Read Zou THUKHENTE 1 Bible Online

THUKHENTE 1 - Zou bible

THUKHENTE 1

¹Joshua a si zaw ciengin TOPA kungah Israel-te in thu a dong vua, “Canaan-te sim dingin koi kuonto masa ding ka hi uh ahei?” a ci uhi.

²TOPA in, “Judah kuonto ding hi. Ama’ khut sungah tua gam ka pie hi,” a ci hi.

³Judah in a sanggam Simeon kungah, “Canaan-te sim dingin kei ei kipie gamah ei zui to in; kei zong nang ang kipie gam sungah kang zui ding hi,” a ci hi. Tuaci’n Simeon in ama a zui hi.

⁴Tua ciengin Judah kuonto a, TOPA in a khut sung vuah Canaan-te le Periz-te a pie hi; tuale amate in Bezek khuo-ah mi tul sawm a that uhi.

⁵Amate in Bezek-ah Adoni-bezek a tuoh vua, tuale ama tawh kido-in Canaan-te le Periz-te a zo uhi.

⁶Adoni-bezek a tai hi; ahi vangin ama delin a man vua, a khutpi gel le a kepi gel a tansanpieh uhi.

⁷Adoni-bezek in, “A khutpi le a kepi a kitansan kumpi sawmsagite in ka sabuoi nei-a annengkiete tung ngai uhi; ka gamtatnasa bangin Pasien in kei ei thuh hi,” a ci hi. Amate in Jerusalem ah ama a peipi vua, tuale khum munah ama a si hi.

⁸Tua ciengin Judah mite in Jerusalem khuo simin a la uhi. Amate in namsau tawh vatin mei tawh khuopi a hal uhi.

⁹Tua zaw ciengin Negeb gam sunga muoltung gam, le lei ngiemna sunga teng Canaan-te sim dingin Judah mite a kuonsuh uhi.

¹⁰Hebron (Hebron min pen nidanglai-in Kiriath-arba kici) a teng Canaan-te sim dingin Judah a kuon hi; tuale amate in Sheshai, Ahiman, le Talmai a zo uhi.

¹¹Khum mun panin Debir (Debir min pen nidang lai-in Kiriath-sepher kici) a tengte sim dingin a pei uhi.

¹²Tua ciengin Caleb in, “Kiriath-sepher simin a la zo poma a zi dingin ka tanu Achsah ka pie ding hi,” a ci hi.

¹³Tuale Caleb’ naupa Kenaz’ tapa Othniel in tua khuo la hi; tuale ama in a zi dingin a tanu Achsah a pie hi.

¹⁴Ama kungah tua nu a tun ciengin a pa kungah lo khat a nget nading tua nu a hasawl hi. A laa tung panin tua nu a kum ciengin Caleb in ama kungah, “Bang dei na hiei?” a ci hi.

¹⁵Tua nu in ama kungah, “Letsong khat ei pie in; Negeb gam sungah keima nei koi ngalin Gulloth-mayim[1] zong ei pie vet in,” a ci hi. Tuaci’n Caleb in zong Gulloth Tungnung le Gulloth Neinung a pie hi.

¹⁶Moses’ sungpa Ken minam Hobab’[2] suonlehlahte, Arad gei Negeb gama om Judah-te’ senel gamah Judah mite tawh lutu khuopi panin a peito vua, Amalek-te[3] tawh a tengton uhi.

¹⁷A sanggam Simeon tawh Judah peiton a, Zephath-a teng Canaan-te zo-in a khuopi a susie uhi. Tuaci’n khumi khuopi’ min Hormah kici hi.

¹⁸Judah in Gaza le a gam, Ashkelon le a gam, Ekron le a gamte a la hi.

¹⁹TOPA in Judah ompi hi, tuale ama in muoltung gam teng luo a, ahi vangin zang gama tengte delmang zo lo hi, azieh pen amate in sia sakol leeng nei uhi.

²⁰Moses in a gensa bangin Caleb tungah Hebron kipie hi; tuale ama in khum panin Anak’ tapa thumte a delmang hi.

²¹Hinanle Benjamin-te in Jerusalem-a teng Jebus-te na delmang lo uhi, tuaci’n tuni dongin Benjamin-te tawh Jerusalem ah Jebus-te tengton uhi.

²²Bethel sim dingin Joseph’ innkuonte a kuonto uhi; tuale TOPA in amate a ompi hi.

²³Joseph’ innkuonte in Bethel (tua khuopi min pen nidang lai-in Luz kici) ah thukante a sawl uhi.

²⁴Thukante in khuopi pana a pusuoh mi khat a mu ciengun ama kungah, “Khuopi lutna lampi ei lah in, hoitahin kang bawl ding uh,” a ci uhi.

²⁵Tuaci’n ama in khuopi sung lutna lampi amate lah hi; tuale amate in tua khuopi namsau tawh a vatmai vua, ahi vangin tua mipa le a innkuonte a suohtasah uhi.

²⁶Tuaci’n Hit-te gamah tua mipa pei-in khuopi khat sat a, a min Luz ci-in a phuoh hi. Tuni dongin a min kici suoh hi.

²⁷Manasseh in Beth-shean le a khuoneute-a tengte, Taanach le a khuoneute-a tengte, Dor le a khuoneute-a tengte, Ibleam le a khuoneute-a tengte, Meggido le a khuoneute-a tengte a delmang lo ziehin khum gam sungah Canaan-te a teng suoh uhi.

²⁸Israel-te a thahat ciengun Canaan-te thona-aana nasep a semsah vua, ahi vangin amate a delmang sih uhi.

²⁹Ephraim-te in Gezer-a teng Canaan-te a delmang sih uhi; hizongle Gezer-a amate lahah Canaan-te a teng uhi.

³⁰Zebulun-te in Kitron-a tengte ahi a, Nahalol-a tengte ahi zongin a delmang sih uhi; ahi vangin amate lahah Canaan-te tengin thona-aana nasemte a suoh uhi.

³¹Asher-te in Acco-a tengte, Sidon-a tengte, Ahlab-a tengte, Akzib-a tengte, Helbah-a tengte, le Aphik-a tengte, Rehob-a tengte a notmang sih vua,

³²hizongle khum gama teng Canaan-te lahah Asher-te a teng uhi; bangzieh ahei cile amate in a delmang sih uhi.

³³Naphtali-te in Beth-shemesh a tengte, Beth-anath a tengte notmang loin khum gama om Canaan mite lahah a teng zaw uhi; hizongle Beth-shemesh a tengte, Beth-anath a tengte pen amate dingin thona-aana nasemte a suoh uhi.

³⁴Amor-te in muoltung gamah Dan-te a notkia vua, zang gamah a peisuhsah sih uhi.

³⁵Har-heres, Aijalon, le Shaalbim-ah Amor-te a teng suoh vua, hizongle a tung vuah Joseph innkuonte’ khut gihtahin kinga-in thona-aana nasemte a suoh uhi.

³⁶Amor-te’ gamgi pen Akrabbim katona panin Sela le a tunglam teng pana kipan ahi hi.