Read Zou 3 JOHN 1 Bible Online

3 JOHN 1 - Zou bible

3 JOHN 1

¹Khangham pa in thuman thutah sunga om ka lawm it Gaius tungah.

²Ka lawm it aw, na hlagau a cidam bang ma-in na zosie ah na lawcin thei nading le na cidam thei nading thu ka ngen hi.

³Lawmte[1] pawlkhat ang tungin thuman thutah sungah na muonhuoina le thuman thutah sungah na kalsuon dan ang gen ciengun ka na kipah mama hi.

⁴Ka tate thuman thutah ah a kalsuon ka zaha ka kipahna za sangin a lienzaw kipahna ka nei sih hi.

⁵Ka it lawm aw, amate gelta hi napi lawmte[2] tunga na bawl bangin amate tungah muonhuoi tahin na bawl hi;

⁶amate in hlattuom pawlpite mai-ah note’ itna thu teci a pang uhi. Pasien tungah gamtat dinga a kilawm za-in a lampi vuah amate na hla lacin sil hoi bawl na hi ta ding hi;

⁷bangzieh ahei cile amate pen Khris’[3] min hang tawh khuolzin kipan ahi bo vua, thu um lo mite[4] tung panin bangma panpina a nga sih uhi.

⁸Tua ahi ziehin thuman thutah tawh nasem tonte i suo thei nadingin tua bang mite i hu ding vua kilawm ahi hi.

⁹Hlattuom pawlpi tungah lai pawlkhat ka hlah zo a, ahi vangin lamkai suoh nuom pa ahi Diotrephes in ka thu ei mang nuom sih hi.

¹⁰Tuaci’n kang haw khah leh kote tungah aman lo-a ei mawsahna le ei gensietna teng kang phawhsah ding hi. Mi gensietna tawh lungkim nai vaset loin, lawmte[5] zong zin tungsah nuom lo a, a tungsah nuomte nangawn khamin hlattuom pawlpi panin a hawlkhie hi.

¹¹Kang it lawm aw, thusiete ette loin, thu hoite ette zaw in. A hoi-a gamta poma Pasien pan ahi hi; a sie-a gamta poma Pasien a mu nai lo ahi hi.

¹²Mi zosie in Demetrius a phat vua, tua thuman thutah mama in zong teci a pang hi. Kote in zong ama ka phat vua, ka teci panna uh a man lam na thei hi.

¹³Na kungah giel ding tampi ka nei a, ahi vangin laitui le laikung tawh giel ka sawm sih hi;

¹⁴nang tawh kimu bai ding ka lamen a, kimaitang tuo-in i kiho ding hi.

¹⁵Nang tungah nopna hing tung taheh. Lawmte in zong ang noset uhi. Khum sunga om lawmte a milipin khatciet ei na noset pieh in.