Read Zou THUKHENTE 6 Bible Online

THUKHENTE 6 - Zou bible

THUKHENTE 6

¹TOPA muna-ah Israel-te a siet gamtat vua, TOPA in Midian-te’ khut sungah amate kum sagi sung a pie hi.

²Israel-te tungah Midian-te a guolzo uhi; tuale Midian-te ziehin Israel-te in a kibuh nadingun muol tung tengah suonghawmte le mun muonhuoite a bawl uhi.

³Bangzieh ahei cile Israel-te in khai a tu popo ciengun Midian-te, Amalek-te, le nisuona lam mite in a sim zel uhi.

⁴Amate do nadingin giephuol satin Gaza kim cieng donga a po lei pana piengte a suhsietpieh vua, tuaci’n Israel gamah neh ding khat zong hen loin tuu, bawngtang, le laa khat zong hen a nei sih uhi.

⁵Azieh pen amate le a ganhonte a kuonto uha, kauphe honpi banga a tam a puonbuhte uh nangawn a pua uh hi. Amate ahi a, a kalaohte uh ahi zongin kisim zo lo hi; tuaci’n amate a tun ciengun khum gam teng a susie uhi.

⁶Tua ahi ciengin Midian-te ziehin Israel-te nahpi tahin kiniemkoi hi; tuale Israel-te’ TOPA tungah huna ngenin amate a kiko uhi.

⁷Midian-te ziehin Israel-te’ TOPA tungah a kiko ciengun,

⁸TOPA in Israel-te kungah kamsang khat a sawl hi; tuale ama in a kung vuah, “Israel-te’ Pasien, TOPA in tam bangin ci hi: Keima in saltanna gam Egypt panin note kang peipi to hi;

⁹tuale Egypt-te’ khut sung pan le ang bawlsie mi zosiete’ khut sung panin kang hunkhie a, na mai vuah amate delmangin a gam uh kang pie hi;

¹⁰tuale keima in na kung vuah, ‘Keima TOPA na Pasien uh ka hi hi; note in na tenna gam vua Amor-te’ pasien-te na zatah sih ding uhi,’ kang ci hi. Ahi vangin ka thu na ngai sih uhi,” a ci hi.

¹¹TOPA’ vantungmi pei-in Ophrah-a Abiezer-te Joash’ neisa ahi gangpi sing phungah to a, tua laitahin Joash’ tapa Gideon in Midian-te mu lo dingin lengga suhna-ah mangbu a cil hi.

¹²TOPA’ vantungmi a kungah kilang a, “Nang a thahat galhang pa aw, TOPA in nang ang ompi hi,” a ci hi.

¹³Gideon in ama kungah, “Pu aw, TOPA in ko ei ompi ahile bang dinga tamte zosie ka tung vua hing tung ahei? Ka pu ka pate un, ‘TOPA in Egypt panin ei peipi to hi lo amah? ci-a a gengen uh a lamdang ama’ nasepte zosie hei-a om sieng dawh ta ahei?’ a ci hi. Ahi vangin tu-in TOPA in ei nuasie zo a, Midian-te’ khut sungah ei pie zo hi,” a ci hi.

¹⁴Tua ciengin ama lamah TOPA kihei-in a kungah, “Tami na thahatna tawh pei inlen, Midian-te’ khut sung panin Israel-te va tankhie in; keima in nangma kang sawl hi,” a ci hi.

¹⁵Ama in, “Ahi vangin pu aw, bangci bangin Israel-te hunkhie zo ding ka hei? Kei, Manasseh lahah be zawngkhal pen ka hi a, ka innkuon sungah zong a neupen ka hi bo hi,” ci-in a dawng hi.

¹⁶TOPA in ama kungah, “Hinanle keima in kang ompi ding a, Midian-te a unpi-in na vatmai ding hi,” a ci hi.

¹⁷Tua ciengin ama in, “Tu-in na maipha ka mu leh kei tawh a kiho mi pa khu nang na hina lim khat ei lah in.

¹⁸Na kungah letsong puoh dingin hing pei-in na mai-ah kang koi masangsie tam mun panin na pei sin,” a ci hi. Ama in, “Nang kilekia masang ka na om ding hi,” a ci hi.

¹⁹Tuaci’n a inn ah Gideon pei-in keelno khat le annel ephah khat tol saw lo moh-in a bawl hi; ama in law sungah a sa koi-in beel sung khatah a satui koi a, tua teng gangpi sing phunga ama kungah peipi-in a pie hi.

²⁰Pasien’ vantungmi in ama kungah, “Sa le tol saw lo moh la-in tam suongpi tungah koi inlen, a tungah satui sung in,” a ci hi. Ama in tua bangma-in a bawl hi.

