Read Zou THUKHENTE 9 Bible Online

THUKHENTE 9 - Zou bible

THUKHENTE 9

¹Tu-in Shechem-a a nu’ sanggamte kungah Jerubbaal’ tapa Abimelech haw a, a nu’ be le phungte zosie kungah,

²“Shechem-a ulien zosie’ zah dingin gen inlen, ‘Jerubbaal tapa sawmsagite in ang uh ding ule mi khat in ang uh ding, no adingin koi hoi zaw ahei?’ a ci hi. Kei na gu le na sa uh ka hi lam zong phawh un,” a ci hi.

³Tuaci’n a nu’ sanggamte in ama tangin Shechem ulien zosie’ zah dingin tam thu teng a gen uhi; tuale Abimelech zui ding lamah a lungsim uh a hawi hi, azieh pen amate in, “Ama i sanggam pa ahi hi,” a ci uhi.

⁴Baal-berith biehinn panin nguntang peh sawmsagi ama a pie vua, tuaci’n Abimelech in ama’ nua a zui, kimanna a nei lo le mi ngoltolte tua tawh a ciel hi.

⁵Ophrah-a a pa’ inn ah ama pei-in suong khat tungah Jerubbaal’ tapa a sanggam sawmsagite that hi; hizongle Jerubbaal’ tapa tumpen Jotham suohta hi, a zieh pen ama kiphuol hi.

⁶Tua ciengin Shechem ulien zosie le Beth-millo khuo mite zosie a kikhawm vua, tuaci’n pei-in amate in Shechem-a gangpi song[34] gei-ah Abimelech kumpi a suohsah uhi.

⁷Jotham kungah tua thu a kigen ciengin ama pei-in Gerizim Muol dawnah ding a, nahpi-in kiko-in a kung vuah, “No Shechem uliente aw, Pasien in na thu uh ang ngaipieh nadingin ka thu ngai un.

⁸Ni khat, a kumpi ding uh sathau nu dingin singkungte a kuon uhi. Tuaci’n amate in olive kung kungah, ‘Ko ei uh in,’ a ci uhi.

⁹Olive kung in a kung vuah, ‘pasien-te le mite kipatawina ka thaute nuasie-in singkungte uh dingin hing pei ding ka mah?’ ci-in a dawng hi.

¹⁰Tua ciengin singkungte in theikung kungah, ‘Hing pei inlen, ko ei uh in,’ a ci uhi.

¹¹Hinanle theikung in amate kungah, ‘Ka hlumna le ka ga tuituohte nuasie-in singkungte uh dingin hing pei ding ka mah?’ ci-in a dawng hi.

¹²Tua ciengin singkungte in lenggui kungah, ‘Hing pei inlen, ko ei uh in,’ a ci uhi.

¹³Hinanle lenggui in a kung vuah, ‘pasien-te le mite a lungnuomsah ka zu nuasie-in singkungte uh dingin hing pei ding ka mah?’ a ci hi.

¹⁴Tuaci’n singkung zosie in thangling kungah, ‘Hing pei inlen, ko ei uh in,’ a ci uhi.

¹⁵Thangling in singkungte kungah, ‘Lungsim tahtah tawh na tung vuah kumpi dinga sathau nei nu sawm uleh, hing pei unlen, ka hlim-ah hing bu un. Tua ahi sihle thangling kung pan mei pusuohin Lebanon taamtahte katum taheh,’ a ci hi.

