Read Zou THUKHENTE 18 Bible Online

THUKHENTE 18 - Zou bible

THUKHENTE 18

¹Khum hun lai-in Israel sungah kumpi om lo hi. Khum hun lai-in Dan-te in a ten nading uh gam a sui uhi; bangzieh ahei cile khum hun dongin Israel minamte lahah amate luo ding gam kipie lo hi.

²Tuaci’n Dan-te in Zorah le Eshtaol panin tua gam endap ding le a mukhie dingin amau’ be buppi sung panin galhang pasal nga a sawl uhi; tuale amate in tua mite kungah, “Va pei unlen gam va sui ta un,” a ci uhi. Ephraim muoltung gama Micah’ inn ah amate a tun ciengun tua munah a taam uhi.

³Micah’ inn ah amate a op laitahun a aw-in tua Levi tangvalpa a thei pailien uhi; tuaci’n amate pei-in ama kungah, “Nang tam munah koi hing puoh ahiei? Tam munah bang bawl na hiei? Tam munah na nasep bang ahiei?” ci-in a dong uhi.

⁴Ama in a kung vuah, “Micah in kei dingin tam bang tam bang teng ei bawlpieh hi. Ama in ei cielin ama’ siempu ka suoh hi,” a ci hi.

⁵Tua ciengin ama kungah, “Kang vaikuonna uh ka lawcing ding vuoi mah ci ka thei nadingun Pasien kungah ei dawhpieh in,” a ci uhi.

⁶Siempu pa in, “Lung nuomin pei un. Na nasep ding uh TOPA’ mit in a en zing hi,” ci-in a dawng hi.

⁷Pasal ngate pei-in Laish a tun ciengun tua sunga teng mite pen Sidon-te bang dan ma-in galmuongin daitah le ngaimuongtahin a om vua, leitungah bangma tasap[67] nei loin a hauna uh a mukhie uhi.[68] Tua tham loin Sidon-te tawh a kigamla vua, Aram-te tawh kizopna a nei sih uhi.[69]

⁸Zorah le Eshtaol-a om a unaute kung a tun ciengun amate kungah, “Bang gen ding na nei vuoi?” a ci uhi.

⁹Amate in, “Hing pei un, amate sim dingin va kuonto ta vai; bang ding ahei cile a gam ka musa uh ahi a, hoi mama hi. Bang khat beh bawl sawm lo na hi uh amah? Pei ding kiheh sih un, lutin tua gam va luo ta vai.

¹⁰Na pei ciengun bangma a khophawh veteh lo mite kung na tung ding uhi. Tua gam a zai mama a- Pasien in na khut sung vuah tua gam ang pieh tahtah ahi hi- leitungah tasapna bangma khat beh a op lona mun khat ahi hi,” a ci hi.

¹¹Zorah le Eshtaol panin galhiem tawi Dan-te be pasal zaguh a kuon vua, tuale

¹²amate peito-in Judah gam Kiriath-jearim munah giephuol a sat uhi. Tam thu ziehin tua mun Mahaneh-dan[70] kici a, Kiriath-jearim nitumna lamah a om hi.

¹³Khum mun panin Ephraim muoltung gamah amate peisuohin Micah’ inn a tung uhi.

¹⁴Tua ciengin khum gam (Laish a kici) endap dinga a pei pasal ngate in a kithuopi mite kungah, “Tam innte sungah siempu puon khat, teraphim, le a kisung sia milim khat a om lam na thei vuoi mah? Tua ahi ziehin tu-in na bawl ding uh ngaisun un,” a ci uhi.

¹⁵Tuaci’n khum lamah amate kihei-in Micah’ inna om tangvalpa Levi inn ah tungin ama a hopi uhi.

¹⁶Kulkotpi lutna-ah galhiem tawi Dan-te pasal za guh a din laitahun

¹⁷gam endap pasal ngate a sungah a lut vua, amate in sia kisung milim,[71] siempu puon, le teraphim-te a la uhi. Galhiem a tawi pasal za guhte tawh kulkotpi lutna-ah siempupa a ding hi.

¹⁸Micah’ inn sungah tua pasalte lutin a kisung sia milim, siempu puon, le teraphim-te a lah ciengun siempupa in a kung vuah, “Bang bawl na hi vuoi?” a ci hi.

¹⁹Amate in, “Ham sin! Na khutin na kam humin ei zui inlen, ka pa ule ka siempu uh hing hi ta’n. Nang adingin mi khat’ inn sunga siempu hi ding hoizaw amah, tua ahi sihle Israel-te sungah minam le be siempu hi ding hoizaw ahei?” a ci uhi.

²⁰Tua ciengin siempu pa in a ngetna uh a sang hi. Ama in siempu puon, teraphim, le milim-te la-in mite tawh a peiton hi.

²¹Tuaci’n amai vuah a tasente uh, a ganhonte ule a vante uh nuasie-in khuolzin a zom uhi.

²²Micah’ inn pan a gamla sim khat a tun ciengun Micah’ inn gei-a innte sunga om pasalte a kiciel vua, amate in Dan-te nuadelin a pha uhi.

²³Amate in a kinuahei Dan-te awhsanin Micah kungah, “Tam bang mihonpi tawh nang pei nadingin bang thu om ahei?” a ci uhi.

²⁴Ama in dawngkia a, “Note in ka bawlsa ka pasien-te le ka siempu pa la-in a na peipi uhi, tuale ke’n bang nei lai ka hei? Tua ahile bang hangin, “Bang thu om ahei?”ci-in kei ei dong na hi uh ahei?” a ci uhi.

²⁵Dan-te in ama kungah, “Kote lahah na aw kizasah vet sin. Tua hi sihle a lungtom ka guolte in nang hing simin na hinna le na innkuon’ hinna na tan kha bep ding hi,” a ci uhi.

²⁶Tua ciengin a lampi vuah Dan-te a pei uhi. Micah in ama adingin amate thahat luo hi, ci-in a mu ciengin ama kihei-in a inn lam a zuon hi.

²⁷Dan-te in Micah’ bawlsate le a siempu pa a lahpieh zaw ciengun a gamdai le a khophawh veteh lo mite opna Laish-ah a tung vua, namsau tawh amate vatin mei tawh khuopi a hal uhi.

²⁸Sidon tawh kigamla-in Aram[72] tawh kizopna a nei lo ziehun amate a hunkhie ding koima a om sih hi. Tua khuopi pen Beth-rehob te’ neisa kuom sungah a om hi.

²⁹Amate in khum khuopi pen Israel’ suon, amau’ pienna a pu uh Dan min tapin Dan ci uhi; ahi vangin nidang lai-in Laish khuo kici hi.

³⁰Tua ciengin Dan-te in amate dingin milim a phut uhi. Moses’ tapa,[73] Gershom’ tapa Jonathan le a tapate in salin tua gam a kipeipi masang dongin Dan-te dingin siempu a sem uhi.

³¹Tuaci’n Shiloh ah Pasien’ biehbuh a om hun sung tungtawnin Micah’ bawlsa milim a kemcing uhi.