Read Zou 2 PETER 1 Bible Online

2 PETER 1 - Zou bible

2 PETER 1

¹Jesu Khris’ nasem[1] le sawltahpi ahi Simeon[2] Peter in, i Pa Pasien le hundampa Jesu Khris’[3] dihna tungtawnin kote’ upna za ma a ngasa mite tungah lai kang hlah hi:

²Pasien le i TOPA Jesu’ thu na theina ziehun note tungah hepina le lungmuonna a kicingin hing tung semsem taheh.

³Ama’ minthanna le a hoinate tawh[4] eite ei hlan, ama i theina tungtawnin i nuntah thei nading le Pasien’ mi i hi thei nadingin ama’ Pasien vanglietna in eite kisapna zosie ei pie zo hi.

⁴Tua bangin ama in eite tungah a manpha le a thupi mama kamciemte ei pie zo a, tua kamciemte tungtawnin lunggulna hang tawh leitunga om kisietnate panin note suohta-in Pasien’ pienzie a neite na suoh ta uhi.

⁵Tami thu zieh ma-in hanciem thei tawpin na upna uh hoina tawh belap unlen, hoina pen thu theina,

⁶thu theina pen ki-uhzawhna, ki-uhzawhna pen thuohzawhna, thuoh zawhna pen Pasien’ mi hina,

⁷Pasien’ mi hina pen khatlekhat ki-itna, khatlekhat ki-itna pen itna tawh na belap un.

⁸Bangzieh ahei cile tami nate pen nomau-a’ hi a, note lahah tamte ang khan semsem leh i TOPA Jesu Khris’ theitelna-ah kimanna nei lona le a ga galonate panin ang kem ding uhi.

⁹Azieh pen tami nate a nei lo poma muna tom le mittaw hi a, a mawna luite pana a kisiensah zo lam a mangngil ahi uhi.

¹⁰Tua ahi ziehin sanggamte aw, note ang kihlatna le ang kiteelna a kip nading na hakat semsem un, azieh pen tam banga na bawl uleh na pua ngai sih ding uhi.

¹¹Tam bang ziehin i TOPA le i Hundam pa uh Jesu Khris’ tawntung gam sungah lut thei nading thu a kicing tahin note ang kipie ding hi.

¹²Tua ahi ziehin note in na theisa ule na kung vua ang tungsa thuman thutah sungah a kip a khosa hinan locin, tam thute ang phawhsah kiakia sawm ka hi hi.

¹³Tami pumpi[5] sunga ka op laisie, tam thute kang phawsahkia ding pen thuman hi, ci-in ka ngaisun hi.

¹⁴Keima tungah i TOPA Jesu Khris in teltahin ei lahsa ma bangin ka sina[6] ding ang tung bai ta ding hi, ci ka thei hi.

¹⁵Kei ka peikhiet zaw ciengin note in tam thute na phawh den thei nadingun ka hi thei tawpin ka hanciem ding hi.

¹⁶Bangzieh ahei cile na kung vuah i TOPA Jesu Khris’ vanglietna le ang peikia nading thute kang theisah lai-un, pilvai tawh a kiphuotawm tangmite’ nua po a zuite hi loin, ama’ thupina mit tawh a mute ka hizaw uhi.

¹⁷Bangzieh ahei cile Vanglien Minthang Pa in, “Tam pen ka it ka tapa ahi hi, ama tungah ka lung a kim mama hi,” ci-in tua aw a gin lai-in ama in Pa Pasien tung panin patawina le minthanna a sang hi.

¹⁸Ama tawh muol siengtho tungah ka opton laitahun koma mama in vantung pana ang pei tami awging ka za uhi.

¹⁹Tuaci’n kote in a kipzaw lai ahi kamsangte’ thugen ka nei uhi. Na lungsim sung vuah zingsol hing suohin khuo ang va masangin khuomiel lahah meivah tang bangin tam thute thupi sim locin hoi ding hi.

²⁰A masa penin note in na tel ding uh thu in: Lai Siengtho sunga genkholna thu poma mi khat guoh’ dei banga lekhiet thei hi lo hi.

²¹Bang ding ahei cile genkholna khat zong mihing’ deina tawh a pieng ngai sih a, Hlagau Siengtho’ sawlna tawh numei pasal in Pasien kung pana ang pei thute a gen uh ahi zaw hi.[7]