Read Zou THUKHENTE 14 Bible Online

THUKHENTE 14 - Zou bible

THUKHENTE 14

¹Khatvei Timnah ah Samson hawsuh a, ama in Timnah ah Philistia numei khat a mu hi.

²Tua ciengin peito-in a nu le a pa kungah, “Timnah khuo-ah Philistia numei khat ka mu hi; tu-in ka zi dingin ei lahpieh un,” a ci hi.

³Hinanle a nu le a pa in, “A tep kitanlo Philistia-te kung pan zi na lah nadingin na tanaute lah le i mite[53] lahah numei khat beh om lo amah?” a ci uhi. Ahi vangin Samson in a pa kungah, “Ka zi dingin tua nu ei lahpieh teitei in, azieh pen tua nu in ei lungkimsah hi,” a ci hi.

⁴A nu le a pa in tam thu TOPA kung pan ahi lam a thei sih uhi; bangzieh ahei cile ama in Philistia-te do nading paulap a sui laitah ahi hi. Khum hun lai-in Philistia-te in Israel-te a uh uhi.

⁵Tua ciengin a nu le a pa tawh Timnah ah Samson a peisuh hi. Timnah lenggui lote-ah ama a tun ciengin humpi khanglai khat in na hawhsan hi.

⁶Ama tungah TOPA’ hlagau tung a, mi khat in keelno khat a balkeh bangin a khut guoh tawh humpi a balkeh hi. Ahi vangin tua a sil bawl a nu kung ahi a, a pa kungah ahi zongin gen lo hi.

⁷Tua ciengin ama peisuhin tua numei tawh kiho a, tua nu in ama a lungdamsah hi.

⁸Tua zaw a sawt loin tua nu la dingin peikia a, humpi luonghawm en dingin ama lampielin a en leh humpi luonghawm sungah khuoi na pul a, a zu na om hi.

⁹Ama in a khut tawh tuate sawhin peisuoh a, a pei kawmin a ne hi. A nu le a pa kungah a tun ciengin ama gel themkhat hawmin a ne uhi. Hizongle ama gel kungah ama in humpi luonghawm sung panin tua khuoizu a lah lam gen lo hi.

¹⁰Tua numei kungah a pa peisuh a, tangvalte bawl dan ngaina a om bangin Samson in pawi khat a bawl hi.

¹¹Mite in ama a mu ciengun ama uop dingin mi sawmthum puoh uhi.

¹²Samson in amate kungah, “Note kungah thu hahsa khat hing gen vang. Pawi bawl ni sagi sungin a thu mukhie-in bang ahei ci nei gen thei uleh saihadiel puon sil sawmthum le pawipuon sil sawmthum kang pie ding uhi.

¹³Ahi vangin bang ahei ci nei gen thei sih uleh saihadiel puon sil sawmthum le pawipuon sil sawmthum kei nei pie ding uhi,” a ci hi. Tuaci’n amate in a kungah, “Na thu hahsa ei gen in; ngai phot sei mah,” a ci uhi.

¹⁴Ama in amate kungah, “A ne pa sung panin neh ding kimkhat pieng a, a thahat pa sung panin a hlum kimkhat pieng hi,” a ci hi. Ahi vangin ni thum sungin tua thu hahsa bang ahei ci a gen thei sih uhi.

¹⁵A ni li ni-in[54] Samson’ zi kungah, “Ka kung vuah tua thu hahsa bang ahei ci ang gen nadingin na pasal zawl in. Tua ahi sihle nang le na pa’ inn mei tawh kang halvam ding uhi. Ko ei zawngtumsah dinga tam sunga nei hlat amah?” a ci uhi.

¹⁶Tuaci’n a mai-ah Samson’ zi kapin, “Kei ei muda bo teh; ei ngai tahtah sih teh. Ka mite kungah thu hahsa khat na dong a, hinanle a khietna nei gen sih hi,” a ci hi. Ama in tua nu kungah, “En in, ka nu le ka pa kunga zong ka gen lopi bang dinga nang kunga kang gen ding ahei?” a ci hi.

¹⁷Pawi bawl sung buppi ni sagi sung a mai-ah tua nu kap hi. Tua nu in ama kungah nget citahin a nget vangut ziehin a ni sagi ni-in a kungah a gen dawh ta hi. Tua ciengin tua nu in a mite kungah tua thu hahsa a gen hi.

¹⁸A ni sagi a cin ni, ni tum masangin tua khuomite in ama kungah a gen vua, “Khuoizu sanga hlumzaw ding bang hi a, humpi sanga hatzaw ding bang ahei?” a ci uhi. Tuale ama in amate kungah, Ka bawnglaa tawh lo hlo sih locin, ka thu hahsa na thei sih ding uhi,” a ci hi.

¹⁹Tua ciengin ama tungah TOPA’ hlagau khautahin tung a, Ashkelon ah a peisuh hi. Ama in tua khuomite sawmthum that a, a vante uh lahpiehin thu hahsa a gen thei mite tungah a pawipuonte a pie hi. A lung sosa-in a pa’ inn lam a zuonkia hi.

²⁰Tuale Samson zinu zong a kinun ni vua a molie pa a kipie ta hi.