Read Zou 1 JOHN 3 Bible Online

1 JOHN 3 - Zou bible

1 JOHN 3

¹Pasien’ tate ei kici thei nadingin bangza tahin Pa in ei it ahei ci thei un; eite zong lah tua ma i hi pai uhi. Leitung in eite ei thei lona a hang pen ama a thei lo zieh ahi hi.

²Ka itte aw, tu-in Pasien’ tate i hi ta uhi; mai lamah bang hi lai ding i hei, ci ei kilah nai lo hi. Eite’ thei thu pen tami ahi hi: Ama[8] ang kilah ciengin ama tawh i kibang ding uhi, bangzieh ahei cile eite in ama ahi bangin i mu ding uhi.

³Ama sungah tami lametna a nei zosie in ama’ sientho bang lienin amau le amau zong siengtho uheh.

⁴Mawna a bawl poma thukham palsat ahi hi; mawna pen thukham palsatna ahi hi.

⁵Mawna lakhie dingin ama ang kilang hi, ci thu le ama sungah mawna om lo hi, ci thu na thei uhi.

⁶Ama sunga a teng koima in mawna a bawl sih hi; mawna a bawl mi koima in ama a mu lo le a thei lo ahi hi.

⁷Tanote aw, koima in kisolsah sih un. Ama a dih bang lienin a diha gamta mi poma midih ahi hi.

⁸Mawna a bawl poma dawimangpa’ ta ahi hi; bangzieh ahei cile a kipatcil a kipan dawimangpa pen mawna bawl ahi hi. Dawimangpa’ nasepte a susie dingin Pasien’ Tapa ang kilang hi.

⁹Pasien’ piensah mite in mawna a bawl sih uhi, bangzieh ahei cile amate sungah Pasien’ khaici a teng hi; Pasien’ piensah mite ahi ziehun amate in mawna a bawl thei sih uhi.

¹⁰Tam bang danin Pasien’ tate le dawimangpa’ tate a kilang hi: A dihin gamta loin a sanggamte[9] a it lo zosie pen Pasien kung pana ang pei ahi sih hi.

¹¹Note in a kipat cila kipanin na zahsa uh thu ahile khatlekhat i ki-it nading thu ahi hi.

¹²Gilopa kung pana ang pei a naupa a that Cain i bang sih ding uhi. Tuale bang dinga a sanggam pa a tha ahiei? Azieh pen ama gamtat sie-in a sanggampa a gamtat a dih zieh ahi hi.

¹³Sanggamte aw, leitung in ang muda leh lamdang sa sih un.

¹⁴Eite khatlekhat i ki-it ziehin sina kantanin hinna ah i galkai zo ta hi, ci thu i thei hi. Itna a nei lo poma pen sina sunga a omlai ahi hi.

¹⁵A sanggam muda zosiete mi that ahi a, mi thatte in tawntung hinna a nei lo lam na thei uhi.

¹⁶Ama in eite adingin a hinna ei pieh ziehin tuami tawh itna thu i thei uhi. Eite zong khatlekhat i hinna uh i kipieh ding a kilawm ahi hi.

¹⁷Leitung’ haunate nei-in a sanggam khat’ kisapna mu giagua napi a hu nuom lo mi khatpo sungah bangci bangin Pasien’ itna om thei ding ahei?

¹⁸Tanote aw, thu le kam beh tawh ki-it loin, thutah sungah sepna tawh ki-it vai.

¹⁹Tuale tami thu ziehin eite pen thutah pana pieng i hi vua, i lungtang in eite ei mawsah sielin ama mai-ah i lung a nuomsahkia dingte i hi lam i thei ding uhi. Bangzieh ahei cile i lungtang sangin Pasien lienzaw a, ama in sil bangkim a thei hi.

²¹Ka itte aw, i lungtang in ei mawsah sih leh Pasien mai-ah eite in hanna i nei uhi.

²²Eite in ama’ thupiehte zui-in ama lungkim nading i gamtat ziehin ama tung panin i nget popo i nga uhi.

²³Ama’ thupiehna tami ahi hi. Ama’ tapa Jesu Khris’ min i up ding le ama’ ei sawlna bang lienin khatlekhat i ki it ding ahi hi.

²⁴Ama’ thupiehte a zui zosie ama sungah teng a, ama zong tua mite sungah a teng hi. Tuale eite sungah ama a ten lam pen ama’ ei pieh Hlagau tawh i theithei uhi.