Read Zou JAMES 4 Bible Online

JAMES 4 - Zou bible

JAMES 4

¹Note lahah a om tua bang kidona le kihaunate hei pana ang pei ahei? Noma sunga gal a bawl den ahi lunggulna pana tuate ang pei hi lo amah?

²Na khatpo na deigaw[11] vua, na nei tuom sih uhi; tuaci’n tuol na that uhi. Tuale na khat na deigaw vua, na nga zo sih uhi; tuaci’n kihau-in na kido uhi. Note in na nget lo ziehun na nei sih uhi.

³Na ngen vua, na nga sih uhi, azieh pen note in noptat nadingin na nget khiel ziehun na nga sih uhi.

⁴Angkawmte aw! Leitung tawh kilawmtatna pen Pasien tawh kigalneina ahi lam na thei sih uh amah? Tua ahi ziehin leitung tawh a kilawmta nuom poma Pasien’ gal a suoh hi.

⁵Ahi sihle Lai Siengtho in, “Ama in eite sunga ang tensah hlagau pen Pasien[12] in ngai mama hi,” a ci khu bangma lo a na ngaisut uh amah?

⁶Hizongle ama in a lienzaw hepina ei pie a, tua ahi ziehin, “Pasien in a kisatheite do a, a kiniemkhiehte tungah hepina a pie hi,” ci hi.

⁷Tua ahi ziehin noma ma in Pasien’ thu na mang un. Dawimangpa na do un, tua hile na kung panun a taimang ding hi.

⁸Pasien kung neh un, tua hile ama in zong ang neh ding hi. No mawneite aw, na khut uh silsieng un, no a lungkaa mite aw, na lungtangte uh siensuo un.

⁹Da-in kapin mau un. Na nuina uh dana suoh hinlen, na kipahna uh maigumna suoh taheh.

¹⁰TOPA mai-ah noma le noma kiniemkhieh un, tua hile ama in note ang lamsang ding hi.

¹¹Sanggamte aw, khatlekhat na kigensie sih un. Midang khat a gensie, ahi sihle midang khat tunga thu khen poma thukham gensie ahi a, thukham tunga thu khen ahi hi; thukham tunga thu na khen leh thukham zui pa na hi sih a, thukhen pa na hizaw hi.

¹²Ei hundam thei le ei susie thei thukham pie pa khat le thukhen pa khat a om hi. Tua ahile na veng pa tunga thu a khen nang koi hi viel na hei?

¹³“Tuni ahiei zingcieng ahiei khatin tanah ahi sihle tua khuopite ah pei-in tuanah kum khat sung tamin, van lei van zua-in sumbawlin sum va sui tavai,” a ci note aw, tu-in ka thugen ngai un.

¹⁴Zingcieng bang pieng ding ci thu na thei sih uhi. Na hinna uh bang hi lel ahei? Bang ding ahei cile note pen bano khat sung ang kilaa zaw cienga a thengkia pai tuikhu bang na hi lel bo uhi.

¹⁵Note in, “TOPA’ awina a op leh eite nungta-in, tami ahiei khumi ahiei khat i sem ding hi,” na ci ding uh ahi zaw hi.

¹⁶Tua bangin kiphasahin na kisiel sih un; tua banga kisielnate zosie gitlona ahi hi.

¹⁷Tua ahi ciengin mi khatpo in bang bawl leng a hoi diei ci thei napi-in a bawl sih leh mawna bawl ahi hi.