Read Zou 1 JOHN 5 Bible Online

1 JOHN 5 - Zou bible

1 JOHN 5

¹Jesu in Khris[10] ahi hi, ci-a a um poma Pasien’ piensah mi hi a, nulepa a it poma in zong a ta a it hi.

²Pasien itin ama’ thupiehte i zui ciengin eite in tami tawh Pasien’ tate i it lam i thei uhi.

³Azieh pen Pasien i itna i ci in ama’ thupiehte i zuina ahi hi. Ama ei thupiehte zong a zuiha ahi seng sih hi.

⁴Bangzieh ahei cile Pasien’ piensah mi poma in leitung a zo hi. Leitung a zo guolzawna i ci pen eite’ upna ahi hi.

⁵Jesu in Pasien’ Tapa hi, ci-a a um mi simlo leitung a zo koi ahei?

⁶Tui le sisan tawh ang pei pa in Jesu Khris ahi a, tui beh tawh hi loin, tui le sisan tawh ang pei hi. Tua teci pang pa pen Hlagau ahi hi, azieh pen tua Hlagau pen thuman thutah ahi hi.

⁷Teci pang[11] thum a om hi:

⁸Tua teng pen Hlagau, tui le sisan ahi a, tami thum teng a kithutuoh uhi.

⁹Eite in mihing teci panna sang thei i hi leh Pasien’ teci panna pen a lienzaw ahi hi. Azieh pen Pasien in tu-a bangin a Tapa’ thu teci a pang hi.

¹⁰Pasien’ tapa a umte in a lungsim sung vuah teci panna a nei uhi. Pasien[12] a um lote in Pasien in a tapa tungtang teci a panna um lo uh ahi ziehin ama zuougen a suohsah uhi.

¹¹Tuale tami pen teci panna ahi hi: Pasien in eite kumtawn hinna ei pie a, a Tapa sungah tami hinna a om hi.

¹²Tapa a nei poma in hinna a nei hi; Pasien’ tapa a nei lo poma in hinna a nei sih hi.

¹³Pasien tapa’ min a um note in kumtawn hinna na nei lam uh na thei nadingun note tungah tami thute kang giel hi.

¹⁴Ama sunga i nei uh lungmuonna pen tami ahi a, eite in ama’ deina tawh kituohin na khatpo i nget nah leh ama in ei za hi.

¹⁵I nget khat popo ei za hi, ci i thei leh ama kunga i nget popo i nga zo hi, ci i thei hi.

¹⁶Na sanggampa in sina dong ding ahi lo mawna a bawl na mu leh thu na nget pieh ding a, Pasien[13] in sina dong ding ahi lo mawna bawlte tungah hinna a pie ding hi. Sina dong a tun mawna a om hi; tuate adingin thu nget pieh in a ci ka hi sih hi.

¹⁷Gamtat khielna zosie mawna hi a, hinanle sina a tun lo mawna a om hi.

¹⁸Pasien’ piensah mite in mawna a bawl sih hi, ci thu eite in i thei a, Pasien’ piensah mipa in amate kemcing ahi ziehin gilo pa in amate a thamkha sih hi.

¹⁹Pasien’ tate i hi lam le gilopa’ uhna sungah leitung mi zosie a op lam eite in i thei hi.

²⁰Eite in ama a thuman[14] ahi lam i thei nadingin Pasien’ Tapa hing pei zo a ci le theitheina ei pie zo ci zong i thei hi; eite i hi uleh tua a thuman a Tapa Jesu Khris sungah i om uhi. Ama pen a thuman Pasien le tawntung hinna ahi hi.

²¹Ka tanote aw, milimte panin no le no na kikem un.[15]