Read Zou KILAHNA 22 Bible Online

KILAHNA 22 - Zou bible

KILAHNA 22

¹Tua ciengin vantungmi[71]in Pasien le Tuuno topha pana ang luongkhie, crystal suongmanpha banga a cim kilkel hinna guntui ei lah a,

²tua pen khuopi lampi laikimah a luongsuh hi. Tua gun pang tuohah ga nam sawm le nam ni a nei hinna singkung[72] po a, hla sielin ga hi; tua singkung a tete pen minamte damna ding ahi hi.

³Khum munah samsiet mi koima kimu kha nawn lo ding hi. Ahi vangin tua sungah Pasien le Tuuno’ topha om ding a, a nasemte[73] in ama a bie ding uhi;

⁴amate in ama’ maitang a mu ding vua, a talpang tung vuah ama’ min a tuong ding hi.

⁵Zan hun ci om nawn lo ding a, Pasien pen amau’ khuovah hi ta ding ahi ziehin amate in meivah tang le ni tang kisam nawn loin kumtawnin a mang den ta ding uhi.

⁶Ama in keima kungah, “Tami thute pen muontah a, thuman ahi hi, bangzieh ahei cile kamsangte hlagau ahi TOPA Pasien in a nasemte[74] tungah ang tung bai ding thute a lah dingin a vantungmi a sawl zo hi,” ei ci hi.

⁷“En in, kang pei bai ta ding hi! Tami laibu sunga kamsanna thute a zui pa mi hampha ahi hi,” ei ci hi.

⁸Keima John pen tami thute za-in a mu pa ka hi hi. Tuate za-in ka mu ciengin keima kunga tuate ei lah vantungmi kephungah a bie dingin ka bawhsuh hi;

⁹ahi vangin ama in keima kungah, “Tam bang bawl sin! Nang le kamsang na kithuopite[75] tawh nasemton[76] khat ka hi bo hi. Pasien bie zaw’n!” ei ci hi.

¹⁰Tuale ama in keima kungah, “A hun ang nai ta ahi ziehin tami laibu sunga kamsanna thute khacip sin.

¹¹Sietna bawlpa in bawl lai hinlen, a niehte nieh lailai-in, midihte dih suoh hinlen, a siengthote siengtho suoh ta uheh,” ei ci hi.

¹²“En in, kang pei bai ta ding hi! Mi zosie a gamtatna uh tawh kizui-in a thuhkia dingin keima kungah ka thaman a om hi.

¹³Kei pen Alpha le Omega, amasa pen le a nukhia pen ka hi a, a kipatna le a tawpna zong ka hi hi.

¹⁴Hinna singkung nei thei nading le tunkotte panin khuopi sung lut nading thu nei thei nadinga a puontuol uh a sawpsiengte[77] mi hampha ahi uhi.

¹⁵A pulamah uite, bum tawite, numei-pasal pahtatna bawlte, tuolthatte, milim biete, le zuouphuo nuomsa-in zuouthu gente zosie a om uhi.

¹⁶“Keima Jesu in hlattuom pawlpite ading tami teci panna thu na kunga ang gen dingin ka vantungmi kang sawl hi. Keima pen David’ zungpi le a suon ahi, zingsol ka hi hi,” ei ci hi.

¹⁷Hlagau le motha in “Hing pei ta’n,” a ci uhi. Tuale a za zosie in, “Hing pei ta’n,” ci ta uheh. A dangta zosie hing pei uheh. A dei zosie in hinna tui a hlawn-in hing la uheh.

¹⁸Keima in tami laibu sunga kamsanna thu a za zosie kang hilkhol hi: Mi khatpo in tuate a belap leh Pasien in zong tami laibu sunga kigielsa gimnate tua mipa tungah a belap ding hi.

¹⁹Mi khatpo in tami kamsanna laibu sunga thute a lahkhiet leh, Pasien in zong tami laibu sunga kigielsa ahi hinna singkung le khuopi siengtho sunga tua mipa nga ding satanh a lahpieh ding hi.

²⁰Tami thute teci a pang mipa in, “Kang pei bai tahtah ta ding hi,” ei ci hi. Amen. TOPA Jesu aw, Hing pei ta’n!

²¹Misiengtho zosiete tawh TOPA Jesu’ hepina hing om taheh. Amen.[78]