Read Zou KILAHNA 12 Bible Online

KILAHNA 12 - Zou bible

KILAHNA 12

¹Vantungah a gol lim lamdang khat ang kilang a, numei khat in puon sil bangin ni silin a keng nei-ah hlapi koi a, a lu tungah aasi sawm le ni tawh a kizem kumpi lukhu a khu hi.

²Tua numei pen a gai ahi a, nau suoh natna in a tut ziehin na sa-in a peng vagua hi.

³Tua ciengin vantungah lim lamdang adang khat ang kilang leuleu hi: gulhiempi a san a gol mama khat in lutang sagi le ki sawm nei-in, a lu tungah kumpi lukhu sagi khu hi.

⁴A mei in vantunga aasite sethum-suo-sekhat kaikhie-in tua teng leitungah kikhiesuh hi. Tua ciengin nau a suo lien cienga a neh thei nadingin nau suoh kuon numei nu mai-ah tua gulhiempi a ding hi.

⁵Numei ang suoh a, sia ciengkhut tawh minam zosie a uh ding ta pasal khat ang nei hi. Ahi vangin a tapa kila-in Pasien le a topha tungah kipeipi hi.

⁶Ni tul le zani le sawmguh sung a kiva dingin Pasien in a bawlpiehsa mun khatah tua numei nu a tai hi.

⁷Vantungah gal kidona ang om hi; Michael le ama’ vantungmite in gulhiempi a do uhi. Tua gulhiempi le vantungmite in zong a dokia vua,

⁸ahi vangin gal lel uh ahi ziehin vantungah amate adingin mun a om nawn sih hi.

⁹A gol mama gulhiempi, dawimangpa le Satan a kici leitung buppi a sol pa, tanglai gulpi lei ah kikhiesuh hi, ama pen a vantungmite tawh kikhiesuh hi.

¹⁰Tua ciengin vantungah aw ngai mama khat ka za a, “Tu-in i Pasien’ hutdamna, a vanglietna, a gam le ama’ Messiah[30] thuneina ang tung zo ta hi. Azieh pen i Pasien mai-ah i kithuopite[31] sun le zana mawsah pa kikhiesuh zo ta hi.

¹¹Hizongle amate in Tuuno sisan zieh le amau’ teci panna thu ziehin ama a zo uhi. Azieh pen amate in sina a thuoh dongun a nuntahna nangawn uh a it sih uhi.

¹²Tua hi a, no vantungte le a sunga tengte aw, kipah un! Ahi vangin leitung le tuipi in gimna a thuoh ding uhi, azieh pen dawimangpa in a hun a tom lamtah a thei ziehin lungthahna lienpi tawh na kung vuah ang peisuh hi!” a ci hi.

¹³Tuaci’n gulhiempi in leitungah ama a kikhiehsuh zo lamtah a thei bepin ama in ta pasal a nei numei ang del hi.

¹⁴Ahi vangin tua gulpi kung panin suohta-in hun khat, hunte, le hun lang[32] sung a kiva nading ama’ mun ahi gamlahah a len thei nadingin a gol mama muvanlai’ hla ni tua numei kipie hi.

¹⁵Tua ciengin tuikhang in numei a tawmang thei nadingin gulpi in a kam panin guntui bangin numei nu’ nua lamah tui a luongsah hi.

¹⁶Ahi vangin lei in numei nu panpi a, a kam kahin tua gulhiempi in a kam pana a pusuoh guntui a hupkang hi.

¹⁷Tua ciengin numei tungah gulhiempi thangpai a, Pasien’ thupieh a pomte, Jesu’ teci panna a pomte, le a omlai numei’ suonlehlahte sim dingin a kuonkhie hi.

¹⁸Tua ciengin tuipi gei-a senel tungah gulpi a ding hi.