Read Zou KILAHNA 16 Bible Online

KILAHNA 16 - Zou bible

KILAHNA 16

¹Tua ciengin biehinnpi panin a gin ngai mama aw khat in vantungmi sagite kungah, “Pei unlen leitungah Pasien’ thangpaina hai sagite va buo ta un,” a ci ka za hi.

²Tuaci’n vantungmi amasa pen pei-in leitungah a hai a buosuh leh gamsa ciemtena a nei le ama’ lim a bie mite tungah a kidahhuoi hima huoisie a tung hi.

³Vantungmi a nina in tuipi tungah a hai a buosuh leh tua tuipi pen misite’ sisan tawh kibang a, tuipi sunga a om hinna a nei ganhing zosie a sigam sieng hi.

⁴Vantungmi a thumna in gunte le tuinahte tungah a hai a buosuh leh tuate sisan a suoh sieng hi.

⁵Tuale tuite’ a uh vantungmi in, “Nang tulaitaha om, a omsa, Siengtho Pa aw, tam thu teng na khen ziehin nang na thutang hi;

⁶amate in mi siengthote le kamsangte’ sisan a luonsah ziehun, a thuoh ding vua a kilawm bangin a dawn ding uh sisan na pie zo hi!” a ci hi.

⁷Tuale maitam in, “Hi hi, Vanglien TOPA Pasien aw, na thukhente manin thutang hi!” ci-in a dawnkia ka za hi.

⁸Vantungmi a lina in ni tungah a hai a buosuh leh, ni in amate mei tawh a halgawp thei nadingin phalna kipie hi.

⁹A sa mama mei in amate lieu gawp a, hizongle amate in tam gimnate tunga thunei ahi Pasien’ min a gausam vua, kisiakia nuom loin ama a phat nuom sih uhi.

¹⁰Vantungmi a ngana in gamsa’ kumpi topha tungah a hai a buosuh leh ama’ gam teng khuo a miel hi; mite in na a sah ziehun a lei uh a pet vua,

¹¹tuale a thuoh uh natnate le a himate ziehun van Pasien a gausam vua, a gamtatna uh panin a kisia tuom sih uhi.

¹²Vantungmi a guhna in Eupharates gun golpi tungah a hai a buosuh leh nisuona lam panin kumpite peina lam siel khol dingin tua tui a gawkang hi.

¹³Tuale gulhiempi’ kam sung, gamsa’ kam sung, le zuou thei kamsangpa’ kam sung panin ukeng tawh a kibang a gilo hlagau thum ang pusuoh ka mu hi.

¹⁴Tamte pen na lamdang bawl dawite’ hla ahi a, leitung buppi-a om kumpite kungah pei-in, Vanglien Pasien’ ni thupi ni-a gal do dingin amate a kaikhawm dinga kuon ahi uhi.

¹⁵( “En un, guta bangin kang pei ding hi! A guohtangin pei-in a muolpho lo nadingin khanglo zing a, puon a sil[45] pa pen thupha nga ahi hi,” a ci hi.)

¹⁶Hebrew hamin Harmagedon[46] a kici munah amate in kumpite a khawm uhi.

¹⁷Vantungmi a sagina in huilahah a hai a buosuh leh biehinnpi sung kumpi topha panin aw ngai mama khat ang ging a, “Man zo hi!” a ci hi.

¹⁸Tuale tun ang phe a, van ang to-in keh ang kie a, nahpi-in zil ang lingin gielpi ang kie hi. Leitunga mite a opzaw a kipanin tua bang zil linna a om ngai nai sih hi.

¹⁹Khuopi lien khen thum kisuo-in, minamte’ khuopite a cimmang hi. Pasien in a lien mama Babylon a phawh a, ama’ lungsona lenggazu-hai ama a pie hi.

²⁰Tuikul zosie taimang siengin muolte kimu nawn lo hi.

²¹Van panin mite tungah pound[47] zakhat ta a gih giel golpite kiesuhin, gielpi gimna ziehin amate in Pasien a gausam za ding dongin tua gimna zauhuoi mama hi.