Read Zou THUKHENTE 4 Bible Online

THUKHENTE 4 - Zou bible

THUKHENTE 4

¹Ehud a si zaw ciengin TOPA muna-ah Israel-te a siet gamtatkia uhi.

²Tuaci’n TOPA in Hazor-a kumpi sem, Canaan kumpipa Jabin’ khut sungah amate a pie hi; ama’ galkapmangpa pen Harosheth-ha-goiim ah a teng Sisera ahi hi.

³Tua ciengin huna ngen dingin TOPA tungah Israel-te kiko uhi; azieh pen ama in sia sakol leeng zakuo nei a, Israel-te kum sawmni sung nahpi tahin a bawlsie hi.

⁴Tua hunin Lappidoth’ zi kamsang numei Deborah in Israel-te thu a khen hi.

⁵Ephraim muoltung gam sung Ramah le Bethel kikala om Deborah lutu kung nei-ah ama to zel hi; tuale thukhensah dingin ama kungah Israel-te a peito uhi.

⁶Ama in mi sawlin Naphtali gam Kedesh panin Abinoam’ tapa Barak hlansahin ama kungah, “TOPA, Israel-te’ Pasien in, ‘Pei in, Tabor Muol tungah panmun la inlen, Naphtali minam le Zebulun minam sung panin mi tulsawm zawpi in.

⁷Keima in Jabin’ galkapmangpa Sisera, a sakol leengte le a galkapte tawh Kishon Lui ah nangma tawh kimu dingin ka kaidawh ding hi; tuale keima in na khut sungah ama kang pie ding hi,’ ei ci hi,” a ci hi.

⁸Barak in tua nu kungah, “Nang tawh i zaw ding leh ka pei ding hi; nang tawh i zaw sih ding leh ka pei sih ding hi,” a ci hi.

⁹Tuale ama in, “Kang zawpi valon ding hi; ahi vangin na peina ding lampi in nang minthanna ang tunpi sih ding hi, azieh pen TOPA in numei khat’ khut sungah Sisera a pie ding hi,” a ci hi. Tua ciengin Deborah dingin Barak tawh Kedesh ah a pei hi.

¹⁰Barak in Kedesh ah Zebulun-te le Naphtali-te a thuta hi; tuale a nua-ah galhang mi tulsawm kuonto uhi; tuale ama tawh Deborah a kuonto hi.

¹¹Tu-in Ken-te Herber in Moses’ sungpa Hobab’ suon le hlahte ahi adang Ken-te[11] tawh a kikhen a, Kadesh gei-a Elon-bezaanannim cieng dongah a puonbuh a lam hi.

¹²Sisera kungah Tabor Muolah Abinoam’ tapa Barak, peito zo hi, ci-in a kigen ciengin,

¹³Sisera in a sakol leeng zosie, sia sakol leeng zakuo, le ama tawh a omton galkap zosie, Horosheth-ha-goiim panin Kishon Lui-ah a thuta hi.

¹⁴Tua ciengin Deborah in Barak kungah, “Peito in! Bangzieh ahei cile tuni pen TOPA in na khut sungah Sisera ang pieh ni ahi hi. Na mai-ah TOPA pei tahtah hi,” a ci hi. Tuaci’n ama a zui galhang tul sawm tawh Tabor Muol panin Barak a peisuh hi.

¹⁵TOPA in Barak mai-ah Sisera le a sakol leeng zosie le a galkap zosie a patausah[12] hi; a sakol leeng tung panin Sisera kumsuhin a keng tawh taimang a,

¹⁶tua lai tahin Barak in a sakol leengte le a galkapte Harosheth-ha-goiim cieng dong del hi. Sisera’ galkapte a unpi-un namsau tawh a sigam uhi; a suohta koima om lo hi.

¹⁷Tu-in Ken-te Heber’ zi Jael’ puonbuh -ah a keng guohin Sisera a tai hi; azieh pen Hazor kumpipa Jabin le Ken-te Heber’ be kikalah kilemna a om hi.

¹⁸Sisera dawn dingin Jael pusuohin ama kungah, “Hing kihei in, ka pupa aw, kei lam hing kihei in; zau sin,” a ci hi. Tuaci’n ama zong tua nu lamah kihei-in puonbuh sungah lut a, tua nu in tuongpha puon tawh ama a khu hi.

¹⁹Tua ciengin ama in tua nu kungah, “Ka dangta ahi ziehin hepina tawh ka dawn ding tui halkhat ei pie in,” a ci hi. Tuaci’n ama in bawngnawi koina savun thawl hongin a dawn ding tui pie-in ama a khu hi.

²⁰Ama in tua nu kungah, “Puonbuh kotah ding inlen, mi khatpo ang pei-in na kungah, ‘Tam munah mi khatpo a om ei?’ ang ci leh, ‘Om sih,’ ci in,” a ci hi.

²¹Ahi vangin Heber’ zi Jael in puonbuh kilna sia hiem khat la a, a khutah seh khat tawi-in ama kungah damtahin pei a- gim seng kisa-in a kimut laitahin- a sia hiem in ama pailetin lei a bat dongin a ankhaibaw-ah khensuh a - tuaci’n ama a si hi.

²²Tua ciengin Barak in Sisera a del ciengin ama tawh kimu dingin Jael pusuohin ama kungah, “Hing pei in, na mi sui kang lah ding hi,” a ci hi. Tuaci’n a puonbuh sungah ama a lut hi; tuale a ankhaibaw-ah puonbuh sia hiem kikhenin a sisa-in Sisera na lum hi.

²³Tuaci’n khum ni-in Pasien in Israel-te mai-ah Canaan kumpipa Jabin a guolelsah hi.

²⁴Tua ciengin amate in Canaan kumpipa Jabin a suhsiet masangin Canaan kumpipa Jabin tungah Israel-te’ khut a khauh semsem hi.