Read Zou 1 PETER 2 Bible Online

1 PETER 2 - Zou bible

1 PETER 2

¹Tua ahi ziehin gitlona zosie, mi solna zosie, thangsietna le kigensietna zosie paimang un.

²Hutdamna ah na khangliet thei nadingun nausen suohcilte bangin hlagau lam nawizu siengtho na lunggul un.

³Note in TOPA a hoi lam na ciem zo tahtah ta uhi.

⁴Mite in a nuolsa ahi vangin Pasien muna-ah manpha hi, ci-a a teel tua a hing suongpi ahi ama kungah hing pei unlen,

⁵note zong Jesu Khris tungtawnin Pasien’ san thei dingin hlagau tawh kisai biehpiehna a bawl ding le a siengtho siempu nam ahi dingin noma le noma hlagau innpi kilamna-a kizang a hing suongte bang na hi uhi.

⁶Azieh pen Lai Siengtho sungah, “En un, a kiteel a manpha innkiu suong khat, Zion ah ka koi hi, ama a um mi poma kimaizumsah lo ding hi,” kici hi.

⁷Tua ciengin no a um mite adingin ama manpha a, ahi vangin a um lo mite adingin ahile, “Inn lamte’ nilkhiet suong, innkiu suong bulpi a suoh zo hi,”

⁸a cina le, “Amate a kipalsah suong le a puasah suong khat a suoh hi,” a ci hi. Azieh pen amate in thu a man lo ziehun a kipalpua uhi, bangzieh ahei cile tua bang ding ma-a laitansa ahi uhi.

⁹Ahi vangin note na hi uleh khuomiel panin a lamdang ama’ khuovah sungah ang hlan pa’ nasepna lamdangte a phuongzah dinga ang kiteeltuom minam, kumpi siempu nam, a siengtho minam, le Pasien’ mite[1] na hi uhi.

¹⁰Hun khat lai-in minam hi sih nan locin, tu-in Pasien’ mi na hi ta uhi; hun khat lai-in khuotuona nga sih nan locin, tu-in khuotuona na nga zo ta uhi.

¹¹Ka itte aw, na hlagau uh ang do den cilesa’ deinate panin na kideh zo nadingun pemtate le galtaite bangin note tungah kang thum hi.

¹²Gentile-te in sietna bawlte ci-in ang minsietsah vangun, thukhen dinga Pasien ang pei ciengin[2] amate in note’ gamtat hoite mu-in Pasien’ min a phat thei nadingun amate lahah zatah huoi-in na gamta un.

¹³TOPA vang tawh mihingte in a koi aana nei zosie’ thu na mang un. Thunei pen ahi kumpipa’ thu ahi a,

¹⁴a khielte gawtin a dihtatte a phat dinga ama in a sawl uhpite thu ahi zongin na mang un.

¹⁵Bangzieh ahei cile note in sil hoi na sepna uh ziehin bangma thei lo mimawte na sipsah ding uh pen Pasien’ deina ahi hi.

¹⁶A suohta mite bangin nungta un, hizongle gitlo sel nading po-in na suotahna uh na zang sih unlen, Pasien’ nasemte[3] bangin na nungta zaw un.

¹⁷Mi zosie na zatah un. Thu um[4] innkuonte na it un. Pasien zong giingin kumpi pa zong na zatah un.

¹⁸Silate aw, zatahna kici zosie tawh na pute uh’ thu na mang un. A thusiem le a nunnemte’ thu beh hi loin, a gilo na pute uh’ thu zong na mang un.

¹⁹Azieh pen note in Pasien theina tawh a dih lopi-in gentheina na thuoh laitahun na thuoh zawh uleh patahna a nga na hi uhi.

²⁰Na tatkhielna ziehun ang kisat ciengin na thuoh zawh uleh bang patahna om ding ahei? Hizongle note in sil hoi semin gimna na thuoh ciengun na thuoh zawh uleh Pasien’ thukimna a nga na hi uhi.

²¹Tam ding ma-a note ang kihlan ahi hi. Azieh pen Khris in note adingin na thuoh zo a, tuaci’n ama’ ketot teng na zui thei dingun ette ding lim ang nuasie hi.

²²“Ama in mawna bawl lo a, a kam sungah zuouthu kimu lo hi,”

²³Ama a kihosiet ciengin hosietna ma tawh thuhkia lo a, gimna a thuoh ciengin zong koima galgih tuon lo hi; hinanle dih taha thukhen pa tungah ama le ama a ki-apzaw hi.

²⁴Mawnate panin eite suohta-in dihna adinga i nuntah thei nadingin amama in ama’ pumpi tawh singlamte tungah eite’ mawna a puo hi. [5]Ama’ liemnate[6] ziehin note na dam zo ta uhi.

²⁵Azieh pen note tuu bangin lam na piel vua hinanle tu-in na hlagaute uh ang kem le ang cing pa kungah nang kilekia uhi.