Read Zou THUKHENTE 13 Bible Online

THUKHENTE 13 - Zou bible

THUKHENTE 13

¹TOPA muna-ah Israel-te a siet gamtatkia vua, TOPA in Philistia-te khut sungah kum sawmli sung amate a pie hi.

²Dan minam sung panin Zorah-te a min Manoah kici mi khat a om hi. A zinu pen a ciing hi a, ta nei lo hi.

³Tua numei kungah TOPA’ vantungmi kilahin, “Ta nei loin a ciing hi nan lacin gai-in tapa khat na nei ding hi.

⁴Tu-in kidawm inlen lenggazu hile khamthei zucia hile dawn sinlen, a sieng lo khat popo zong ne sin,

⁵bangzieh ahei cile nang in nau pai-in tapa khat na nei ding hi. Tua naupang pen a suo-a kipanin Pasien tungah Nazir mi[48] ahi ding ziehin a lutungah mulmetna tukha lo ding hi. Philistia-te’ khut sung panin Israel-te hunkhie dinga kipan ding pa ahi hi,” a ci hi.

⁶Tua ciengin tua numei nu pei-in a pasal kungah, “Ka kungah Pasien’ mi khat ang pei a, a melpuoh pen Pasien’ vantungmi[49] khat tawh kibangin dipkuot huoi mama hi; ama hei pana ang pei ci ka dong sih a, a min zong ei gen lo hi;

⁷ahi vangin ama in keima kungah, ‘Gai-in tapa khat na nei ding hi. Tuaci’n lenggazu hile khamthei zucia hile dawn sinlen, a sieng lo bangma ne sin. Azieh pen tua naupang a suo-a kipanin a si dongin Pasien tungah nazir mi[50] hi ding hi,’ ei ci hi,” a ci hi.

⁸Tua ciengin Manoah in TOPA kungah thu ngen a, “TOPA aw, kang thum hi. Kote kunga nang sawl Pasien’ mipa hing peisahkia inlen, ang suoh ding naupang pa tawh kisai ka bawl dan ding uh ei hilsah in,” a ci hi.

⁹Pasien in Manoah thugen ngai a, lolai-ah tua nu a to laitahin ama kungah Pasien’ vantungmi a peikia hi; ahi vangin a pasal Manoah ama tawh om lo hi.

¹⁰Tuaci’n tua nu nawtai-in a pasal kungah, “Khatveini-a ka kunga ang kilah mipa ang kilahkia hi,” a ci hi.

¹¹Manoah zong ding pai-in a zinu zui a, tua mipa kungah pei-in ama kungah, “Tam nu kunga thugen pa nang na hiei mah?” a ci hi. Ama in, “Ka hi hi,” a ci hi.

¹²Tua ciengin Manoah in, “Tu-in na thugen teng ang tangtun ciengin naupang’ hinkhuo ding bang hi ding a; ama in bang bawl ding ahei?” a ci hi.

¹³TOPA’ vantungmi in Manoah kungah, “Ama tunga ka gensa zosie numei nu na kipilvang taheh.

¹⁴Ama in lenggui pana a pieng khat popo ne thei lo ding hi. Ama in lenggazu hile khamthei zucia hile dawn thei loin, a sieng lo na khat popo zong ne thei lo ding hi. Ama tunga ka thupieh zosie a zui kul ding hi,” a ci hi.

¹⁵TOPA’ vantungmi kungah Manoah in, “Khawl phot tadi inlen, nang adingin keelno khat hing bawl va ung,” a ci hi.

¹⁶TOPA’ vantungmi in Manoah kungah, “Nei khawlsah le zong na an hing nehpieh sih vang; ahi vangin meihal biehna ding na siem nop leh TOPA tungah pie in,” a ci hi. (Azieh pen Manoah in ama TOPA’ vantungmi ahi lam a thei sih hi.)

¹⁷Tua ciengin Manoah in TOPA’ vantungmi kungah, “Na thugen teng ang tangtun ciengin nang kang patawi thei nadingun, na min bang ahiei?” a ci hi.

¹⁸Ahi vangin TOPA’ vantungmi in ama kungah, “Ka min bang dinga nei dawh ahei? Tua pen a lamdang mama ahi bo hi,” a ci hi.

¹⁹Tuaci’n Manoah in keelno khat le an tawh biehna laton a, tuale ama tungah na lamdangte[51] a bawl[52] TOPA adingin suong tungah a pie hi.

²⁰Maitam panin vantung lamah meikuong a kato ciengin, Manoah le a zinu in a et laitahun maitam meikuong sungah TOPA’ vantungmi kato hi; tuale amate a mai kunin leilahah a bawhsuh uhi.

²¹Manoah le a zinu kungah TOPA’ vantungmi a kilaakia nawn sih hi. Tua ciengin Manoah in ama TOPA’ vantungmi ahi lam a thei na bo hi.

²²Manoah in a zinu kungah, “Pasien mu zo i hi ziehin a si valon ding i hi hi,” a ci hi.

²³Ahi vangin a zinu in ama kungah, “Ei tha sawm hi leh TOPA in i khut sung panin meihal biehna le an tawh biehnate ei sanpieh lo ding a, ahi sihle ama’ thu zosie ei lah loin tam bang nate tu-in ei pulah lo ding hi,” a ci hi.

²⁴Tua numei in tapa khat nei a, a min Samson a phuoh hi. Naupang khanglien a, TOPA in ama thupha a pie hi.

²⁵TOPA’ hlagau in Zorah le Eshtaol kikal Mahaneh-dan ah Samson hansuo ding a kipan hi.