Read Zou THUKHENTE 11 Bible Online

THUKHENTE 11 - Zou bible

THUKHENTE 11

¹Tu-in Gilead-te ahi Jephthah pen a thahat galhang khat hi a, numei pahtat khat’ tapa ahi hi. Jephthah’ pa pen Gilead ahi hi.

²Gilead’ zi in zong ama tawh tapate nei hi; tuale a zi’ tapate a gol ciengin Jephthah a not dawh vua ama kungah, “Nang in i pa inn sungah bangma gou na luo sih ding hi; azieh pen nang numei dang khat’ tapa na hi bo hi,” a ci uhi.

³Tua ciengin a sanggamte kung panin Jephthah taimang a, Tob gamah a teng hi. Jephthah kungah mi ginalo teng a kikhawm vua, ama tawh mi bulu dingin a kuon uhi.

⁴Hun tomkal khat zaw ciengin Ammon-te in Israel-te sim uhi.

⁵Ammon-te in Israel-te a sim ciengun Tob gam panin Jephthah la dingin Gilead upate a pei uhi.

⁶Jephthah kungah, “Ammon-te i do thei nadingin hing pei inlen ka lamkai-un hing pang in,” a ci uhi.

⁷Ahi vangin Jephthah in Gilead upate kungah, “Kei ei nuolin ka pa inn sung pana ei notmang no teng ma hi lo na hi uh amah? Tuaci’n tu-in na lungkham ciengun bang dinga kei kunga hing pei na hi uh ahei?” a ci hi.

⁸Gilead upate in Jephthah kungah, “Bang bang ahi ta zongin tu-in nang lama ang kihei ka hi ta uhi. Kote tawh hing zawhton inlen Ammon-te do vai-in tuaci’n kote le Gilead-a teng mi zosie’ lutangin hing pang in,” a ci uhi.

⁹Jephthah in Gilead upate kungah, “Ammon-te tawh kido dinga inn lamah nei peipikia vua, TOPA in kei tungah amate ei pieh leh na lutang uh ka hi ding hi,” a ci hi.

¹⁰Gilead upate in Jephthah kungah, “I kikal vuah TOPA teci hi ding hi; na ci bangin ka gamta tahtah ding uhi,” a ci uhi.

¹¹Tuaci’n Gilead upate tawh Jephthah pei a, mite in amate tungah lutang le makai-in ama a koi uhi; tuale Jephthah in tam thu zosie Mizpah khuo-a TOPA mai-ah a gen hi.

¹²Tua ciengin Jephthah in Ammon-te’ kumpipa kungah kamtaite sawl a, “Ka gam sim dingin kei kunga nang pei nadingin kei le nang kikalah bang thu om ahei?” a cisah hi.

¹³Ammon-te’ kumpipa in Jephthah’ kamtaite dawngin, “Egypt panin Israel-te ang pei lai-in Arnon pan Jabbok le Jordan cieng ka gam ei lahpieh zieh ahi hi; tua ahi ziehin tu-in thudamin ei piekia in,” a ci hi.

¹⁴Jephthah in Ammon-te’ kumpipa kungah kamtaite sawlkia a,

¹⁵“Jephthah in tam bangin ci hi: Israel-te in Moab gam hitale Ammon gam hitale lahpieh lo hi,

¹⁶ahi vangin Egypt panin amate ang peito lai-un senel gam tawnin San Tuipi[43] ah hing pei-in Kadesh ang tung uhi.

¹⁷Tua ciengin Israel-te in Edom kumpi kungah kamtaite sawlin, ‘Na gam ei nawhsah in,’ a cisah uhi, hinanle Edom kumpipa in a thu ngai lo hi. Amate in Moab kumpipa kungah zong a sawl vua, hizongle ama a thukim sih hi. Tuaci’n Kadesh ah Israel-te a om uhi.

¹⁸Tua ciengin senel gam tawnin khuol a zin vua, Edom gam le Moab gam kimvelin pei-in Moab gam nisuona lampangah a tung vua, Arnon galkhatah phuol a sat uhi. Arnon gun pen Moab gamgi ahi ziehin Moab gamah a lut sih uhi.

¹⁹Tua ciengin Israel-te in Heshbon-a kumpi a sem Amor-te’ Kumpi Sihon kungah kamtaite sawl hi; tuale Israel-te in ama kungah, ‘Ka gam uh zuon dingin na gam ei nawhsah in,’ a ci uhi.

²⁰Ahi vangin a gam nawh dingin Sihon in Israel-te a muong sih hi. Tuaci’n Sihon in a mite zosie kaikhawmin Jahaz-ah giephuol satin Israel-te tawh a kido uhi.

