Read Zou 1 JOHN 2 Bible Online

1 JOHN 2 - Zou bible

1 JOHN 2

¹Ka tanote aw, na maw khah lo nadingun tam thute ang giel ka hi hi. Hizongle mi khatpo in mawna a bawl leh eite in Pa tawh a omton hupa Jesu Khris i nei uhi;

²ama pen eite ading beh hi tham loin leitung mi zosie’ mawsut nading biehpiehna zong ahi hi.

³Tu-in ama’ thupiehte i zui leh ama thei i hi lam uh i kitheicien uhi.

⁴Mi khatpo in, “Ama ka thei zo hi,” a ci vangin ama’ thupiehte a zui tuon sih leh zuouthu gen mi ahi a, tua pa sungah thuman thutah a om sih hi;

⁵hinanle ama’ thu a zui mi khatpo sungah Pasien’ itna a bukimin a tung tahtah zo hi. Tami thu ziehin eite in ama sunga i op lam i theicien uhi:

⁶“Ama sungah ka teng hi,” a ci poma in Jesu Khris gamtat banga a gamtat ding ahi hi.

⁷Ka itte aw, tu-a kang giel pen thupieh tha ahi sih a, a kipat cil pana na neisa uh thupieh lui pen ma ahi bo hi; tua thupieh lui pen na zahsa uh thu ahi hi.

⁸Ahi vangin keima in ama tung le note tungah thupiehna tha a maan ang giel ka hi hi. Azieh pen[2] khuomiel vengin khuovah tahtah ang tang zo ta hi.

⁹“Khuovah sungah ka om hi,” ci napi a sanggampa a muda poma khuomiel sunga omlai ahi hi.

¹⁰A sanggampa a it poma khuovah sunga teng ahi a, tua bang mi[3] sungah pua nading a om sih hi.

¹¹Hinanle thu um mi adang khat a muda poma khuomiel sungah omin khuomiel sunga lam pei ahi a, khuomiel in ama mittawsah ahi ziehin a pei nading lampi a thei sih hi.

¹²Tanote aw, ama’ min hang tawh na mawnate uh kimaisah zo ahi ziehin, note lai kang hlah hi.

¹³Pate aw, a cil a kipanin a om pa, na thei ziehun note lai kang hlah hi. Khangnote aw, gilopa na zaw ziehun note lai kang hlah hi.

¹⁴Tanote aw, Pa na thei ziehun note lai kang hlah hi. Pate aw, a cila a om pa na thei ziehun note lai kang hlah hi. Khangnote aw, na tha uh hat a, na sung vuah Pasien’ thu tengin, gilopa zozo na hi ziehun note lai kang hlah hi.

¹⁵Leitung le leitunga om nate it sih un. Leitung a it mite sungah Pa itna om lo hi;

¹⁶azieh pen leitunga om sil bangkim, cilesa lunggulna, mittang’ deigawna, hauna zieha kisahtheina, cite pen Pasien kung pana ang pei ahi sih a, leitung pana ang pei hizaw hi.

¹⁷Leitung le a deigawna mangthai thei a, hinanle Pasien’ deina banga gamtate kumtawnin a kip den hi.

¹⁸Tate aw, tuhun pen hun nukhia ahi ta hi! Khris langpang ahi antikhris ang pieng ding hi, ci thu na zahsa uh ahi ma bangin, tu-in antikhris tampitah ang pieng zo hi. Tami panin eite in hun nukhia ahi lam i thei uhi.

¹⁹Amate pen ei kung pana a peikhie ahi uhi, ahi vangin amate ei pawl ahi sih uhi; ei pawl hi uleh ei tawh ang omton peisuoh ding uhi. Ahi vangin a peikhietna panun amate khat mama zong ei pawl ahi lo lam ei theiciensah hi.

²⁰Ahi vangin Siengtho Pa in note sathau ang nu zo ta a, tuaci’n note zosie in theina[4] na nei uhi.

²¹Thuman thutah na thei lo zieh uh hi loin, na thei zieh ma ule tua thuman thutah panin zuouthu a pien lo lam na thei zieh vua ang giel ka hizaw hi.

²²Jesu pen Khris[5] ahi hi, ci-a a nielte simlo zuou thugen i cite koi ahei? Pa le Tapa a niel mite pen antikhris ahi uhi.

²³Tapa a niel koima in Pa a nei sih a, Tapa a sang mi zosie in Pa a nei uhi.

²⁴Note in a cil a kipanin na zahsa uh thute na sung vuah tengsah un. Note in a cil a kipanin na zahsa uh thute na sung vua a ten leh Pa le Tapa sungah zong na teng ding uhi.

²⁵Tuale tam pen ama in eite[6] ei ciemsa tawntung hinna ahi hi.

²⁶Note ang sol mite tawh kisai-in na kung vuah tam thu teng ang giel ka hi hi.

²⁷Note na hi uleh na sung vuah ama tung pana na nga uh sathau nuna a op den ziehin ang hil ding mi koima na kisam sih uhi. Ahi vangin tua sathau nuna in note thu zosie ang hil bangin tua ang hil thute thuman ahi a, tua pen zuouthu ahi lo ziehin ang hil bang lienin ama[7] sungah teng un.

²⁸Ka tanote aw, ama ang kilah ciengin eite in kimuonna nei-in ama ang pei ciengin ama mai-ah i maizum lo nadingin tu-in ama sungah teng un.

²⁹Note in ama dih hi, ci-a na thei uleh sil dih bawl zosie ama’ piensah ahi hi, ci na thei uhi.