Read Zou KILAHNA 2 Bible Online

KILAHNA 2 - Zou bible

KILAHNA 2

¹“Ephesus hlattuom pawlpi’ vantungmi tungah giel in: Tam teng pen a zietlam khutah aasi sagi tawi-in kham meivah tunna sagi lahah a vah kawikawi pa’ kammal ahi hi:

²“Keima in na nasepte, na gimnate le na thuohzawh hatnate ka thei hi. Nang in sietna bawlte na thuoh zawh lo lam ka thei hi; sawltahpi hi lopi sawltahpi ka hi uhi, a ci mite sittelin a zuou ahi lam uh na munate zong ka thei hi.

³Keima’ min ziehin lungduoi tahin thuohin na cimtah lo lam zong ka thei hi.

⁴Hizongle kang mawsahna khat om veve a, tua khu nang in itna masa pen na nuasie ta hi.

⁵Tua ciengin bang ka ci pua ta ahei ci phawh inlen, kisiakia-in na sil bawl masate bawlkia in. Na kisiakia sih poma leh nangma kungah hing pei-in a opna mun panin na meivah tunna ka hemkhie ding hi.

⁶Hinanle nang ang kipatatna pen tami ahi hi: Keima in zong ka muda ahi Nicolas pawlte’ nasepna na muda hi.

⁷Hlagau in hlattuom pawlpite tunga a thugente khu bil nei poma in za taheh. Keima in a guolzo mi zosie tungah Pasien’ paradise sunga a om hinna singkung neh theina thu ka pie ding hi.

⁸“Smyrna hlattuom pawlpi’ vantungmi tungah giel in: A masa pen le a nukhia pen, a si ngaisa le a hingkia pa’ thugen tam bang ahi hi:

⁹“Nang na hau vangin na gentheina le na zawnna ka thei hi. Jew mi hi lo napi ka hi uhi, ci-in kigenin hizongle Satan’ pawl ahi zawte’ ang gensietna ka thei hi.

¹⁰Na gim thuoh dingte zau vawt sin. Pilvang in, dawimangpa in nang ang ze-et nadingin note kimkhat thong sungah hing khumin ni sawm sung gentheina na thuoh ding uhi. Si tanpha-in muonhuoi in, tua hile keima in hinna lukhu kang pie ding hi.

¹¹Hlattuom pawlpite tunga Hlagau thugen khu bil nei poma in za taheh. A guolzo poma nivei sina in a gimsah sih ding hi.

¹²“Pergamum hlattuom pawlpi’ vantungmi tungah giel in: A langni-a a hiem namsau nei pa’ thugen tam bang ahi hi:

¹³“Satan’ kumpi topha opna muna a teng na hi lam kang thei hi. Hinanle ka min na pomdet a, Satan opna mun note lahah a kithat ka teci, ka mi muonhuoi pa Antipas khan lai nangawnin kei[5] nei upna na niel sih hi.

¹⁴Hizongle na tungah mawsahna themkhat ka nei hi: Nang in milimte mai-ah kithoina ante nesahin numei-pasal pahtatna a bawl nadingun, Israel mite mai-ah suikhah ding na khat koi dingin Balak tunga thu a hil Balaam’ thuhilna a pom mi kimkhat na nei hi.

¹⁵Tuaci’n nang in Nicolas thuhilna a pom mi pawlkhat zong na nei hi.

¹⁶Tua ahi ciengin kisiakia in. Na kisiakia sih leh na kungah kang naw pei ding a, ka kam sunga namsau tawh amate ka do ding hi.

¹⁷Hlattuom pawlpite tunga Hlagau thugen khu bil nei poma in za taheh. Keima in a guolzo mi zosiete tungah phuolsel manna kimkhat ka pie ding a, suongkang khat le a tunga min tha kigiel khat zong ka pie ding hi. Tua suongkang pen a ngate simlo koima in thei lo ding hi.

¹⁸“Thyatira hlattuom pawlpi’ vantung mi tungah giel in: Meikuong kileh banga mit nei pa le sumngo banga keng nei pa’ thugen tam bang teng ahi hi:

¹⁹“Na gamtatnate- itna, upna, nasepna, le lungduoi taha na thuozawhnate ka thei hi. Na sep masa pen sangin na sep nukhia pen a thupi zawh lam zong ka thei hi.

²⁰Ahi vangin nang tungah mawsah ding thu tami ka nei hi: Nang in numei-pasal pahtatna le milim biehna ante ne dingin ka nasemte[6] hilin a puikhiel, ama le ama kamsang a kici numei Jezebel na kham sih hi.

²¹Tua numei a kisia nading hun ka pieh vangin a numei-pasal pahtatna panin a kisia nuom tuon sih hi.

²²Kidawm un, tua nu tawh a pahtatnate uh panin a kisiakia sih uleh, tua numei le ama tawh a pahtat zosie lupna ka ngahsah ding a, gimna lienpi ka thuohsah ding hi;

²³tuale keima in tua numei’ tate ka satlia ding hi. Tua ciengin hlattuom pawlpite zosie in kei pen lungsim le lungtang a sui pa ka hi lam ei thei ding vua, khat ciet tungah na gamtatna utawh kituohin kang thuhkia ding hi.

²⁴Hinanle Thyatira khuo sunga om tami thuhilna a pom lo, mi pawlkhat in, ‘Satan’ thuthuh pite,’ a ci thute zong a sin kha vawt lo no adang teng tungah keima in vangih dang khatpo kang suon sih hi, ci thu kang gen hi.

²⁵Kang pei masangin na neisun teng uh na tukip bembom un.

²⁶A guolzo le ka nasepna a tawp tanpha-a a zomsuoh mi zosie tungah, keima in minamte tungah thuneina ka pie ding a,

²⁷leibeelte a kisatguoi bangin ama in sia ciengpum tawh amate uh[7] ding hi,

²⁸keima zong ka Pa kung panin thuneina nga ka hi hi. Keima in zong a guolzo mi pa tungah zingsol aasi ka pie ding hi.

²⁹Hlattuom pawlpite tunga Hlagau thugen khu bil nei poma in za taheh.