Read Zou KILAHNA 8 Bible Online

KILAHNA 8 - Zou bible

KILAHNA 8

¹Tuuno in ciemtena sagina a phen ciengin nai lang sung bang vantungah a kisip dide hi.

²Tuale Pasien mai-a a ding vantungmi sagi ka mu a, amate pengkul sagi kipie hi.

³Gimnamtui halna kham kuong a tawi vantungmi adang khat hing pei-in maitam ah ang ding hi; misiengtho zosie’ thungetna tawh kumpi topha mai-a kham maitam tungah a piehton dingin ama tungah panamtui tampitah kipie hi.

⁴Misiengthote’ thungetna tawh tua vantungmi’ khut sung panin Pasien mai-ah gimnamtui khute a kato hi.

⁵Tua ciengin vantungmi in tua gimnamtui kuong la a, a sungah maitam panin mei-am a dimin koi-in leitungah a paisuh leh van hing to-in keh ang kie a, tun ang phe-in zil ang ling hi.

⁶Tua ciengin pengkul sagi a tawi vantungmi sagite pengkul mut dingin a baisa-in a om uhi.

⁷A khatna vantungmi in a pengkul a mut leh sisan tawh a kihal giel le mei ang omin leitungah tuate a kisepsuh hi; tuale leitung sethum-suo-sekhat katumin singkung sethum-suo-sekhat zong katum a, lopa zosie zong a katum hi.

⁸A nina vantungmi in a pengkul a mut leh mei in a kah muol golpi tawh a kibang na khat tuipi sungah kipaisuh hi.

⁹Tuipi sethum-suo-sekhat sisan suohin tuipi sunga a om ganhing sethum-suo-sekhat si a, tembaw sethum-suo-sekhat kisie hi.

¹⁰A thumna vantungmi in a pengkul a mut leh meila banga a kuong aasi golpi khat vantung panin ang kiesuh a, gunte le tuinahte sethum-suo-sekhat tungah tusuh hi.

¹¹Tua aasi’ min Gamsai ahi hi. Tuite sethum-suo-sekhat gamsai tui suoh a, tuami tui pen aicimtangkha a bah ziehin a dawn mi tampitah a si uhi.

¹²A lina vantungmi in a pengkul a mut leh a tanna uh sethum-suo-sekhat a miel thei nadingin ni sethum-suo-sekhat, hla zong sethum-suo-sekhat ma, le aasi sethum-suo-sekhat kisusie a, tuaci’n sun zong sethum-suo-sekhat miel a, tua ma bangin zan zong sethum-suo-sekhat ma a miel hi.

¹³Tua ciengin ka khuodah leh vankim lai-ah muvanlai khat a len kawmin, “Adang vantungmi thumte in a mut dinga a kisah uh pengkul gingte ziehin leitunga teng mite tungah, “Gimna, gimna, gimna ang tung ding hi!” ci-in nahpi taha a kiko ka za hi.