Read Zou THUKHENTE 15 Bible Online

THUKHENTE 15 - Zou bible

THUKHENTE 15

¹Tua zaw a sawt lo mangbu lah hunin Samson in keelno khat puo-in a zi kunga haw dingin a kuon hi. Ama in, “Ka zi innkhan sungah ka lut nuom hi,” a ci hi. Ahi vangin a sungpa in ama lutsah lo hi.

²A sungpa in, “Nang in ama nuol zo ta ci kang telcien hi; tuaci’n na guolpa zi dingin ka na pie ta hi. A naunu ama sangin hoizaw hi lo amah? Ama tangin na la sih ding amah?” a ci hi.

³Samson in amate kungah, “Tutungin Philistia-te tungah sietna ka bawl le zong ei kimawsiet lo ding hi,” a ci hi.

⁴Tuaci’n Samson pei-in ngie zathum man a, meila zong a la hi; tuale ama in ngiete[55] a mei le a mei kimatsahin a mei uh kikalah meila a koi hi.

⁵Ama in meilate a hal zaw ciengin Philistia-te’ ankung a polaite lahah ngiete hla a, buphaite le bukung a polaite, lengga umte le[56] olive lote zong haltum hi.

⁶Tua ciengin Philistia-te in, “Tam koi bawl ahiei?” ci-in dong uhi. Amate in, “Timnah-te’ mahpa Samson hal ahi hi. Azieh pen a sungpa in a zi lahpiehin a guolpa a na pieh dawh zieh ahi hi,” a ci uhi. Tuaci’n Philistia-te peito-in tua nu le a pa mei tawh a haltum uhi.

⁷Samson in a kung vuah, “Note’ bawl tami ahile kei ka kiciem hi. Na tung vua phu ka lah zawh masangsie ka ta sih ding hi,” a ci hi.

⁸Ama in a tawbuh a khelbuh uh satin mi tampi that hi; tuale ama peisuh a, Etam suongpi pawhkeh sungah a om hi.

⁹Tua ciengin Philistia-te a peito vua, Judah gamah giephuol satin Lehi a sim uhi.

¹⁰Judah mite in, “Bang dinga ko ei do dinga hing peito na hi uh ahei?” a ci uhi. Amate in zong, “Samson a hen ding le ama in ko tunga ei bawl bangin ama tunga bawl dinga ang peito ka hi uhi,” a ci uhi.

¹¹Tua ciengin Etam suongpi pawhkeh-ah Judah mite mihing tulthum peisuhin Samson kungah, “Philistia-te in eite ei uh lam na thei sih amah? Tua ahile nang in ko bang bawla nei bawl ahiei?” a ci uhi. Ama in, “Amate in kei tunga ang bawl banga amate tunga zong ka bawl ahi hi,” ci-in a dawng hi.

¹²Amate in ama kungah, “Philistia-te’ khut sungah kang pieh thei nadingun nangma hen dinga ang kuonsuh ka hi uhi,” a ci uhi. Samson in amate kungah, “Noma mama in kei nei tha lo nadingun kei tungah hing kiciem un,” a ci hi.

¹³Amate in ama kungah, “Hi lo hi, nangma hing henin amau’ khut sungah kang pie beh ding vua, nang kang that sih ding uhi,” a ci uhi. Tuaci’n khauhuol tha ni tawh ama henin tua suongpi panin a peipi uhi.

¹⁴Lehi ah a tun ciengin ama dawn dingin Philistia-te awng kawmin a pei uhi; tuale ama tungah TOPA’ hlagau khautahin tung a, tuale a khut tunga om henna khauhuolte mei in a kahtum anthul khau tawh kibang a, a khut panin a kihennate zungmang zieu hi.

¹⁵Tua ciengin ama in laa’ khagu a tha khat mu a, a khut zahin tua khagu la-in tua tawh mihing tulkhat that hi.

¹⁶Tuale Samson in, “Laa khagu khat tawh a lom a lomin, laa khagu khat tawh mihing tulkhat ka that hi,” a ci hi.

¹⁷A thu gen a man zaw ciengin a laa khagu a paidawh uhi; tuale khum mun pen Ramath-lehi kici hi.[57]

¹⁸Tua ciengin ama a dangta mama a, tuale ama in TOPA hlanin, “Na nasempa khut tawh tam guolzawna lienpi nei pie zo ta hi. Tu-in kei a dangta-a si ding le a tep kitanlo mite’ khut sunga pua ding ka hi ta amah?” a ci hi.

¹⁹Tuaci’n Pasien in Lehi-a om kuoh sung munkhat pawhkehsah a, tua panin tui a phul hi. Tui a dawn leh a tha kidimkia-in a thakhaukia hi. Tua ahi ziehin khum mun En-hakkore[58] kici a, tuni dongin Lehi ah a omlai hi.

²⁰Tuale ama in Philistia-te’ uh hun sungin Israel-te kum sawmni sung thu a khen hi.