Read Zou HEBREW 9 Bible Online

HEBREW 9 - Zou bible

HEBREW 9

¹Thuciemna masa pen nangawn in biehna-a zah ding ngainate le leitung mun siengtho zong a nei hi.

²Azieh pen puonbuh[17] khat kilam a, a dan masa pen sungah meivah tunna, sabuoi, le Ompina khomun om a, tua pen Siengtho Mun kici hi.

³Puonkhai a nina nualam ah Siengtho Pen a kici puonbuh[18] khat a om hi.

⁴Tua sungah kham tawh a kibawl panamtui hal nading maitam le a kimvel zosie-ah kham tawh a kizut thuciemna singkuong kitung a, tua sungah mana koina kham beel, Aaron ciengkhut meng le thuciemna suongpehte a om hi;

⁵tua tungah minthanna Cherub-te in hepina topha[19] a liesuh uhi. Tu-in tami thute a neng a nawi-in i gen sieng thei sih hi.[20]

⁶Tam bangin kithawi kholnate a kibawl zaw ciengin, amau’ nasep ngai teng sem dingin puonbuh[21] a dan masa sungah siempute a lut ngitnget uhi.

⁷Hinanle a dan nina sungah siempu lien pa kum khatin khatvei beh lut a, thei lona ziehin amama ading le mite mawna adingin sisan tawi-in biehna a pie hi.

⁸Tam thu ziehin puonbuh[22] a dan masa pen a om laisie, mun siengtho lut nading lampi kihong nai lo hi, ci thu Hlagau Siengtho in ei lah hi.

⁹Tami in tuhun ading etsahna lim[23] hi a, letsongte le biehpiehnate a pieh hun sungun a bie mite’ kitheina lungsim a bukimsah thei sih a,

¹⁰tuate pen neh le dawn le baptize-na tuomtuomte, le pumpi tawh kisai ngainate beh hi lel a, puophat hun a tun masangsie zui dingte ahi hi.

¹¹Ahi vangin ang tungsa sil hoite a sem ding siempu lien ahi Khris ang tun ciengin, (khut tawh a kibawl lo, tami a kisiemsa nate ahi lo,) a lienzaw le a bukim[24] puonbuh[25] tungtawnin,

¹²keel le bawngno sisante ahi lo, ama’ sisan tawh a kimang den dingin siengtho munah khatvei beh lut a, tua bangin ama in eite kumtawn tatkhietna ei ngasah hi.

¹³Azieh pen a bua mite tunga a kithe ahi keel si, bawngtang site, le bawnglaa halna vutte in a tahsa uh siengthosah ahile,

¹⁴kumtawn Hlagau[26] tungtawnin paubanna a nei lo, Pasien tunga ama le ama a kipie Khris’ sisan in a si nasepna panin a hingzing Pasien i bieh thei nadingin eite’[27] sielepha theina lungsim bangza tahin siengthosah zawkan lai ding ahei?

¹⁵Tam thu zieh ma-in ama in thuciemna masa[28] nei-a a tawnkhielnate panun amate a tat nadingin sina thuoh zo a hi ziehin, a kihlante in a kikamciemsa tawntung gou a luo thei nadingun, ama pen thuciemna[29] tha palai ang hi ta hi.

¹⁶Sinua gamhluona lai bawlna-ah, tua lai bawlpa a sina thu kipsah phot kul hi.

¹⁷Bangzieh ahei cile tua gamhluona[30] lai a bawlpa a hin laisie tuami lai in thu nei thei lo a, ama a si cieng behin tua gamhluona lai kizang thei pan hi.

¹⁸Tua ahi ciengin thuciemna masa nangawn zong sisan loin kizang thei lo hi.

¹⁹Azieh pen thukham dung zui-in Moses in mi zosie tungah thupiehna vannuoi a gen lai-in, tui tawh bawngno’ si, keelte’[31] si la-in samul puon dupsan, hyssop sungah die-in tuate tawh laiziel le mipi zosie the a,

²⁰“Tam pen Pasien in note adinga a sesa thuciemna sisan ahi hi,” a ci hi.

²¹Tua ma bangin ama in puonbuh[32] le biehpiehna sunga a om vanzahte zosie zong sisan the hi.

²²A tahtahin thukham khut nei-ah na zosie a unpi phielin sisan tawh kisiengsah a, si kibuo loin maw maisahna a om sih hi.

²³Tua ahi ciengin vantung nate’ lim maimaite pen tam bang bawldan ngainate tawh siensuo ding kisam a, ahi vangin vantung nate ahile tamte sanga a hoizaw biehpiehnate tawh siensuo ding kisam hi.

²⁴Azieh pen Khris in a tahtah tawh a kisun maimai, khut tawh a kibawl siengtho pen munah lut zaw loin, Pasien mai-ah eite tanga kilah dingin tu-in vantungah a va lut ta hi.

²⁵Siempu lien pa in ama’ sisan ahi lo ganhing sisan tawh siengtho pen munah kumsiela a lut bangin Khris in ama le ama kum siela a kipieh kiakia ding kisam lo hi;

²⁶kisam hi leh leitung piencil a kipanin tamveipi si zo ding hi. Ahi vangin khang tawpna-ah mawnate a pai dawh dingin ama le ama biehpiehna-in ang kizang a, a tawntung adingin khatvei ang kilang zo hi.

²⁷Mihingte adingin ahile khatvei si ding pen sesa ahi a, tua zaw ciengin thukhenna a om ding hi.

²⁸Tuaci’n mi tampite mawna a puo dingin Khris in khatvei kipie zo a, mawna tawh kisai hi nawn loin, ama lam-enin a ngah mite hunkhie dingin a niveina ang kilah ding hi.