kibang sih a, a masa-in ama mawna ading, tua zaw ciengin a mipite mawna adingin nisielin biehpiehna a pieh ding a kisam sih hi; ama in tami pen khatvei beh a bawlna tawh a kimang den dinga a sep ahi ta hi.

²⁸Bangzieh ahei cile thukham in siempu liente dingin a thanem mite se a, hizongle thukham nua-a ang pei kiciemna thu in ahile kumtawnin a bukim dinga kibawlsa Tapa a se hi.