¹⁶“Tua ahi ziehin tu-in lungsimtah le zatahna tawh kumpi-in Abimelech bawlin, Jerubbaal le a innkuonte zong limbawlin ama’ sepsate tawh kituoha a gamta ma na hi uh amah,

¹⁷a zieh pen ka pa in a luong khamin gal hing do piehin Midian-te’ khut sung panin ang hunkhie zo uhi;

¹⁸ahi vangin tuni-in ka pa’ innkuon na ledo vua, a tapa mi sawmsagite suong khat tungah thatin, a sila numei tawh a nei a tapa Abimelech zong na sanggampa uh a hina hang tawh Shechem uliente tungah kumpi-in na bawl vua-

¹⁹keima in kang ci-in, note in tuni-in lungsimtah le zatahna tawh Jerubbaal le a innkuonpite tunga na bawl uh ahi po leh, note zong Abimelech tungah lungdam unlen no tungah zong ama lungdam taheh;

²⁰ahi vangin tua bang ahi tahpi sih leh Abimelech sung panin meikuong pusuoh hinlen Shechem le Beth-millo uliente katum taheh. Shechem le Beth-millo uliente sung panin meikuong pusuoh hinlen, Abimelech katum taheh,” a ci hi.

²¹Tua ciengin a sanggampa Abimelech a giin ziehin Jotham taimangin Beer khuo-ah pei-in tua munah a teng hi.

²²Abimelech in Israel-te tungah kum thum sung uh hi.

²³Ahi vangin Pasien in Abimelech le Shechem uliente kikalah hlagau gilo khat sawl hi; tuale Abimelech tungah Shechem uliente a zuoutat uhi.

²⁴Jerubbaal’ tapa sawmsagite tungah tatsietna phu[35] a kilah thei nading, amate a that a sanggampa uh Abimelech, le a sanggamte tha nadinga ama’ khut a thahatsah Shechem uliente tungah amau’ sisan luonna paat a tun thei nadinga tami thu pieng ahi hi.

²⁵Tuaci’n Shechem khuo uliente in ama tungah a galbawlna-un muol dawn tengah a buhdap ding mi a koi vua, tua lampi-a pei zosie na suom uhi; tuale Abimelech tungah tua thu kipuoh hi.

²⁶Ebed’ tapa Gaal a sanggamte tawh Shechem-ah a kituon vua, Shechem uliente in ama a muong uhi.

²⁷Amate lo kuonin a lenggui panun lengga khawmin a cil vua, pawi a bawl uhi. Tua ciengin a pasien uh’ inn sungah lutin an ne tui dawnin omin Abimelech a zako uhi.

²⁸Ebed’ tapa Gaal in, “Ama’ na i seppieh va-ia nadingin Abimelech koi hi a, ei Shechem mite koi i hi uh ahei? Jerubbaal’ tapa le ama’ ulien Zebul in Shechem’ pa Hamor-te’ na sem uh hi lo amah?

²⁹Tam mite ka khut nei hi uleh izaw! Tua hile Abimelech suon dawhin ama kungah, ‘Na galkap khan inlen hing kuon in,’ ka ci ding hi,”[36] a ci hi.

³⁰Khuopi a uh Zebul in Ebed’ tapa Gaal’ kammalte a zah ciengin a sin a so hi.

³¹Ama in Arumah-a[37] om Abimelech kungah kamtai sawlin, “En in, Shechem-ah Ebed’ tapa Gaal le a sanggamte ang pei ta vua, nang hing langpangin khuopi a tawhnawi[38] uhi.

³²Tua ahi ziehin tu-in na ompi galkapte tawh zanin pei-in lozau-ah na buhdap un.

³³Tua ciengin zingmawng ni ang suo behin tho unlen khuopi sim un; a ompi galkapte tawh nang do dinga ang kuon ciengin a tung vuah na hi thei tawpin na bawl in,” cisah hi.

³⁴Tuaci’n Abimelech le a ompi galkap zosie zanin a tho vua, Shechem sim dingin pawl li kisuo-in a buhdap uhi.

³⁵Ebed’ tapa Gaal pusuohin khuopi tunkot lutna-ah a din ciengin Abimelech le a ompi galkapte zong a kibuhna panun dingto uhi.

³⁶Gaal in amate a mu ciengin Zebul kungah, “En in, muolvum panin mite hing kumsuh!” a ci hi. Zebul in a kungah, “Muol hlimte mi banga na mu hi bo va,” a ci hi.

