Read Zou KILAHNA 20 Bible Online

KILAHNA 20 - Zou bible

KILAHNA 20

¹Tua ciengin vantung panin vantungmi khat hing kumsuhin a khutah mong nei lo kawhawm honna tawhtang le siakhau golpi khat a tawi ka mu hi.

²Ama in Dawimangpa le Satan a kici tanglai gulpi ahi gulhiempi manin kum tulkhat sung hencip a,

³kuohawmpi sungah sepsuhin kum tulkhat a tawp masangsie minamte a sol nawn lo nadingin tawh kilin ama tungah a ciemte hi. Tua zaw ciengin bakhat sung ama kihla ding hi.

⁴Tua ciengin kumpi tophate ka mu a, tuate tunga a tote tungah thukhen nading aana kipie hi. Jesu[60] tunga teci panna le Pasien’ thu zieha ngawngtanna a thuohte’ hlate zong ka mu hi. Amate in gamsa ahi a, a lim ahi zongin bie loin, a talpang tung vuah ahi a, a khut tung vuah ahi zongin gamsa ciemtena zong a nga sih uhi. Amate ang hingkia vua, Khris tawh kum tulkhat sung a mangton uhi.

⁵(Kum tulkhat a tawp masangsie a omlai misite a hingkia nai sih uhi.) Tami pen thawkiana masa pen ahi hi.

⁶Thawkiana masa sunga a kihalte pen mi hampha le mi siengthote ahi uhi. Tua mite tungah nivei sina in thu a nei nawn sih a, tuale mahin amate pen Pasien le Khris’ siempute ahi ding vua, ama tawh kum tulkhat sung a mangton ta ding uhi.

⁷Kum tulkhat a tawp ciengin a thongkiehna panin Satan kihla ding a,

⁸Gog le Magog kici lei kiuli-a minamte sol dingin kuonkhie ding a, a galsimpi dingin amate a kaikhawm ding hi. Amate ahile tuipi gei-a senel za-in a tam uhi.

⁹Leitung maitang dimin amate a kuon vua, misiengthote’ giephuol le a it a khuopi a kimkot uhi. Tuale vantung[61] panin meikuong ang kiesuhin amate a haltum sieng hi.

¹⁰Amate a sol dawimangpa pen gamsa le kamsang zuou pa opna mun, kaat le meilipi sungah kikhiesuh a, tuaci’n amate sun le zanin kumtawn bawlsietna kithuohsah den ding hi.

¹¹Tua ciengin a lien kumpi topha kang khat le a tunga to pa ka mu hi; ama opna mun panin leitung le vantung taimang a, ama gel adingin mun kimu zo lo hi.

¹²Tuale kumpi topha mai-a a ding a sisa a lien a neu ka mu a, tuaci’n laibute zong kiphen hi. Hinna laibu ahi laibu dang khat zong kiphen hi. A sisate tungah a gamtatnasate uh laibu sunga kiciemte tawh kizui-in thu kikhen hi.

¹³Tuipi in a sunga om misite puohto-in, Sina le Misi khuo in zong amate sunga om misite hing puohto a, a sepnasa uh tawh kizui-in a unpi-un amate tungah thu kikhen hi.

¹⁴Tua ciengin meilipi sungah Sina le Misikhuo kikhiesuh hi. Tami meilipi pen sina nina ahi hi.

¹⁵Hinna laibu sunga a min kigiel kha lo poma tua meilipi sungah kikhiesuh hi.