Read Zou KILAHNA 4 Bible Online

KILAHNA 4 - Zou bible

KILAHNA 4

¹Tam zaw ciengin ka khuodah leh vantungah kot kihongsa khat ka mu hi! Tuale pengkul tawh a kibang, ei hopi awging ka zah masa pen in, “Tanah hing kato in, tam zaw cienga thupieng dingte kang lah ding hi,” ei ci hi.

²Thakhatthu-in hlagau[9] in ei luodim a, tuale vantungah kumpi topha khat ang kidaw a, tua kumpi topha tungah mi khat ang to hi!

³Khumi kumpi topha tunga a to pa pen jasper le carnelian suongmanpha tawh kibang a, kumpi topha kimvelah emerald suongmanpha tawh a kibang sakhi-guihlung khat a om hi.

⁴Tua kumpi topha kimvelah kumpi topha sawm ni le li ma om a, tua kumpi tophate tungah puontuol kang silin a lu tung vuah kham lukhu a khu upa sawm ni le li a to uhi.

⁵Tua kumpi topha panin tun ang phe a, keh kie-in van ang to vapual a, tuaci’n kumpi topha mai-ah Pasien’ hlagau sagite ahi meivah sagi kivah hi.

⁶Kumpi topha mai-ah crystal suong tawh a kibang le limlang tuipi tawh a kibang khat a om hi. Kumpi topha kimvel le a pang tuohah a nua a ma-ah mittang a dima a nei ganhing li a om hi:

⁷Ganhing masa pen humpi tawh kibang a, a nina pen bawngtang tawh kisunin, a thumna pen in mihing maitang bang nei a, a lina pen a lenglai muvanlai tawh kibang hi.

⁸Ganhing lite in hla guh ciet nei-in, tua a hlate’ kimvel le a sung lamah mittang a dim hi. A sun a zanin khawl loin, “A omsa, tuhun-a om, le ang pei lai ding Vanglien TOPA Pasien, Siengtho, siengtho, siengtho hi, ci-in la a sa uhi.

⁹Tua ganhingte in kumpi topha tunga a to a hingzing pa tungah minthanna, patawina le lungdamkona a nei sielun,

¹⁰kumpi topha tunga a to a hingzing pa mai-ah tua upa sawmni le lite in khupbawhin a bie uhi. Amate in kumpi topha mai-ah a lukhute uh pai-in,

¹¹“Kote’TOPA le Pasien aw, minthanna, patawina, le vanglietna nga dingin na kilawm hi. Azieh pen sil bangkim na piengsah a, na deina bangin tuate omin kipiengsah hi, ” ci-in la a sa uhi.