Read Zou KILAHNA 17 Bible Online

KILAHNA 17 - Zou bible

KILAHNA 17

¹Tua ciengin hai sagi a tawi vantungmi sagi hing pei-in keima kungah, “Hing pei in, tuipi tampite tunga a to a lien numei pahtat nu tunga thukhenna kang lah ding hi.

²Leitung kumpite in ama nu tawh pahtatna a bawlton vua, leitunga teng mite in amau’ pahtatna lenggazu a kham uhi,” ei ci hi.

³Tuaci’n ama in hlagau[48] tawh gamlahah ei puomang a, lutang sagi le ki sawm a nei, gensietna minte tawh a kidim a sandup gamsa tunga a to numei khat ka mu hi.

⁴Tua numei in a sandup le a ausan puonte silin, kham, suongmanphate le tui kepte tawh kizem a, a kidahhuoi nate le a pahtatna a niehte tawh a kidim kham hai khat a khutah a tawi hi.

⁵Tuale a talpang tungah: “A lien Babylon khuopi, numei pahtatte le leitunga a kidahhuoi nate’ nu,” ci-in a thuthuh min khat kigiel hi.

⁶Tua numei in misiengthote’ sisan le Jesu tunga teci a pang mite’ sisan khamin a om ka mu hi. Keima in tua nu ka mu ciengin lamdang ka sa mama hi.

⁷Hizongle vantungmi in keima kungah, “Bang dinga lamdang na sah ahei? Tua numei le lutang sagi le ki sawm a nei, ama nu a puo gamsa tawh kisai thuthuh na kungah kang gen ding hi.

⁸Tua na mu gamsa pen nidangin om ngai-in tu-in om nawn lo hi., mong nei lo lei kawhawm panin a pusuoh dingin ang kisa a, tuale sietna thuoh dingin a pei ding hi. Tua gamsa pen om ngai zo a, tu-in om nawn lo napi ang peikia ding ahi ziehin leitung kisiem cila kipanin hinna laibu sunga a min a kigiel kha lo leitunga teng mite in tua gamsa a mu ciengun lamdang a sa ding uhi.

⁹“Tami thu-ah lungsim pilna kisam hi: Lutang sagite pen tua numei nu tona muol sagite ahi hi; kumpi sagite zong ahi vua,

¹⁰tuate lahah nga pua zo a, khat om lai a, adang khat pen ang pei nai lo hi; ama ang pei ciengin bakhat sung beh kip ding hi.

¹¹Khatvei a omsa, tu-in a om nawn lo gamsa pen kumpi gietna hi napi, kumpi sagite-a’ zong hi vanuh a, tuaci’n ama sietna ah a pei hi.

¹²Na mu ki sawmte pen kumpi gam a nga nai lo kumpi sawmte ahi vua, hizongle amate in tua gamsa tawh kumpite bangin nai khat sung thuneina a nga ding uhi.

¹³Tua teng kithutuohin a vanglietna ule a thuneina uh tua gamsa tungah a pie uhi;

¹⁴amate in Tuuno a do ding vua, Tuuno in amate a zo ding hi, azieh pen ama topate’ TOPA le kumpite’ Kumpipa ahi a, ama tawh a omton mite ahile a kihlansa, a kiteelsa, le a muonhuoi mite vive ahi uhi,” ei ci hi.

¹⁵Tuale ama in keima kungah, “Na musa tua numei pahtat nu tona tuite pen mite, mihonpite, minamte, le ham namcinte ahi hi.

¹⁶Na musa ki sawmte le tua gamsa in numei pahtat nu a muda ding uhi; amate in tua nu’ neisa zosie lahpiehin a guohtangin a omsah ding vua, a sa ne-in mei tawh a haltum ding uhi.

¹⁷Bangzieh ahei cile Pasien’ kammalte a tangtun masangsie, ama’ lungtup a sem dingin kithukimin tua gamsa tungah a kumpi gam uh a pieh nadingun Pasien in amate lungsim sungah tua thu koi zo hi.

¹⁸Tua na mu numei pen leitung kumpite a uh khuopi lien ahi hi.