Read Zou JAMES 2 Bible Online

JAMES 2 - Zou bible

JAMES 2

¹Ka sanggamte aw, na mi deidan kawmpi ma-un a minthang i TOPA Jesu a um tahtah ma na hi uh amah?

²Azieh pen na kikhopna sung vuah kham khutsip bun puonhoi sil khat le mizawng puonsie sil khat ang peiton uleh,

³puonhoi sil pa limbawl deu-in, “Tana tona ah hing to in,” na ci vua, tua laitahin mizawng pa kungah “Tuanah na ding phot in,” ahi sihle, “Ka keng[7] gei-ah hing to in,” na tuomci uleh,

⁴no le no sungah kideidanna bawl na hi vua, tuaci’n note pen gitlona lungsim tawh thukhente suoh hi ta lo na hi uh amah?

⁵Kang it sanggamte aw, ngai un. Pasien in leitungah mizawngte pen upna lamah a hau ding le ama a it mite tunga a kamciemsa kumpi gam a luote ahi dingin teel zo hi lo amah?

⁶Ahi vangin note in mizawngte na simmaw bawl uhi. No ang gawtte, mihaute hi lo uh amah? Thukhenna zumah ang kaite zong amate hi lo uh amah?

⁷Note ang kiphuo min ngaipen a gensiete zong amate ma hi lo uh amah?

⁸Lai Siengtho sungah “Nangma na ki-it bangin na vengte na it ding hi,” a ci dung zui-in thukham lienpi na zui zo tahpi uleh a hoi sep na hi ta uhi.

⁹Ahi vangin note in deidanna na nei uleh mawna bawl na hi vua, thukham palsatte ma bangin note zong thukham in maw ang tangsah hi.

¹⁰Bangzieh ahei cile mi khat in thukham zosie a zui sieng vangin khat a zuila leh a unpi-in a khiel ma hi veve hi.

¹¹Azieh pen, “Ang kawm sin,” a ci mipa in, “Tuol that sin,” zong ci hi. Ang na kawm sih vangin tuol na tha leh thukham palsat khat ma na hi veve hi.

¹²Tuaci’n suotahna thukham in thu a khen ding mite bangin thu genin gamta un.

¹³Azieh pen khuotuona a nei lo mi poma tungah khuotuona om loin thu kikhen ding hi; khuotuona in thukhenna tungah a guolzo hi.

¹⁴Ka sanggamte aw, mi khat in upna ka nei hi, a ci vangin gamtatna tawh a lah sih leh bang phattuomna om ding ahei? Upna in ang hundam zo ding amah?

¹⁵Sanggam pa khat ahi sihle sanggam nu khat in sil ding puon nei loin nisiel a neh ding an tasam a,

¹⁶tuale note khatpo in amau’ pumpi kitasapna bangma pie lo pi-in amate kungah, “Nuom tahin na pei un; na khuo uh lumin na gilva un,” mawh ci locin bang phattuomna om ding ahei?

¹⁷Tuaci’n gamtatna a nei lo upna guoh pen a si ahi hi.

¹⁸Hinanle mi pawlkhatte in, “Nang in upna na nei a, ke’n gamtatna ka nei hi,” ci ding uhi. Na gamtatna in a zui lo na upna ei lah inlen, ke’n ka gamtatna tawh ka upna kang lah ding hi.

¹⁹Pasien khat beh om hi, ci na um uhi; na hoi sep hi. Dawite nangawn in umin zau-in a ling uhi.

²⁰Nang mimaw pa aw, gamtatna in a zui lo upna a si ahi lam ang kilah ding na dei ei mah?

²¹I pupi uh ahi Abraham in maitam tungah a tapa Isaac a na pieh lai-in gamtatna tawh dih na tang hi lo amah?

²²Upna in a gamtatna tawh na semton a, gamtatna in upna kicingsah hi, ci note in na thei uhi.

²³Tua ahi ziehin Lai Siengtho sungah, “Abraham in Pasien um a, tua khu ama tungah dihna-in a kisimpieh hi,” a ci thu ang tangtung ta a, ama pen Pasien’ lawmpa kici hi.

²⁴Upna beh tawh hi loin gamtatna tawh mi khat dih kitangsah hi, ci thu note in na thei uhi.

²⁵Tua ma bangin numei pahtat Rahab in zong thukante zin tungsahin lampi dang khatah a sawlkhiet hun lai-in, a gamtatna ziehin dih kitangsah hi lo amah?

²⁶Azieh pen hlagau om lo pumpi a si ahi ma bangin gamtatna om lo upna zong a si ahi hi.