³⁷Gaal hamkia-in, “En in, Tabbur-erez panin mite ang peisuh a, Elon-meonenim lam panin mi pawlkhat ang pei uhi,” a ci hi.[39]

³⁸Tua ciengin Zebul in ama kungah, “A na ka sep nadingun Abimelech koi ahiei?’ ci-a na kisielna[40] tu-in hei sungah a om ta e? Tu-in kuon unlen amate tawh kido un,” a ci hi.

³⁹Tuaci’n Shechem uliente mai-ah Gaal kuonin Abimelech tawh a kido hi.

⁴⁰Abimelech in ama del a, a mai-ah ama a tai hi. Kulpi tunkot lutna cieng dong mi tampi liemin a puamat uhi.

⁴¹Tuaci’n Arumah-ah Abimelech a teng hi; tuale Shechem-ah amate a ten thei nawn lo nadingun Zebul in Gaal le a sanggamte a notmang hi.

⁴²A zing ciengin lozau-ah mite a pei vua, tuale Abimelech kungah tua thu a kigen ciengin

⁴³a galkapte a peipi a, pawl thumin khenin lozau-ah a buhdap uhi. Ama khuodahin khuopi panin mite ang kuonkhie a mu ciengin amate do dingin kipanin a thatgam sieng hi.

⁴⁴Adang pawl nite in lozau-a mi zosie gamdelin a tha laitahun, thakhatthu-in, Abimelech le a ompi[41] a pawlte mai a nawt vua, khuopi lutna tunkotah na ding uhi.

⁴⁵Abimelech in tua ni sung tungtawnin khuopi sim hi; ama in tua khuopi la-in a sunga om mite that hi; tuale ama in tua khuopi susie-in ci a the hi.

⁴⁶Shechem Tausang uliente zosie in tua thu a zah ciengun El-berith biehinnpi, mun muonhuoi sungah a lut uhi.

⁴⁷Shechem Tausang ulien zosie a kikhawmtuo ta uhi, ci-in Abimelech kungah kigen hi.

⁴⁸Tuaci’n a ompi galkap zosie tawh Zalmon Muol tungah Abimelech a kuonto hi. Abimelech in a khutin hei khat la-in geupakang lomkhat sat a, tuate lato-in a liengko-ah a puo hi. Tua ciengin a ompi galkapte kungah, “Ka bawl nei musa bangun ka bawl bang bangin mallangin bawl un,” a ci hi.

⁴⁹Tuaci’n galkap zosie in geupakang a tom vua, amate in Abimelech zui-in mun muonhuoi sim nadingin a koi vua, mun muonhuoi mei tawh halin Shechem Tausang mi zosie, numei pasal mi tulkhat bang a si hi.

⁵⁰Tua ciengin Thebez ah Abimelech pei a, Tebez simin giephuol sat a, tua khuo a la hi.

⁵¹Ahi vangin tua khuopi sungah tausang muonhuoi khat om a, numei pasal zosie le khuopi ulien zosie tua sungah tai-in kot a kikhalu vua, tausang khumvumah a kato uhi.

⁵²Tausang tungah Abimelech pei-in tua khuopi sim a, mei tawh hal dingin tausang kotkhah a nai hi.

⁵³Ahi vangin numei khat in Abimelech’ lutungah an gawina suongpeh tungnung khat khiesuhin a lugu a keh hi.

⁵⁴Ama in a galvan tawi tangvalpa mallangin hlanin ama kungah, “Mite in, ‘Numei khat in ama that hi,’ a ci lo nadingin na namsau dawh inlen ei that in,” a ci hi. Tuaci’n tangvalpa in a namsau tawh sun pailetin ama a si hi.

⁵⁵Israel-te in Abimelech si a mu ciengun a unpi-un inn lam a zuon uhi.

⁵⁶Tua bangin a sanggam sawmsagite thatin a pa tunga a khielna ziehin Pasien in Abimelech’ khielna a thuhkia ahi hi;

⁵⁷tuale Pasien in zong Shechem mite’ gitlonate zosie a lu tung vua tukia dingin bawl a, a tung vuah Jerubbaal tapa Jotham’ samsietna a tung hi.