Read Zou THUKHENTE 5 Bible Online

THUKHENTE 5 - Zou bible

THUKHENTE 5

¹Tua ciengin Deborah le Abinoam’ tapa Barak in khum ni-in la a sa vua:

²“Israel ah a samte uh a sau ciengin, mite amate mama kiphal tahin a kipieh uh ciengin- TOPA phat un![13]

³“Za un, kumpite aw; Na bil uh daw un, uliente aw; TOPA tungah la ka sa ding a, Israel-te’ Pasien, TOPA tungah la ngaih ka sa ding hi.

⁴TOPA, Seir pan na pei cieng, Edom gam pan na kuonkhiet cieng, leitung kiling a, vante in buosuhin meiite in tui a sungsuh hi.

⁵TOPA, Sinai-a Pa mai, Israel’ Pasien, TOPA mai-ah muolte a kiling hi.

⁶“Anath’ tapa Shamgar hun lai, Jael hun lai-in khuol honzinte khawlin, khuolzinte in lampelh a zui uhi.

⁷Israel sunga lohlote a cithei vua, a galvan lahpiehte utawh a thau milmel uhi. Azieh pen Deborah aw, nang na khang a, Israel sungah nu bangin na khang hi.

⁸A tha pasien-te a kiteel ciengin, tunkotah gal a om hi. Israel tul sawmlite lahah lum le tei a kimu amah?

⁹Mite lah panin kiphal tahin a kipumpieh Israel galkapmangte lamah ka lungsim a pei hi. TOPA phat un.

¹⁰“A thu gen un, no laa kangte tunga tuongte, puonpha hoi[14] tunga tote le lampi dunga peite aw.

¹¹“Tui phuola lasiemte’ [15]awging in TOPA’ guolzawna, Israel gam ama lohlote’ guolzawnate, khum munah a awiawi uhi. “Tua ciengin kul tunkotte ah TOPA’ mite a peisuh uhi.

¹²“Tho in, tho in, Deborah! Tho in, tho in, la khat sa in! Ding in, Barak, na galmatte peipi in, Abinoam’ tapa aw.

¹³Tua ciengin milien a omlaite peisuh uhi; Ama ading[16] a thahat mite do dingin TOPA’ mite peisuh uhi.

¹⁴Ephraim panin amate tua kuomah[17] a kuon[18] vua, nang, Benjamin, na unaute tawh ang zui uhi; Machir panin galkapmangte peisuhin, Zebulun panin galkap mangpa’ ciengkhut tawite a peisuh uhi;

¹⁵Issachar uliente, Deborah tawh a pei vua, Barak tungah Issachar a thuman hi; amate in kuom sungah ama a nuadel uhi. Reuben bete lahah lungsim ki-etcienna nasie tahin a om hi.

¹⁶Tuuhonte ading theile tum ngai dingin bang dinga tuukhumnate lahah tuongbaang na hi ahei? Reuben bete lahah lungsim ki-etcienna nasie tahin a om hi.

¹⁷Jordan galkhatah Gilead om hi; tuale bang dinga Dan-te tembaw tawh om uh ahei? Asher-te tuipi pieu-ah a to lai vua, a kumsuhna mun vuah a teng uhi.

¹⁸Zebulun-te pen sina a simmawte ahi vua; Naphtali-te zong, gamlah a sanna munah tua bang ma ahi uhi.

¹⁹“Kumpite kuonin a do vua, tua zaw ciengin Canaan kumpite in Megiddo tuite gei, Taanach ah a do uhi; amate in a kinuasie ngunte a nga tuom sih uhi.

²⁰Van panin aasite in a do vua, a lampi ciet panun Sisera do uhi.

²¹Kishon guntui khang in amate tai a, a lomlen tuikhang, Kishon tuikhang in taimang hi. Ka hlagau aw, hattahin mainawt in!

²²“Tua ciengin sakol a kopdien ziehin, sakol taite’ ketot gin in leithuong hot hi.

²³TOPA’ vantungmi in, “Meroz samsie in, a sunga tengte nasie tahin samsie in. Azieh pen TOPA a panpi dingin amate ang pei sih vua, thahat pa dona-ah TOPA a panpi dingin ang kuon sih uhi,” a ci hi.

²⁴“Numeite lahah thupha nga pen Jael, Ken-te Heber’ zi, puonbuh sunga teng numeite lahah thupha nga pen ahi hi.

²⁵Ama in tui ngen a, tua nu in bawngnawi a pie hi. Tua nu in uliente’ zah kuongkum sungah bawngnawi thaukhal a puoh hi.

²⁶Ama in a khutah puonbuh khetphim tawi a, a zietlam khutah nasemte’ sehta a tawi hi; ama in Sisera khatvei sat a, a lutang satguoi-in, ama in satzanin a ankhaibaw a khen pailet hi.

²⁷Ama bawhsuhin a pua a, tua nu’ kengbul ah ama a lum ta hi; tua nu kengbul ah ama bawhsuhin a pua hi; a bawhsuhna tua munah, ama pua-in a si hi.

²⁸“Tawlet pan Sisera’ nu khuodah a, vathang panin a en[19] hi: ‘Bang dingin sakol leeng ang pei ding tu tanvei sawt ahei? Bang dingin sakol leengpei ginte hici kiheh ahei?’ a ci hi.

²⁹A numei pil pente in a thugen a dawng vua, a tahtahin ama le ama kidawng ahi bo hi;

³⁰‘Amate in a kinuasie vante mu-in hawm hi lo uh amah?- Pasal khat in nungah khat ta ahiei, ni ta ahiei; a kinuasie puon kibumte Sisera ading, a kinuasie puon kibum kizemte, a kibum a kizem puon nite ka ngawng ading amah?’ a ci hi.

³¹“Tuaci’n na gal zosie a si sieng ta uhi, TOPA aw! Ahi vangin na guolte pen a vanglietna tawh a suoh ni tawh kibang taheh,” a ci uhi. Tuale khum gam in kum sawmli sung tawlngah hun a nei hi.