Read Zou JUDE 1 Bible Online

JUDE 1 - Zou bible

JUDE 1

¹Jesu Khris’ nasem[1] khat le James’ sanggam pa Jude[2] in, Pa Pasien sunga[3] it le ngaite[4] le Jesu Khris dinga[5] a bihtaha kikem a kihlansate tungah lai kang hlah hi:

²Hepina, lungmuonna le itna tampite no-a’ hing hi taheh.

³Ka itte aw, na kung vuah i neiton uh hutdamna ka giel nuom mama laitahin, mi siengthote tungah a kimang den dinga khatvei beh a kipie tua upna adingin gal na do nading uh kutna lai giel ding a kisap lam ka mu hi.

⁴Bangzieh ahei cile tanglai-a kipanin tami mawsah thukhenna a thuoh dinga eite lahah a na kisesa Pasien a zatah lo mi honkhat ang dap lut zo a, amate in i Pasien uh’ hepina pen numei-pasal thangtatna lamah hei-in eite in i neisun uh ahi Mangpa le TOPA Jesu Khris a niel uhi.[6]

⁵A kicinga na theisa uh hizongle note in a kimang den dinga khatvei beh tawh a mite a hunkhie[7] pa TOPA in a nua ciengin Egypt gam hunkhie-in, a um lo mite a suhsietna thu kang phawhsah kia nuom hi.

⁶Ama in ni thupi ni-in thukhenna thuoh dingin a panmun kemcing loin a tenna a nuasie vantung mite zong khuomiel thuhpi sungah tawntung siakhau tawh a khicip hi.

⁷Sodom, Gomorrah le a kimvela om khuopi mite zong amate bangin gamta-in numei-pasal pahtatna le mihing ngaina dan ahi lo cilesa lunggulna lamah a kipumpieh ziehun mite’ ette dingin kumtawn meikuong tawh gawtna a thuoh uhi.

⁸Ahi vangin tua bang ma-in mangmante in a tahsa uh a buasah vua, thuneina zong nielin a minthanna a neite[8] a gensie uhi.

⁹Hinanle vantungmi mangpa Michael in dawimangpa tawh Moses luong kitu-in a kisel laitahun, dawimangpa tungah mawsah gensietna kammal zang ngam loin, “TOPA in nang ang phawhsie hi,” beh na ci hi.

¹⁰Hizongnanle tam mite in a thei lo uh thu khatpopo a mawh gensiet vua, ngaisutna a nei lo ganhingte bangin a pienpi lungsim utawh a thei uh thute in amate a susie hi.

¹¹Amate in gimna a thuoh ding uhi! Bangzieh ahei cile sum nga thei nadingin Cain lampi zui-in Balaam khielna-ah amau le amau a kipiekhie vua, tuaci’n Korah ledona-ah a kisie sieng uhi.

¹²Tua mite pen na itna pawi vua a nieh bangte[9] ahi vua, zum mel nei loin no tawh an ne tonin amau le amau an kivate ahi uhi.[10] Hui in a mut kawikawi guo lah a zusah bep lo meei tawh a kibang vua, amate ga a ga lo, nivei a si, a kiphungkal phalbi singkungte ahi uhi.

¹³Amau’ maizumna pen a phuonsah tuipi huol husiete le a leng kawikawi aahsite tawh kibang ahi vua, amate adingin a tawntungin khuomiel thuhpi kikoipieh zo hi.

¹⁴Adam panin a khang sagina Enoch in tami thute a na magen zo ta a, “En un, a misiengtho tul sawm tampite tawh TOPA hing pei-in,

¹⁵mi zosie tungah thu khen ding le, milip in tua banga a bawl uh ahi Pasien zatah lo gamtat ziete le Pasien zatah lo mawneite in ama langpanin a gen khah uh kamkhau zosie a mawsah ding hi,” a ci hi.

¹⁶Tam mite ahile a phun hatte le lungkim hun a nei ngai lote ahi uhi; a lunggulna bangun a gamta uhi; amate ahile kam dimdimin hamin a phattuom nading vua mi maipah siemte ahi uhi.

¹⁷Ahi vangin ka itte aw, i TOPA Jesu Khris’ sawltahpite in na kung vua ang genkholsa thute phawh un.

¹⁸Bangzieh ahei cile amate in, “Hun nukhia ciengin Pasien zatahna zie ahi lo a pumpi uh’ deigawna lam a zui mi simmawte ang pieng ding hi,” ci-in note tungah ang gen zo uhi.

¹⁹Tua bang mite pen hlagau nei lo, kikhenna a piengsah a tahsa tai mite ahi uhi.

²⁰Hinanle no ka itte aw, a siengtho pen na upna uh tungah noma le noma kilam unlen, Hlagau Siengtho tawh thu ngen un.

²¹Pasien’ itna sungah noma le noma kikem un; kumtawn hinna ang tun ding ahi i TOPA Jesu Khris’ khuotuona na lamen bo un.

²²A lungkaa mi pawlkhat khuotuo un;

²³meikuong sung panin midangte kaikhie-in hunkhie un; amau’ tahsa zieha a buabang a puonsilte nangawn uh muda-in zauna tawh midangte tungah khuotuona na nei un.

²⁴Tu-in na pua lo nading vua ang kem zo pa, mawsahna om loin ama’ minthanna munah kipahna tawh ang tut zo pa,

²⁵i TOPA Jesu Khris tungtawnin hunpa Pasien khat beh tungah minthanna thupina, vanglietna le thuneinate in a tawpsa hun zosie-a kipanin tu le kumtawnin hing om den taheh, Amen.