²¹Tua ciengin TOPA, Israel-te’ Pasien in Israel-te khut sungah Sihon le a mipi zosie pie a, amate in a zo uhi; tuaci’n Israel-te in khum gam sunga teng Amor-te’ leitang zosie a luo uhi.

²²Arnon gun panin Jabbok lui cieng le senel gam panin Jordan gun cieng, Amor-te’ gam zosie a luo uhi.

²³Tuaci’n tu-in TOPA, Israel-te’ Pasien in ama’ mi Israel-te hamphat nadingin Amor-te a zo hi. Nang in amau’ mun lahpieh sawm na hi amah?

²⁴Na nei dinga na Pasien Chemosh in ang piehte nei zaw lel lo ding na mah? Ko phattuom nadinga TOPA ka Pasien un a na zawsa na zosie a luo dingte hi lo ka hi uh amah?

²⁵Moab kumpipa Zippor’ tapa Kumpi Balak sanga a gina zaw na hi amah? Ama Israel-te tawh kitawmaw ngai-in a kido ngai amah?

²⁶Israel-te, Heshbon le a khuoneute, Aroer le a khuoneute, le Arnon gun dung khuopi zosie-ah a ten uh kum zathum hun sung tengin bang dingin tuate lakia lo na hei?

²⁷Nang tunga a khiel kei ka hi sih a, kei tungah gal na bawl ziehin kei tunga a khiel nang na hizaw hi. TOPA thukhen pa in Israel-te le Ammon-te kikalah tuni-in thu khen taheh,” a ci hi.

²⁸Ahi vangin Ammon-te’ kumpipa in ama kunga thu puoh Jephthah a thusim sih hi.

²⁹Tua ciengin Jephthah tungah TOPA’ hlagau tung a, ama in Gilead le Manasseh nawhin Gilead gam Mizpah-ah peisuoh a, Gilead gam Mizpah panin Ammon-te kungah a peisuoh hi.

³⁰TOPA tungah Jephthah in kiciemna bawl a, “Ka khut sungah Ammon-te nei pieh leh,

³¹Ammon-te kung panin guolzo-in ka kilekia ciengin kei ei dawn dinga ka kot pana ang pusuoh popo TOPA-a’ hi ding a, meihal biehna-in ka pie ding hi,” a ci hi.

³²Tuaci’n amate do dingin Ammon-te kungah Jephthah galkai a, TOPA in a khut sungah amate a pie hi.

³³Ama in Aroer panin Minnith kimnai cieng dong khuopi sawmni, le Abel-keramim cieng dong mi tampitah that hi. Tuaci’n Israel mite mai-ah Ammon-te a guollel uhi.

³⁴Tua ciengin Mizpah-a ama inn ah Jephthah a tung hi; tuale ama dawn dingin tawm le dah tawh a tanu lam kawmin a pusuoh hi. Tua nu pen ama’ ta khat neisun ahi hi; ama lo buong tapa hile tanu hile adang a nei sih hi.

³⁵A tanu a mu bepin a puon ehkehin, “Ala, ka tanu! kei nei neusah mama hi; nang pen ka lungkhamna lienpi na hi ta hi. Bangzieh ahei cile TOPA tungah ka kam ka kah zo ta a, ka kiciemna ka dawhkia thei ta sih hi,” a ci hi.

³⁶Tua nu in ama kungah, “TOPA tunga na kam na kah zo tah leh na kam sung pana a pusuoh bangin kei tungah hing bawl lel in. Tu-in TOPA in na gal Ammon-te tungah phu ang lahpieh zo hi,” a ci hi.

³⁷Tuale ama in a pa kungah, “Kei tungah tam thu hing pieng taheh: Kei va pei-in muoltung tengah vah kawikawi-in[44] kei le ka guolte in ngahnu siengtho ka hina ka va kaa thei nadingun hla ni sung hun ei pie in,” a ci hi.

³⁸Ama in, “Va pei in,” ci-in tua nu hla ni sung a peisah hi. Tuaci’n ama le a guolte a dingkhie vua muoltung tengah a ngahnu siengtho hina a va kaa ta uhi.

³⁹Hla ni a cin ciengin a pa kungah a kilekia a, ama in a bawlsa a kiciemna bangin ama tungah a bawl hi. Tua nu pasal tawh lumton ngai nai lo hi. Tuaci’n khum panin Israel-te’ ngaina khat pieng a,

⁴⁰kum khatin ni li sung kum simin Gilead-te Jephthah’ tanu ziehin a thum dingin Israel’ tanute a pei uhi.