Read Zou THUKHENTE 7 Bible Online

THUKHENTE 7 - Zou bible

THUKHENTE 7

¹Tua ciengin Jerubbaal (tua pen Gideon) le ama tawh a omton galkapte zingmawngin thobai-in Harod tuikhuh gei-ah giephuol a sat uhi; tuale Midian-te’ giephuol pen amau’ opna leilu lam, Moreh muol nei,[25] kuom sungah a om hi.

²TOPA in Gideon kungah, “A khut sung vuah Midian-te ka pieh nadingin nang tawh a omton galkapte tam luo hi. Israel in min phatna teng kei tung panin la-in, ‘Ka hatna in keima ei hunkhie zo hi,’ ci kha ding hi.

³Tua ahi ziehin tu-in galkapte’ zahin tangtawh inlen, ‘Zau le linga a om poma inn ah kilekia ta un,’ ci-in,” a ci hi. Tua bangin Gideon in amate sittel hi;[26] tul sawmni le tulni kilekia-in tul sawm omlai hi.

⁴Tua ciengin TOPA in Gideon kungah, “Galkapte a tam na lai hi; tui opna-ah peipisuh inlen, khum munah nang adingin amate ka sittel ding hi. Keima in, ‘Tam pa tawh na kuon ding hi,’ ka ci ciengin nang tawh ama kuon ding hi; tuale, ‘Tam pa tawh na kuon sih ding hi,’ ka ci ciengin nang tawh ama kuon lo ding hi,” a ci hi.

⁵Tuaci’n ama in tui opna-ah galkapte zawpisuh hi; tuale TOPA in Gideon kungah, “Ui in tui a lie banga a lei tawh tui a lieh zosie a langkhatah na koi ding hi; tui dawn dingin khupdinin a kam[27] sunga a khut koi zosie adang khatah na koi ding hi,” a ci hi.

⁶A lei tawh tui a lieh mi zathum pha hi; ahi vangin adang galkap zosie in tui dawn dingin a khupdin uhi.

⁷Tua ciengin TOPA in Gideon kungah, “Tui a lieh mi zathum tawh kang hunkhie ding a, na khut sungah Midian-te kang pie ding hi. Adangte zosie a inn vuah peisah ta’n,” a ci hi.

⁸Tuaci’n ama in a khut[28] sung panun galkapte’ tuithawlte le a pengkulte uh a la hi; tuale Israel dangte a puonbuh vuah peisah a, ahi vangin mihing za thumte a omsah hi. Midian-te’ giephuol pen ama’ opna nei kuom sungah a om hi.

⁹Khum zan ma-in TOPA in ama kungah, “Tho inlen giephuol sim in; azieh pen na khut sungah kang pie zo hi.

¹⁰Na sim ngam sih leh, giephuolah na nasempa Purah tawh peisuh in;

¹¹tua hile a thu gen uh na za ding a, tua zaw ciengin giephuol sim nadingin na khutte ang thakhauh ding hi,” a ci hi. Tua ciengin giephuola om galkapte galpanna munah a nasempa Purah tawh a peisuh uhi.

¹²Kuom dung tengah Midian-te, Amalek-te le nisuona lam mite zosie a lum vua, kauphe bangin a tam uhi; tuale a kalaohte uh tam seng ahi ziehin tuipi gei-a senel bangin kisim zo lo hi.

¹³Gideon a tun ciengin mi khat in a guolpa kungah mang khat na gen hi; tuale ama in, “Mang khat ka man hi, tua ka mangin Midian-te’ giephuol sungah mangbuham tawh a kibawl moh lum khat ang kilia-in puonbuh ban a, tua puonbuh sat kha-in a pua hi; tua puonbuh kikhulehin tuolah a kiphengpha ta hi,” a ci hi.

¹⁴A guolpa in, “Tam pen Israel mi Joash’ tapa Gideon’ namsau lo adang hi vawt lo hi; Pasien in a khut sungah Midian-te le a galkap zosie pie zo hi,” ci-in a dawng hi.

¹⁵Gideon in a kigen mang le a khietna a zah ciengin ama in Pasien bie-in Israel-te’ giephuolah kilekia hi; tuale ama in, “Tho un; azieh pen TOPA in na khut sung vuah Midian galkapte hing pie zo ta hi,” a ci hi.

¹⁶Ama in mi zathumte pawl thumin a khen zaw ciengin a unpi-un a khut vuah pengkulte le a sungah meila kiguong beelhawmte a tawisah a,

¹⁷ama in, “Kei ei en unlen, ka bawl bangin bawl un. Giephuol mong ka tun ciengin ka bawl bangin bawl un.

¹⁸Kei le ka ompi zosie in pengkul kang tum ciengun, note in zong giephuol kimvel zosie-ah pengkul hing mut pai unlen, ‘TOPA le Gideon ading,’ ci-in awng un,” a ci hi.

¹⁹Tuaci’n Gideon le a ompi mi zakhat in galvil a laita pen a kihlen laitahin giephuol mongah pei-in pengkul a mut uhi; tuale amate in a khut sung vua om beelte a satkeh uhi.

²⁰Tuaci’n amate in a pawl thumun pengkul mutin beelte a satkeh vua, veilam khut tawh meila tawi-in zietlam khut tawh a mut ding uh pengkul a tawi uhi; tuale amate in, “TOPA le Gideon ading namsau khat!” ci-in a awng uhi.

²¹Giephuol kimvela a mun ciet panun a unpi-un a ding vua, giephuol sunga om mi zosie tai-in a tai kawmun a awng uhi.

²²Pengkul zathum a tum ciengun, TOPA in namsau tawh a galte zosie khatlekhat kivatsah hi; tuale Zererah[29] lam manaw-in Beth-shittah cieng, le Tabbath gei Abel-meholah gamgi dongin galkapte a taimang uhi.

²³Naphtali, Asher, le Manasseh-te zosie sung panin Israel mite kihlan a, tuaci’n amate in Midian-te a del uhi.

²⁴Tua ciengin Ephraim muoltung gam zosie-ah Gideon in kamtaite sawl a, “Midien-te do dingin hing kuonsuh unlen, a tuite uh Beth-barah dong le Jordan dongin lahpieh un,” a ci hi. Tuaci’n Ephraim mi zosie kihlan a, Bethbarah dong ciengah luite a la vua, Jordan zong a la uhi.

²⁵Midian-te makai nite Oreb le Zeeb a man vua, Midian-te a del kawmun Oreb suongpi-ah Oreb thatin, lenggasuhna-ah Zeeb that uhi. Jordan gala om Gideon kungah amate in Oreb le Zeeb’ lutangte a peipi uhi.