Read Zou KILAHNA 1 Bible Online

KILAHNA 1 - Zou bible

KILAHNA 1

¹Tami pen a sawt lo-a ang tung bai ding, a nasemte[1] tungah a lah dinga Pasien in ama a pieh Jesu Khrist kilahna ahi hi; ama in vantung mite sawlin ama’ nasempa[2] John theisah a,

²John in Pasien’ thu le Jesu Khris’ teci panna a mu zosie nangawn teci a pang hi.

³Tua kamsanna thute a ginga a simte mi hampha ahi a, a sunga kigiel thute za-in a zui mite mi hampha ahi hi; azieh pen a hun a nai ta hi.

⁴John in Asia gam sunga om hlattuom pawlpi sagite kungah: Tuhun, a tawpsa hun, le mailam huna ang om lai ding pa le ama’ topha mai-a om hlagau sagite pan le,

⁵a muonhuoi teci pa, misite lah panin a suoh masa pen, leitung kumpite a uhpa, Jesu Khris tung pan hepina le lungnopna note tungah hing om taheh. Eite ei it a, a sisan ziehin i mawnate panin ei suohtasah, [3]

⁶ama’ Pa Pasien nasem dinga kumpi le siempu ei suohsah pa tungah a tawntungin minthanna le uhzawhna om den taheh. Amen.

⁷En un! Meiipi tawh ama ang pei hi; mit zosie in ama mu ding a, ama a sun mite nangawnin mu ding uhi; ama ziehin leitung minam zosie a kap ding uhi. Tua bang ang hi ding hi. Amen.

⁸Tuhun, a tawpsa hun, le mailam huna ang om lai ding a Vanglien TOPA Pasien in, “Keima a kipatna le a tawpna ka hi hi,” a ci hi.

⁹Jesu sungah bawlsietna-a kipan kumpi gam ahi a, lungduoina tawh thuohzawhna ahi zongin, note tawh a thuohton na sanggam uh keima John in Pasien’ thu le Jesu’ teci panna[4] ziehin Patmos a kici tuikul ah ka om hi.

¹⁰TOPA’ ni-in hlagau-ah omin ka nua lamah pengkul banga a gin ngai mama aw khat ka za a,

¹¹“Na mu teng laibu khatah giel inlen, hlattuom pawlpi sagite ahi Ephesus, Smyrna, Pergamum, Thyatira, Sardis, Philadelphia, le Laodecia-te tungah hlah in,” ei ci hi.

¹²Tua ei hopi awging mu nuomin ka kihei leh kham meivah tunna sagi ka mu a,

¹³tua meivah tunnate laikim ah puontuolpi silin a awm-ah kham awmgah a gah Mihing Tapa tawh a kibang khat ka mu hi.

¹⁴A lutang le a sam tuumul bangin kangin vua bangin paa hi; a mittangte meikuong kileh tawh kibang hi.

¹⁵A keng pen pummei sunga sumngo kihal sieng kinawtval bang a, a awgin pen tui tampi a luongton ging tawh kibang hi.

¹⁶A zietlam khutah aahsi sagi tawi a, a kam panin a langni-a a hiem namsau khat pusuoh hi. A maitang sunkim nisa tang pempom tawh kibang hi.

¹⁷Ama ka mu ciengin a keng zungah a si bangin ka pua hi. Ahi vangin ama in ka tungah a zietlam khut hing ngamin, “Zau sin; kei pen a kipatna le a tawpna ka hi a,

¹⁸a hing zing pa zong ka hi hi. Ka na si ngai a, en in, kumtawn kumtawna a hing zing ka hi hi; keima in Sina le Misi khuo tawhtangte ka nei hi.

¹⁹Tu-in na musa nate, tu-a om nate, tam zaw cienga ang pieng lai ding nate zosie giel in.

²⁰Ka zietlam khutah na mu aasi sagite le kham meivah tunna sagite’ thu tami ahi hi: Aasi sagite pen hlattuom pawlpi sagite’ vantung mite ahi a, meivah tunna sagite pen hlattuom pawlpi sagite ahi hi.