Read Zou THUKHENTE 21 Bible Online

THUKHENTE 21 - Zou bible

THUKHENTE 21

¹Tu-in Mizpah ah Israel-te a kiciem zo ta vua, “Koima khat beh in i tanute uh Benjamin-te tawh i kinungsah sih ding uhi,” a kici uhi.

²Tuale Bethel ah mite pei-in khum sunga Pasien mai-ah amate nitah dong to-in nahpitahin a kap uhi.

³Amate in, “Israel-te’ Pasien, TOPA aw, tuni-in Israel-te sungah minam khat a pelem nadingin tam thu bang dinga hing pieng ahei?” a ci uhi.

⁴A zing ciengin mite tho bai-in tua munah maitam khat a lam vua, meihal biehna le thunuom biehpiehnate a pie uhi.

⁵Tua ciengin Israel-te in, “Israel minamte zosie sung panin TOPA kunga kikhopna ah koi teng hing pei lo ahei?” a ci uhi. Bangzieh ahei cile TOPA kunga a pei lo mite tawh kisai-in Mizpah ah kiciemna lienpi khat a bawl vua, “Tua mipa kithat ding hi,” a ci uhi.

⁶Hizongle Israel-te in a unau uh Benjamin dingin a laina vua, “Tuni-in Israel sung panin minam khat a kihemkhie ta hi.

⁷Amau’ zi dingin i tanute pie sih vai ci-in TOPA tungah i kiciem zo tah ziehun eite in a hinglaite ading zi bangci guot ding i hi uh ahei? a kici uhi.

⁸Tua bepin amate in, “TOPA kung Mizpah ah Israel minamte ang pei lo a om ei?” a ci uhi. Amate in Jabesh-gilead panin kikhopna giephuolah koima khat beh a pei lo lam a phawh uhi.

⁹Azieh pen mite lahah min a kihlat ciengin khum munah Jabesh-gilead khuo-a tengte khat zong om lo hi.

¹⁰Tuaci’n khum sungah mihonte in galkap mihing tul sawm le tulni a sawl vua, “Pei unlen Jabesh-gilead khuo-a tengte, namsau tawh nupite le naupang neute tawh va that ta un.

¹¹Tam bangin na bawl ding uhi; pasal zosie le pasal tawh a lumtonsa numei zosie na sumaimang ding uhi,” ci-in thu pie uhi.

¹²Jabesh-gilead khuo-a tengte lahah pasal tawh a lumton ngai nai lo ngahnu siengtho zali a mu vua, Canaan gam sunga a om Shiloh giephuolah a peipi uhi.

¹³Tua ciengin mihonte in Rimmon suongpi-a om Benjamin-te kungah thu a puoh vua, amate tungah kilemna thu a gen uhi.

¹⁴Khum hunin Benjamin-te kilekia-in Jabesh-glead numei a hingkhawite uh amate a pie uhi; hizongle amate adingin numei kicing zo lo hi.

¹⁵TOPA in Israel minam sungah kikhenkehna a opsah ziehin Benjamin-te tungah mite in lainatna a nei uhi.

¹⁶Tuaci’n mihonpi upate in, “Benjamin-te sungah numei om nawn lo ahi ziehin a hinglaite zi bangci guot ding i hei?” a ci uhi.

¹⁷Tuale amate in, “Israel-te sung panin minam khat a manthai lo nadingin a hinglai Benjamin-te adingin gamhluo a op lo phamaw hi.

¹⁸Ahi vangin eite in lah amau’ zi dingin i tanute i pie thei ta sih uhi,” a ci uhi. Azieh pen Israel-te a kiciemzo ta vua, “Benjamin-te tawh a tanu kinungsah poma in samsietna thuoh taheh,” a ci uhi.

¹⁹Tuaci’n amate in, “En un, Bethel sah lam, Bethel panin Shechem peitona lamlienpi nisuona lam, Lebonah leitaw lama om Shiloh ah TOPA adingin kumsim pawi bawlna om hi,” a ci uhi.

²⁰Amate in Benjamin-te thu hil in, “Va pei-in lengga lote-ah va kibuhdap ta un.

²¹Lamvui lahah Shiloh nungahte a lam dinga ang pei ciengin, lengga lote panin pusuohin na zi dingun khat ciet man unlen Benjamin gamah peipi un.

²²Tua ciengin ka kung vuah a pate ahi sihle a sanggamte hing pei-in ei mawsah leh amate kungah, ‘Nohaw hing kiphal mai unlen amate zi ei guonsah un; bangzieh ahei cile mikim zi ding gal sungah ka matpieh zo sih uhi. Ahi vangin note in na tanute uh amate tawh na kinunsah uh hi sam lo ahi ziehin no zong na maw tuom sih uhi,’ ka ci ding uhi,” a ci uhi.

²³Tua bangin Benjamin-te a gamta uhi; amate in a laamte lah panin numei khat ciet zi dingin manin a taipi uhi. Tua ciengin amate pei-in a gam vuah a kilekia vua, khuopite lam phakia-in tuate sungah a teng uhi.

²⁴Khum hunin amau’ minam le a innkuonpi ciet tawh khum panin Israel-te a pei vua, khum panin a gam ciet a zuon uhi.

²⁵Khum hun lai-in Israel-te sungah kumpi om lo hi; amau’ hoisah bangin mi zosie a gamta uhi.