Read Zou THUKHENTE 8 Bible Online

THUKHENTE 8 - Zou bible

THUKHENTE 8

¹Tua ciengin Ephraim-te in ama kungah, “Midian-te do dinga na kuon lai-in kote nei ciel lo khu bang dan a nei bawl ahiei?” a ci uhi. Tuaci’n amate in nahpitahin ama a mawsiet uhi.

²Tuaci’n ama in amate kungah, “Note tawh tekah dingin ken tu-in bang bawl zo tuon ka hei? Abiezer lengga i law sangin Ephraim-te’ lengga sangh i khon ma hoizaw hi lo amah?

³Pasien in na khut sung vuah Midian makaite Oreb le Zeeb ang pie zo ta hi; note tawh tekah dingin ken bang ka sem zo tuon mawh ahei?” a ci hi. Ama in tam thu a gen ciengin ama tunga a lungthahna uh a veng hi.

⁴Tua ciengin Gideon le ama tawh a om mi za thumte, Jordan ah tungin a galkai vua, basamin a gil uh kiel mama hi.[30]

⁵Tuaci’n ama in Succoth-te kungah, “Kang thum hi, ka nuazuite mohlum halkhat pie un, azieh pen amate a husam ta vua, kei ka hi leh Midian kumpite Zebah le Zalmunna ka nuadel laitah ahi hi,” a ci hi.

⁶Ahi vangin Succoth uliente in, “Na galkapte moh ka pieh nadingun na khut sungah Zebah le Zalmunna a om zo ta amah?” a ci uhi.

⁷Gideon in, “Tua ahile hoi pai ei, TOPA in ka khut sungah Zebah le Zalmunna ei pieh zaw ciengin gamlah lingte le lingkungte tungah na tahsa uh ka tuoncil ding hi,” ci-in a dawngkia hi.

⁸Tua mun panin Penuel ah peito-in a kung vuah tam bangma-in a ngen leh Penuel-te in zong Succoth-te’ dawn bang ma-in na dawngkia uhi.

⁹Tuaci’n Penuel-te kungah, “Guolzo-a kang kilekia tah ciengin tam tausang ka satguoi ding hi,” a ci hi.

¹⁰Tu-in Zibah le Zalmunna-te, nisuona lam mite’ galkapte zosie sung pan a omlai teng, mi tul sawm le tulnga bang a pha lai a galkapte utawh, Karkor ah a om uhi; bangzieh ahei cile galhiem a tawi thei mi tul za le tul sawmni si zo hi.

¹¹Tuaci’n mihonte in a tot uh Nobah le Jogbelah nisuona lampi zui-in Gideon pei-in galkapte a sim hi; azieh pen a galte a kiging kha sih uhi.

¹²Zebah le Zalmunna tegel a taimang uhi; tuale ama in nuadel pai-in Midian-te’ kumpi nite ahi Zebah le Zalmunna manin a galkap zosie a patausah hi.

¹³Galsimna panin Heres katona lam zui-in Joash’ tapa Gideon a kilekia hi.

¹⁴Ama in Succoth-te tangval khat manin thu dong hi; tuale tua pa in ama adingin Succoth uliente le upate sawmsagi le sagi a min a gielpieh hi.

¹⁵Tua ciengin Succoth-te kungah ama va tung a, “Note in kei kungah, ‘A basam na galkapte moh ka pieh nadingin na khut sungah Zebah le Zalmunna a om zo ta amah,’ ci-a nei galgihna uh Zebah le Zalmunna tanah om hi,” a ci hi.

¹⁶Tuaci’n ama in khuo upate manin gam lingte le lingkungte la-in tuate tawh Succoth-te a tuoncil[31] hi.

¹⁷Ama in Penuel tausang satguoi a, tua khuomite zong that hi.

¹⁸Tua ciengin ama in Zebah le Zalmunna kungah, “Tabor-a na thate uh a bangci mite ahi vuoi?” a ci hi. Ama gel in, “Amate a unpi-un nangma a bang uhi; amate, kumpipa’ tate tawh a kisun uhi,” ci-in a dawng uhi.

¹⁹Ama in, “Amate pen ka sanggamte, ka nu’ tate ahi uhi; TOPA a hing ahi ma bangin amate na hinkhawi hi locin ken zong note kang that sih ding hi,” ci-in a dawngkia hi.

²⁰Tuaci’n ama in a tapa tapen Jether kungah, “Pei inlen amate va that ta vawi!” a ci hi. Ahi vangin tangval pa in a namsau dawh ngam lo hi, azieh pen ama naupang lai hi.

²¹Tua ciengin Zebah le Zalmunna in, “Hing pei inlen ei that in; azieh pen pasal in pasal tha ma puo bo,” a ci uhi. Tuaci’n Gideon dingto a, Zebah le Zalmunna thatin a kalaoh uh’ ngawnga hlade lim tawh kibang kizepnate a la hi.

²²Tua ciengin Israel-te in Gideon kungah, “Nang le na tapa le na tupa in zong kote ei uh ta un; azieh pen kote Midian-te’ khut sung panin nei hunkhie zo ta hi,” a ci uhi.

²³Gideon in a kung vuah, “Note kang uh sih ding a, ka tapa in zong ang uh sih ding hi; TOPA in note ang uh ding hi,” a ci hi.

²⁴Tua ciengin Gideon in amate kungah, “Na kung vuah kang nget nuom khat om hi; van kinuasie na lah sung panun bilba khat ciet ei pie un,” a ci hi. (Azieh pen tua galte[32] Ishmael-te ahi ziehin kham bilbate a nei uhi.)

²⁵“Kiphaltahin tuate kang pie ding uhi,” ci-in a dawng uhi. Tuaci’n puon a pha vua, mi zosie in a lah uh van kinuasie sung panin tua puon tungah bilbate a sep uhi.

²⁶Ama in a nget kham bilbate a gihna pen kham shekel tulkhat le zasagi pha hi. (Midian kumpite zah hlade lim kizepnate, khainiengte, puon dupsante le a kalaohte uh ngawng kimvela om ngawng-awte kisim lo hi.)

²⁷Gideon in tua teng panin siempu puon[33] khat bawlin ama khuopi Ophrah khuo-ah koi hi; tuale Israel-te zosie in tua munah siempu puon bie-in a pahtat vua, Gideon le a innkuonpite adingin thang khat a suoh hi.

²⁸Tuaci’n Israel-te mai-ah Midian-te guol lelin a lu a phongkia zo nawn sih uhi. Tuaci’n Gideon’ khang sungin tua gam in kum sawmli sung tawlngah hun nga hi.

²⁹Ama inn ah Joash’ tapa Jerubbaal pei-in a teng hi.

³⁰Tu-in Gideon in ama’ hin tehteh tapa sawm sagi nei hi, azieh pen ama in zi tampitah nei hi.

³¹Shechem-a teng a meinu in tapa khat nei a, ama in a min Abimelech a phuo hi.

³²Tua ciengin Joash’ tapa Gideon vuoisi a, Abiezer-te gam Ophrah khuo-a om a pa Joash’ hanah kivui hi.

³³Gideon a si zaw behin Israel-te kiheikia-in Baal-te tawh a pahtatkia vua, a pasien uh dingin Baalberith a bawl uhi.

³⁴Israel-te in mun zosie panin a galte zosie’ khut sung pan amate a hunkhie TOPA a Pasien uh a phawhkha nawn sih uhi;

³⁵tuale Jerubbaal (Gideon a kici) in Israel-te tungah a na bawlsa sil hoite zosie ziehin amate in Jerubbaal innkuonte tungah lungdamna bangma a lah sih uhi.