²¹Tua ciengin TOPA’ vantungmi in a khut sunga om ciengkhut dawn tawh sa le tol saw lo moh a khoi hi; tuale suong panin mei pusuohin sa le tol saw lo moh katum a, ama’ muna panin TOPA’ vantungmi a mang hi.

²²Tua ciengin TOPA’ vantungmi ahi lam Gideon in thei hi; tuale Gideon in, “Ei panpi in, TOPA! Bang ding ahei cile TOPA’ vantungmi kimaituo-in ka mu zo ta hi,” a ci hi.

²³Ahi vangin TOPA in ama kungah, “Na tungah nopna om taheh; zau sin, na si sih ding hi,” a ci hi.

²⁴Tua ciengin Gideon in TOPA dingin tua munah maitam khat lamin tua khu TOPA in kilemna ahi hi, ci-in a min a phuo hi. Tua khu Abiezer-te’ Ophrah khuo-ah tuni dongin a omlai hi.

²⁵TOPA in tuami zanin ama kungah, “Na pa bawngtangte sung pan kum sagi a pha bawngtang a nina pen la inlen, na pa’ nei Baal maitam phelin, a gei-a om a siengtho khuom[20] phua in;

²⁶tuale tam sung mun muonhuoi dawnah TOPA na Pasien uh adingin maitam khat lamin suongte a ngaina bangin koi in; tua ciengin bawngtang a nina pen la inlen na phua ding a siengtho khuom[21] sing tawh meihal biehna pie in,” a ci hi.

²⁷Tuaci’n Gideon in a nasemte mi sawm peipi-in TOPA in ama tunga a gen bangin a bawl hi; ahi vangin ama in sunlai-a a bawl ding pen a innkuonpite le a khuo mite a giin ziehin zanlai-in a bawl hi.

²⁸Zingmawng phalvah kisemin khuo mite a thaw uh ciengin, Baal maitam kiphelin a gei-a khuom siengtho[22] kiphua a, a kilamsa maitam tungah bawngtang a nina pen kipie hi.

²⁹Tuaci’n amate in, “Tami koi pen bawl ahiei?” ci-in khatlekhat a kici uhi. Thu kanin thu a dawh zaw ciengun amate kungah, “Joash’ tapa Gideon bawl ahi hi,” ci-in kigen hi.

³⁰Tua ciengin khuomite in Joash kungah, “Na tapa in Baal maitam phelin a gei-a om ama’ khuom siengtho[23] a phua ziehin ama ka tha thei nadingun na tapa hing peipi in,” a ci uhi.

³¹Ahi vangin Joash in a langkhatah a pang mi zosie kungah, “Baal adinga thugen ding na hi uh amah? Ahi sihle ama panpi-in hum ding na hi uh amah? Ama a panpi poma zingmawng ciengin kithat ding hi. Ama pasien ahile ama le ama kihun taheh. Bangzieh ahei cile a maitam kiphel zo hi,” a ci hi.

³²Tua ahi ziehin khum ni-in Gideon pen,[24] “Baal in ama dem taheh,” a ci nopna ahi Jerubbaal min kivaw hi. Azieh pen Gideon in a maitam phelpieh hi.

³³Tua ciengin Midian-te, Amalek-te le nisuona lama mite zosie a peiton vua, tuale Jordan galkai-in Jezreel Kuom ah giephuol a sat uhi.

³⁴Hizongle Gideon tungah TOPA’ hlagau tung hi; tuale ama in pengkul gingsah a, ama a zui dingin Abiezer-te kihlan hi.

³⁵Ama in Manasseh gam zosie-ah kamtaite sawl a, amate zong ama zui dingin kihlan hi. Ama in Asher, Zebulun, le Naphtali-te kungah zong kamtaite sawl a, ama tawh kimu dingin a peito uhi.

³⁶Tua ciengin Gideon in Pasien kungah, “Na gensa bangin keima’ khut tawh Israel-te na tatkhiet ding lam ka thei nadingin,

³⁷bucilna kem tungah tuumul lom khat ka koi ding hi. Tuumul tung behah daitui omin leilah zosie a na gaw leh, na gensa bangin ka khut tawh Israel-te na tatkhiet ding lam ka thei ding hi,” a ci hi.

³⁸Tua bangma-in a pieng hi. A zing ciengin ama thobai-in a tuumul tui a hiakang leh tuumul panin daitui kuongkum khat dim a hiakang hi.

³⁹Tua ciengin Gideon in Pasien kungah, “Kei tungah lungthah sin, khatvei ei hamsah lai in; tuumul tawh khatvei beh ei sinsah lai in; kang thum hi. Tuumul tung beh gawsah inlen, leilah zosie-ah daitui omsah in,” a ci hi.

⁴⁰Khum zanin Pasien in tua bangma-in a bawl hi. Tuumul tung beh gaw a, leilah zosie-ah daitui a om hi.